Durante e conferencia di prensa di e Colegio di supervision financiero di Aruba (CAft) e presidente nobo di e organismo, Lidewijde Ongering, a splica cu nan ta conseha Gobierno di Aruba pa traspasa maneho di algun entidadnan gubernamental pa partnernan priva y tambe a indica cu nan a conseha pa cuminsa cobra impuesto riba tips.
Ongering a indica, den su respuesta na un pregunta di miembro di prensa, cu e entidadnan gubernamental ta echt un carga pisa pa e presupuesto di Aruba y nan kier wak con por yega na un bon solucion pa e situacion aki.
El a splica cu pa algun parti esey ta algo bastante complica y a menciona como ehempel e situacion di Serlimar, cu ainda nan no a caba di resolve esey.
“Si nos mira e situacion di Arubus nos ta pensa cu esey lo por wordo maneha hopi bon door di partnernan priva,” el a bisa referiendo na Arutram y Aruparking cu ta cay bao di Arubus.
Ongering a splica cu e dos companianan aki ta dos compania cu gobierno no mester ta envolvi den dje y ta haci un peso grandi ariba e presupuesto di pais Aruba y ta conseha gobierno pa laga esaki bay den man di partnernan priva.
“Mi no kier bisa cu e ta algo facil cu por realisa di awe pa mañan, pero nos ta conseha pa nan mira seriamente e posibilidad deshaci di e carga ey y esey lo trece un alivio financiero.”
Contestando otro pregunta di miembro di prensa, e organismo a splica cu nan ta recomenda Gobierno di Aruba pa cuminsa cobra impuesto riba tips.
E tema di impuesto riba tips ta uno cu a wordo debati hopi pa diferente organisacionnan como tambe ariba rednan social na unda e trahadonan ta completamente contra esaki, ya cu e tipsnan ta yuda nan entrada di tur luna. Di otro banda gremio comercial ta pro cobra impuesto riba tips pa asina e balansa por ta mas husto.
Den pasado gobierno a indica cu no lo bay cobra impuesto riba tips, pero CAft ta considera cu e ta un entrada importante door di cual nan ta conseha pa cuminsa haci esaki.
