Entrada BBO y importacion decepcionante
CAFT a caba di publica su vision riba e informacion di gobierno tocante tercer trimester di 2016. Nan ta constata cu entradanan relaciona cu importacion y BBO ta kedando atras compara cu loke gobierno a pronostica den su presupuesto. Manera nos a ilustra caba den nos editorial di diasabra ultimo, e resultado di nuebe luna ta core mas o menos pareu cu aña 2015, pero ta gobierno a pone un expectativa masha halto mes den presupuesto. Awor cu ta resulta cu no tin accion por lo pronto den e refineria, no ta tuma hende na trabao, no ta importa material na grandi pa e rehabilitacion, tur e entradanan extra pa gobierno ta resultando di ta ‘gebakken lucht’ manera nos conciudadanonan na Madre Patria ta bisa.
Un bista den e informacion di Algemene Rekenkamer pa 2015, combina cu e informacion di gobierno pa kwartaal 3-2016 ta duna nos un impresion di kico a tuma luga. Algun ehemplo: loonbelasting: na 2015 tabata na Afl. 247,6 miyon y pa 2016 gobierno tabata aspira cobra Afl. 270 miyon. Te awor, manera cos ta pinta despues di tres cuarto di aña, por yega na mas o menos e mesun suma cu aña pasa, lagando un buraco di como Afl. 20 miyon cu no lo drenta. Ademas CAFT ta señala cu a paga caba como Afl. 7,5 miyon na restitucion di inkomstenbelasting, loke probablemente ta bay aumenta e deficit den e categoria aki cu ta relaciona cu loonbelasting.
Den nos edicion di diasabra nos a referi caba na e casonan di impuesto di importacion y BBO, cu conhuntamente por percura pa un buraco extra di casi Afl. 50 miyon. Si nos tuma henter e pakete di impuesto indirecto, nos por mira den informacion di Contraloria General cu na 2015 a drenta Afl. 415,8 miyon. Gobierno a pone pa 2016 un total di Afl. 473,7 miyon cu muy probablemente caha di gobierno nunca lo haya pa mira. E suma aki di casi 60 miyon florin ta inclui e diferencianan menciona den impuesto di importacion y BBO.
Logico cu den tres luna ta dificil pa cambia rumbo, specialmente si esey ta depende di economia y no di accion di parti di gobierno. Como cu no ta visibel cu lo tin un cambio den e ambiente den comercio, no por spera tampoco cu esey ta bay sucede. Tur esaki ta pone e presupuesto complementario cu mester bin parlamento e luna aki ainda, den un luz negativo. Te awor e presupuesto complementario cu a presenta ta papia bunita di mas gasto y mas entrada, conta cu un saldo negativo, pero no ta papia naturalmente di e debacle aki den entrada di gobierno. Den esaki ta interesante kico CAFT tin di bisa, dilanti di e realidad aki, cu no por pone un banda. Nan ta observa cu e en berdad BBO y impuesto di importacion por percura pa sorpresa negativo (“tegenvallers”) pero di otro banda e pago extra di Valero di Afl. 26,2 miyon y e entrada extra na impuesto riba ganashi por compensa pa e perdida aki. Esey por ta e caso pero den impuesto riba ganashi no ta sigur ainda kico lo drenta den ultimo tres luna di aña. Ademas mester tuma na cuenta e situacion di loonbelasting unda por tin ainda, manera menciona anteriormente, un 20 miyon cu no ta bay drenta.
Kico por bay sucede? Nos por imagina nos mes cu gobierno ta mantene su punto di bista argumentando cu e ‘meevallernan’ ta cubri e decepcionnan, y ta mantene e presupuesto complementario manera cu e ta. Si tin resultado decepcionante di tur manera henter e asunto ta bay pa 2017, ora cu e resultadonan di e ultimo tres luna ta conoci y CAFT duna su opinion encuanto esaki. Esey lo ta despues di mita di februari, ora cu gobierno mester entrega e informa tocante ultimo kwartaal 2016. E ora anto e situacion ey lo por bay tin consecuencia pa 2017, unda dependiendo di e gravedad di e situacion, lo por propone extra medida pa coregi rumbo.
CAFT su critica ta concentra tambe riba e punto cu nan ta constata cu gobierno no ta haciendo bastante esfuerso pa contene y corta den gastonan di personal. Por observa cu atrobe un parti grandi di e presupuesto complemantario ta pa paga promocion y overtime. Mientras cu CAFT ta recorda gobierno cu tabata palabra pa corta 5% di gasto di personal anualmente. Esey no ta tumando luga y cu aña di eleccion den porta, gobierno no ta parce di ta dispuesto di cambia rumbo den esaki. Ademas cu e gastonan no ta bay baha, pasobra desde 2017 e gastonan extra di indexering ta cuminsa core. Esey ta e resultado di e acuerdo cu empleado publico y nan sindicatonan na 2014 cu ta bay aumenta gasto di personal drasticamente te cu 2024.
Cu tur esaki, si no tin mehoracion den sector di turismo, y no tin mehoracion den consumo local, tur cos manera bisa anteriormente ta depende di e ‘cabay di campaña’ cu ta e refineria. Y esey no ta parce di ta den man di gobierno tampoco, pero di esunnan cu mester percura pa financiamento.
