Gobierno a baha su gasto di personal pa cumpli cu condicion di Hulanda pa haya sosten di likides. Pero e reduccion aki no ta locual mester a sosode. Pasobra College Aruba Financieel Toezicht tin e documento Beleidsplan Verlaging Personeelslasten, BVP, esta e Plan di Maneho di Reduccion di Gasto di Personal. Den su comentario riba e di tres Uitvoerings Rapportage, UR, esta e reportahe di ehecucion di e di tres kwartaal pa 2020, Caft a señala cu Gobierno no a haci nada cu e plan aki.

E comentario di Caft a trata diferente area di maneho publico, cu tin impacto riba e posicion financiero di Pais Aruba y kico mester haci pa atende cu e crisis real, esta cu Aruba ta cargando un debe nacional di practicamente 5 biyon florin.

Entradanan

Entradanan realisa den e di tres kwartaal a subi cu 227 miyon, cu ta nifica cu a realisa 73 porciento di e entradanan stipula den e cambio di Presupuesto pa e di tres kwartaal. E belasting directo a aumenta cu 92 miyon den e di tres kwartaal. Locual ta cana mas atras si ta e realisacion di pago di winstbelasting. A logra cobra 48 miyon florin di e 100 miyon cu a presupuesta como entrada di belasting riba ganashi. Segun Aruba, suma mas abou aki ta debi na e hecho cu a extende e fecha legal pa yena e formulario y di pago pa e belasting di ganashi 2019, cu seis luna, como parti di e Fiscaal Noodplan 2020 ( Plan Fiscal di Emergencia 2020). Aruba a informa cu kier stimula recuperacion economico a base di e plan aki, cu ta dirigi na baha e presion di belasting. Como tal ta spera di por cobra e parti mas grandi di e belasting riba ganashi den e di cuater kwartaal.

E belastingnan indirecto a aumenta den e di tres kwartaal cu 102 miyon florin. E aumento ta debi na cu Aruba a habri su espacio aereo, juli 1, cu a yuda genera entrada di turismo. Banda di esey a suavisa e medidanan diseña pa baha e plamamento di e coronavirus. Tur e pasonan aki a pone cu entradanan di tarifa di importacion y accijns a aumenta. E continuacion di e medidanan di sosten actual y e apertura di e espacio aereo tabatin un efecto positivo pa e belasting directo y indirecto. E expectativa ta cu e liña aki lo continua segun e cambio di presupuesto proponi.

Caft ta kere si cu e otro entradanan si lo ta mas abou. Aruba a indica cu esaki ta pa motibo di menos pago di retribucion, leges y derechonan, na un balor di 9 miyon florin y e erfpachten riba ganashinan cu no mester paga belasting riba dje, cu ta 10 miyon.

Ta pa e motibo aki Caft ta kere cu den e di cuater kwartaal lo tin menos entrada cu Gobierno a proyecta y ta urgi pa percura pa cumplimento di e pagonan, particularmente erfpacht.

Gastonan

E cantidad di gasto den e di tres kwartaal a aumenta cu 469 miyon. Cu esaki a realisa 63 porciento di e gastonan proponi den e Cambio di Presupuesto. Basa riba e ley aki, ta keda 744 miyon florin na gasto pa realisa den e di cuater kwartaal. Caft ta considera esaki hopi y ta constata cu compara cu e di tres kwartaal, ta keda cay atras. E motibo pakico Gobierno a haci menos costo den e di tres kwartaal tabata pasobra no a gasta mes hopi pa e loonsubsidie, producto y servicio cu a kere prome. Basa riba e puntonan aki y e patronchi di temporada di otro gastonan, manera di persona, interes y subsidio, Caft ta calcula cu pa e di cuater kwartaal tambe lo gasta menos. Caft asina mes ta keda para riba su conseho pa evalua e Cambio di Presupuesto pa mira unda por baha mas gasto.

Gasto di Personal

E gasto di personal total pa e di tres kwartaal ta yega na 327 miyon florin. Esaki ta igual na realisacion di 74 porciento di e gastonan di personal presupuesta pa 2020, cu ta 442 miyon florin. Esaki den liña cu e Cambio di Presupuesto unda a tene cuenta cu e reduccion di 12.5 porciento riba e salario y beneficio di e personal publico, na un total di 31 miyon.

