CAft ta Positivo… Pero nos problema a bira menos?

For di comunicado y rueda di prensa nos por conclui cu CAft, despues di e ultimo crusadanan di corespondencia na un tono un tiki irita, a yega na e conclusion cu e presupuesto 2018 ta realistico, tambe pa e par di punto cu a keda. Esey ta entre otro e dividendo di Refineria di Aruba Nv cu gobierno a bisa cu lo drenta, y cu parcialmente, mas di mita, a tuma luga caba.

Tambe tocante e gastonan di personal a strica e ultimo machicanan, y gobierno por bay parlamento pa pasa un ley pa cambia e ley di presupuesto, un presupuesto complementario anto, pa aproba e cambionan cu a surgi den tratamento di ley na april. So far, so good. Ban spera si cu no bin problema inespera na caminda y cu e cosnan cu mester regla ainda keda regla tambe. Como organo consultivo naturalmente CAft no kier a duna opinion tocante e deliberacionnan cu ta tumando luga ainda entre gobierno di Aruba y gobierno di Hulanda/Reino pa loke ta e continuacion di e supervision financiero.

Di otro banda, nos ta tende diferente parlamentario di banda di gobierno vocifera cu CAft den pasado no lo a haci su trabao bon, pero awor si ta bin pone orden riba e gobierno di coalicion. Esey ta bay acompaña pa e deseo pa Aruba mes tuma rienda den e asunto financiero aki y introduci e tan discuti ‘Begrotingskamer’ cu tampoco ta algo nobo, pero a surgi caba den e presentacion di gobierno anterior prome cu e problemanan grandi di 2014 a surgi, na momento cu a presenta un plan pa mantene e gastonan di gobierno bao di e limite di 1350 miyon florin pa aña, mientras cu crecemento economico mester a percura pa cada aña mas entrada pa gobierno, pa asina nos ‘outgrow’ e problema financiero. Realidad di bida a pone e soñadonan aki spierta bruscamente pa pasa den loke tabata mas bien un pesadiya. Si e lo a toca nan so no ta nada, nos tur a haya…

E asunto di e Begrotingskamer ta uno cu ta parce ilusorio na e momento aki pa diferente motibo. E prome ta cu no ta asina no mas bo por troca supervision di Reino, imponi pa un motibo, y esey ta cu gobierno na 2014/2015 tabata hibando e pais aki rumbo pa un abismo, y riba esey desmenti tambe. Manera e representante di gobierno Hulandes den Caribe di e tempo ey a bisa bon cla, Hulanda no tin ningun intencion pa laga un isla den Caribe pone nan cara na berguensa pa loke ta trata asunto financiero; no cu e track record como pais solido cu nan tin. Gobierno di Hulanda, y por lo tanto esun di Reino, ta actua semper bao di e consigna di mantene e asuntonan den region di Caribe ‘manehabel’ (beheersbaar). Esey segun nos ta implica cu tanten nan no tin confiansa cu cos lo no desvia atrobe, nos ta keda mantene e supervision di Reino: esun cu no gusta, por wel di laga.

Y ban ta honesto: cuanto di nos wowo cera ta bay hura pa cualkier gobierno? Ademas, y nos no ta bisa e cos aki pa prome biaha, ni pa ultimo: un Begrotingskamer lo ta nada mas cu un organo di consulta, mescos cu nos tin un Rekenkamer y un Raad van Advies. Lo e Begrotingskamer bira mescos, cu cada biaha cu nan ta conseha algo cu gobierno no kier, nan ta core bisa: ‘ Ah, pero esey ta conseho e ta, nada mas…’ Ta mas realistico pa prepara nos pa keda bao di supervision financiero pa basta tempo, te cu nos proba cu nos, cu cada biaha menos guia, ta mustra capaz di maneha nos situacion.

Esaki ta motibo pa lamenta? Talbes no tanto. Djis tira un bista cerca nos bisiñanan na Puerto Rico, cu a hinca nan mes den problema grandi, gastando placa na grandi pa crea un aparato gubernamental cu nan no por a paga mas. Nan no por a haci nada otro cu recuri na Congreso Mericano pa ayudo. Nan a hay’e pero e no a bin gratis; nan tin nan variante di CAft (Fiscal Supervision Board) pa controla ta ki rumbo financiero nan ta tuma. Yoramento y lamento no ta yuda, mester haci loke mester haci. Tin 20.000 cupo di trabao den gobernacion actualmente na peligro pa baha gasto.

Cerca nos mester bisa cu Hulanda y CAft ta bay suave cu nos. No a pone gobierno bao presion pa kita hende di trabao, al menos no cu exito. Tur e beneficionan di e funcionarionan publico a keda intacto, hasta e indexering cu lo keda paga den e dianan aki ( y esey garantisa te 2024) a keda salba. Tambe a acepta cu gobierno ta sigui trata problema di personal manera ta cuestion di manicure e ta: kita un tiki aki aya, VUT cu ‘natuurlijk verloop’, ta ki tempo nos tabata tende e mesun storianan aki, cu a resulta na nada… Nos ta kere cu ta miho nos keda contento cu e supervision suave aki y cuminsa pensa tambe si di berdad tin crisis. Nos sa cu tin un, pero nos no sa si tur di nos sa esey.