Dos Parlamentario di oposicion kende a referi tocante e carta cu e organo di supervision financiero (CAft) a manda Parlamento, caminda nan ta conseha pa Conseho di Minister di Reino duna gobierno di Aruba un ‘aanwijzing’ (instruccion) relaciona cu su maneho di presupuesto 2019, ta Arthur Dowers y Michael Lampe.
Segun Dowers, e desilusion ta grandi cerca e simpatisante di Prome Minister, despues cu el a trece dilanti cu CAft a laga sa cu gobierno di Aruba ta cumpliendo cu tur norma. Mientras cu CAft a manda un carta pa Parlamento ‘hopi cla,’ unda e organo di supervision aki ta indica cu gobierno di Aruba no ta cumpli cu e normanan.
Dowers, kende a cualifica e prome mandatario como ‘gañado,’ a declara cu den e carta specificamente a señala cu gobierno no ta cumpliendo cu e parti di gasto di personal. Ya cu practicamente CAft a bisa cu prome mandatario a priminti cu nan ta bay cumpli cu un plan pa baha gasto di personal.
Dowers a mustra e rapport cu Gabinete Wever-Croes a presenta na 2018, riba loke a wordo priminti Hulanda riba reduci gasto di personal, entre otro, cu no lo tuma mas hende den servicio. Ademas a bin cu un grafico pa ilustra cu supuestamente nan a retira mas cu shen hende cu tabata traha pa e gobierno anterior.
Sinembargo -segun Dowers- e prome mandatario a hinca miembronan di su famia den aparato gubernamental. Nan a nombra 22 persona y tur ta gana salario alrededor di 10 mil florin pa luna, segun e rapport cu e hefe di e gabinete actual a presenta. Logicamente -segun Dowers- di e forma aki nan no por baha gasto di personal, sino cu e gasto aki a subi keto bay. Mientras el a priminti Hulanda cu ta bay baha gasto. Sinembargo, Hulanda a cuminsa mira cu gobierno di Aruba no ta cumpliendo cu e compromiso cu nan a haci via e firma di un protocol, y e ta haya logico cu CAft ta pidi conseho di minister di Reino pa duna un ‘aanwijzing.’
Mientras cu Parlamentario Michael Lampe a declara cu como fraccion di oposicion, nan ta siguiendo di cerca tur e desaroyonan cu ta tumando luga den e ultimo dianan aki.
E no sa realmente kico e minister encarga cu asunto economico y financiero ta haciendo pa stimula nos economia. Nan por ripara cu CAft ta conseha pa duna un ‘aanwijzing’ debi na e mal maneho aki. Lampe a cuestiona e hecho cu for di comienso di gobernacion aki, e minister di economia a cuminsa grita cu tin un crisis, locual a tranca economia completamente. E tipo di expresion aki a trece un negativismo riba nos mercado, unda hopi hende no kier inverti mas den nos economia. Lampe a bisa cu esaki ta refleha cu gobierno no tin un plan y tampoco un vision riba tereno economico.