Sinembargo manera a bisa den su ilustracion, Caft ta bisa cu e reduccion aki no ta consecuencia di e Beleidsplan Verlaging Personeelslasten, BVP. Es mas, e plan aki cu entretanto tin un di dos version (sin cu a comparti esaki cu Parlamento) no a produci mucho reduccion di gasto.

Por ehempel, e medida den e BVP, pa elimina e automatismo den periodieken y bevorderdering no a produci reduccion, pasobra no a ahusta e leynan y areglonan pa logra esaki. Caft ta pidi Gobierno pa implementa e medida aki mas lihe posibel y unda mester, percura cu e proceso legal cana mas lihe.

Por ehempel, for di e BVP a mustra cu ainda tin 5 miyon florin disponibel pa tuma personal pa vacaturanan habri. Caft ta conseha, den cuadro di maneha gastonan di personal, pa unicamente yena e vacaturanan cu ta esencial pa funcionnan crucial, manera na Centrale Accountantsdienst, cu ta necesario pa mehora e maneho financiero. Ademas, a tuma nota cu e gastonan di e overtolligheidspool a subi cu 0.6 miyon florin den e di tres kwartaal.

(red. Bon Dia Aruba a puntra Prome Minister Evelyn Wever Croes pa e BVP, pero te cu ciere di nos edicion no a ricibi esaki).

Servicio di capital

Tin un resultado positivo pa servicio di capital pa un suma di 4 miyon florin den e di tres kwartaal/ E entrada di capital a suma na 29 miyon y ta trata grandemente e asina yama depreciacion cu a bini liber. E gastonan di capital ta 24 miyon y ta consisti particularmente di financiamento di estudio cu a keda otorga. A presupuesta 40 miyon na gastonan di capital, pero a realisa unicamente 8 miyon den e di tres kwartaal. Mirando cu esaki ta un realisacion di unicamente 19 porciento, Caft ta premira cu e inversionnan lo ta mas abou cu locual a presupuesta. Aruba ta spera di por start cu inversionnan e aña aki ainda y ta den espera di un reaccion riba e splicacion di e inversionnan, cu a manda pa Caft hunto cu e Cambio di Presupuesto determina. Caft lo duna su punto di bista riba e calculacionnan di e presupuesto pa inversion den su conseho riba e Cambio di Presupuesto.

Necesidad di Financiamento y Desaroyo di Debe

E necesidad di financiamento di Aruba ta consisti pa un parti di e financiamento di e pagonan di debe y interes. Aruba a ricibi aprobacion di Conseho di Minister di Reino pa por refinancia e prestamonan y pago di interes cu mester keda concretisa na 2020. E sumanan ta di 362 miyon florin pa e prestamonan cu a caba y 221 miyon florin pa pago di interes. E suma total di 583 miyon a keda ahusta na 532 miyon florin. E motibo pakico e suma a baha cu 1 miyon ta pasobra e prestamonan di 66 miyon cu mester a keda paga, a keda extendi. Banda di esey, e gastonan di interes a sali 15 miyon florin mas halto cu a spera den e Presupuesto 2020. Pa por a financia esaki, Aruba a haci un prestamo internacional na 456 miyon florin y un prestamo interno di 61 miyon florin. Ta resta ainda 15 miyon florin pa refinancia.

E debe di Aruba a aumenta cu 313 miyon florin den e di tres kwartaal. E aumento ta consisti entre otro di e saldo di e pagonan y e prestamonan cu a haci den e di tres kwartaal pa por paga esakinan, cu a suma na 132 miyon florin. Banda di esey, Gobierno a saca bononan di 172 miyon florin den e di tres kwartaal, y e resto di e crecemento di debe ta pa motibo di aumento di debenan a corto plaso di 9 miyon florin.

E totalidad di debe di Aruba na fin di e di tres kwartaal ta suma 4.979 miyon florin. Pa por splica e cambionan aki, Aruba a duna un ilustracion nobo di e desaroyo di debe cu a permiti Caft haya un miho bista di e situacion.