CAft ta menasa cu ‘aanwijzing’?

Gobierno mester bay parlamento atrobe

Segun e ultimo corespondencia di banda di CAft, ainda nan no ta satisfecho cu e splicacion cu nan a haya di parti di gobierno di Aruba, encuanto cierto detaye di presupuesto 2018. E organismo ta haya cu ainda a keda incertidumbre, specificamente tocante e recomendacion pa percura cu e deficit financiero ta mas abao cu esun di 2017, y tambe cu e gastonan di personal mester mustra un tendencia descendiente.

Pa CAft, por lo pronto nan no ta mira cu e presupuesto ta cumpliendo cu e recomendacionnan duna. Pa loke ta e entradanan cu gobierno ta spera di haya, ta keda e punto di discusion cu gobierno ta convenci di haya Afl. 17,5 miyon di Refineria di Aruba NV (RdA NV) den forma di dividendo, mientras cu CAft ta para ariba, cu hasta despues di mira e evidencia cu gobierno a trece dilanti, nan no ta convenci cu e suma ey lo drenta caha di gobierno. Minister di financia a laga sa cu mientras tanto a drenta un prome pago y cu tin confiansa cu RdA lo cumpli cu nan compromiso. Textualmente CAft ta contesta riba esaki:” Segun CAft ainda no ta suficientemente sigur, a base di e informacion disponibel, cu e AWG 17,5 miyon lo keda deposita na 2018. Den e informacion nobo di e minister CAft no ta mira hecho nobo cu ta indica cu e recepcion di e suma aki por ser califica como realistico.” Motibo pa CAft ripiti su recomendacion pa mantene e deficit mas abao cu 2017 y hinca esaki den un cambio di presupuesto, loke ta implica pasa un ley (cambio di ley) den parlamento. Naturalmente no un situacion agradabel pa gobierno, pasobra e speransa tabata di keda cla cu e presupuesto, incluyendo un acuerdo cu CAft y gobierno Hulandes, loke awor ta resulta di no ta e caso. Mas trabao anto.

Pero e asunto aki sigur tin un aspecto interesante adicional. E perspectivanan di RdA NV di cobra tur loke ta di cobra di banda di PDVSA/Citgo, lo ta intimamente liga na loke ta sosodiendo actualmente na Venezuela, ya cu esaki lo tin repercusion pa henter e proyecto di rehabilitacion. Manera e situacion ta mustrando actualmente, PDVSA y su subsidiarionan ta core e riesgo di keda mula fini entre sancion di Merca y otro pais, y e embargonan riba nan propiedadnan cu a cuminsa cu e accion di ConocoPhillips, pero rapidamente ta haya mas creditor cu ta cuminsa tuma medida pa haya pago. Mientras tanto, produccion ta sigui cay, pasobra no tin placa pa mantene o renoba e instalacionnan, ni di produccion den tereno, ni di e refinerianan. Hasta tin caba noticia serio cu PDVSA lo ta preparando pa declara fuerza mayor den caso di no cumplimento, tanto di pago como di entrega di crudo.

Di tur manera, e nivel di produccion actual caba, di 1,4 miyon bari pa dia, no ta suficiente pa abastece tur cliente, manera India, Merca, Rusia y China, y keda cu suficiente pa abastece refinerianan local y esun na Curaçao. Ta p’esey a opta pa minimalisa procesamento di crudo na Venezuela mes, pa por tin mas crudo disponibel pa exporta. Ademas cu e estado malo di e instalacionnan tabata obliga di tur manera pa baha produccion local, loke a crea e siguiente problema, di e necesidad di importa gasolin y diesel pasobra e pais mes no ta produci suficiente. Por ta cu na CAft si nan ta lesa noticia internacional? En todo caso, e organismo di supervision no a keda convenci y ta desea pa gobierno tuma paso pa coregi e situacion aki.

E otro punto duro ta e asunto di gasto di personal, unda tampoco CAft a keda satisfecho cu e splicacion cu nan a haya. “A base di e argumentonan suministra pa e minister, CAft no ta convenci cu e gastonan di personal di 2017 pa 2018 mester subi y CAft ta pidi pa adapta esaki ainda den e presupuesto”, e organo ta comunica na nos minister encarga cu financia.

Kico ta loke mester pensa di e ultimo desaroyo aki? Nos ta kere cu, hunto cu e periodo cortico di dos aña pa gobierno yega na e surplus riba presupuesto, na cual nos mester a yega e aña aki caba, si e gobierno anterior a haci su trabao, CAft ta para fuerte aki cu nan kier e dos puntonan aki cumpli, y no solamente den un compromiso verbal o por escrito di gobierno, sino a traves di un cambio di ley, es decir cu den pura awor lo mester prepara un cambio di ley, pa e bay core henter e trayecto cu tur proyecto di ley mester cana, sino fono… Esaki ta un indicacion serio cu e palabra ‘aanwijzing’ a subi mesa…

Y kico ta e diferencia cu un aña pasa? Cu gobierno anterior ainda a topa cu un CAft cu a bisa cu e presupuesto ta irealistico, pero no a actua pa exigi un coreccion. Nos ta un aña despues y awor si aparentemente no tin espacio mas pa flexibilidad, aunke e sumanan den e caso concreto aki no ta grandi. Ta parce cu di banda Hulandes nan no ta dispuesto mas di ripiti e experiencia cu gabinete anterior.