Recortenan tabata parti di condicion di Conseho di Minister di Reino pa Aruba por a haya sosten di likides

Recorte di 12.6 porciento di salario y miho splicacion con ta yega na 160 miyon florin basa riba introduccion di BTW ta esencial, segun College Aruba financieel toezicht, CAft na Minister di Finanzas, Xiomara Maduro. CAft a haci su comentario riba e carta cu e Minister di Finanzas a manda relacion cu e concepto di Presupuesto 2022.

Den su carta, Presidente di CAft, dr. Raymond Gradus a bisa cu e colegio a basa su evaluacion di e presupuesto riba e LAft (landsverordening Arubaanse financieel toezicht) y e protocol entre Hulanda y Aruba di 2018. Pa motibo cu e protocol ta termina formalmente na December 31 venidero, Aruba ta den deliberacion riba un areglo di transicion riba normanan presupuestario pa 2022. Sigui cu e protocol nifica cu Aruba mester realisa un surplus riba su presupuesto den e proximo añanan, na balor di 1 porciento di e BPI. Pero Aruba a pidi Gobierno di Reino pa por desvia di e norma aki na October manera e LAft y e protocol tambe ta permiti.

Presupuesto di Gobierno ta mustra un deficit financiero riba e sector colectivo di 310 miyon florin cu ta 5.5 porciento di e Producto Bruto Interno (PBI of GDP). Y e deficit di Pais Aruba ta 286 miyon florin cu ta 5.1 porciento di e PBI, of GDP.

Aruba ta mantene den e Presupuesto di 2022 un expectativa di crecemento nominal pa e PBI di 7.9 porciento. E crecemento den liña cu calculacionnan cu IMF a haci. CAft ta di opinion sinembargo cu 2022 ta keda marca pa insiguridad, entre otro pa motibo di e variante Omicron y como tal ta conseha pa adapta e proyeccion di crecemento, y adapta esaki den e Presupuesto 2022.

Mester ahusta Presupuesto pa yega na surplus na 2023

E calculacion a termino largo ta presenta deficitnan na 2023 te cu 2023 y ta apenas na 2026 lo yega na un saldo financiero nihil, cu ta nifica cu e debe di Aruba di 5.7 biyon florin lo sigui crece. E pagonan di interes riba e Presupuesto di 2022 ta limita pa motibo di e palabracionnan di refinanciamento for di Hulanda.

Den luz di esaki, CAft ta enfatisa si cu mester yega na un surplus pa 2023, pa limita crecemento di debe, cu ta un bon señal na mercadonan financiero internacional na momento cu e palabracionnan riba refinanciamento cu Hulanda ta caduca.

A pone e proyeccionnan di gasto y entrada multianual den e Presupuesto di 2022, pa cumpli cu e LAft., incluso e introduccion di BTW, cu pa 2023 lo mester produci 160 miyon florin. Pero CAft ta di opinion cu no a argumenta con ta yega na e suma aki.

Riba di dje, falta cualkier plan con ta bay ehecuta reforma di belasting y refortificacion di Servicio di Impuesto, SIAD. Como tal, CAft no tin opinion riba e efecto di e medida. Mas ainda, no a haci un calculacion riba e efecto riba crecemento economico cu introduccion di e medida aki. Como tal, CAft ta pidi e Minister pa presenta un argumento riba e consecuencianan financiero y inclui esakinan den e presupuesto di 2022. Mas ainda, CAft ta urgi pa hala aden e reduccion di tarifa riba loonbelasting na 2021 of compensa esaki cu medidanan cu ta reduci gasto of hisa entrada structuralmente.

Gasto di personal

CAft a tuma nota den cuadro di e gasto di personal, cu Gobierno a reduci e recorte di 12.6 porciento di salarionan den sector publico y semi publico cu 50 porciento den e Presupuesto di 2022. Pa motibo di esey, gastonan ta 18 miyon mas halto na 2022 compara cu 2021. E recorte di 12.6 porciento tabata un condicion di Conseho di Minister di Reino na 2021, pa por haya sosten di likides y ta conta ‘tot nader order’ (te ora cu yega na otro areglo). Conseho di Minister di Reino no a tuma decision pa reduci e recorte aki.

CAft ta sali di e punto di bista cu mester mantene e recorte, mirando e discusion entre Hulanda y Aruba riba sosten di likides y pa adapta e presupuesto tambe.

Otro cambio den presupuesto mester ta ahusta e gasto di servicio y producto na nivel logra di 2020.

RWZI

Tambe tin un suma den Presupuesto 2022 di 37 miyon pa inversion cu ta 16 miyon mas cu na 2021. CAft ta enfatisa pa limita inversion na inversion di reemplaso y otronan cu ta necesario pa implementacion di e landspakket. CAft ta spera un splicacion y argumentacion adicional pa e inversion presupuesta pa e planta di purificacion di awa, RWZI.

Manera a mustra caba, CAft ta bisa cu mester cobra e subsidio salarial di mas paga na 2020, pa un suma di 73 miyon florin y cu mester conclui e control pa 2021 pa mas tarda 1 di April 2022. Tur e sumanan aki mester bay den Presupuesto 2022.

Adaptacion den Presupuesto 2022

Pues, concretamente CAft ta conseha Gobierno, pa prome cu presenta e Presupuesto 2022 na Parlamento pa:

Ahusta e gasto di servicio y producto na e nivel (mas abou) di 2020;

Mantene e recorte di 12.6 porciento riba salario di trahadonan di sectornan publico y semipublico te ora cu Conseho di Minister di Reino dicidi otro;

Controla e pago di mas di subsidio salarial di 2021 y inclui locual mester cobra bek di 2021 tin un presupuesto complementario;

Mester duna miho bista con ta duna contenido multianual na reformanan di belasting, menciona den e landspakket, incluso introduccion di BTW y presenta un splicacion adecuado pa e consecuencianan riba presupuesto;

Draai bek e reduccion di e tarifa di loonbelasting of compensa esaki cu medidanan cu ta baha gasto of hisa entrada;

Argumenta inversion di 16 miyon pa e RWZI.

Finalmente, CAft ta enfatisa cu pa un ciclo di presupuesto y responsabilisacion cu ta funciona bon, ta importante cu e concepto di Presupuesto keda entrega na Parlamento conforme ley, pues no mas tarda cu September 1, pa asina por trat’e y aprob’e na ora.