CAft a duna su opinion riba e cifranan presenta pa gobierno di Aruba pa e promer tres luna di 2020. E cifranan di e promer periodo aki ta cana mas o menos segun plan, pero CAft ta preocupa cu no tin avance den tratamento di e cuentanan anual no aproba.
Den nan evaluacion ta tene na cuenta cu e crisis di coronavirus a pone e isla den un situacion sumamente dificil, manera ta e caso na tur pais. Esaki ta haci cu Conseho di Ministro di Reino a tuma e decision cu por desvia di e normanan stipula den e ley di supervision financiero (Laft) y e protocol di november 2018. Cuanto lo por desvia lo mester dicidi den e reunion di Conseho di Ministro di Reino di dia 3 di juli proximo. Den e contexto aki CAft a haci su evaluacion.
E organismo ta constata cu mester mehora calidad di e raportahe. Ta desea di mira mas splicacion cu ta ilustra desaroyonan y tambe ora ta desvia di e calculacionnan di e presupuesto. A mira cu den e lunanan analisa e realisacion di entrada di gasto pa gran parti a core den mesun linea cu e tendencianan di temporada, cu por a mira tambe den e añanan anterior. E saldo di financiamento a resulta den un deficit chikito di Afl. 2,3 miyon, resultado di un deficit di Afl. 9 miyon riba ‘gewone dienst’ y un surplus di Afl. 6 miyon riba ‘kapitaaldienst’. Esaki segun CAft ta principalmente consecuencia di e decision di gobierno pa no inclui den presupuesto varios medida cu lo a aumenta entrada den e version final di e presupuesto aproba. CAft despues a reacciona den su evaluacion di e presupuesto aproba y a pidi Aruba pa analisa cual di e medidanan di e reforma fiscal por tuma lugar ainda.
CAft ta comenta cu e crisis di coronavirus no tabatin tanto influencia ainda riba e resultado di e promer trimester, ya cu e medidanan pa cu esey a cuminsa na mitar di maart. Ta anticipa cu den e raportahe di e di dos kwartaal lo bin mas claridad riba efecto di e crisis riba presupuesto.
A base di e realisacion di e gastonan di personal den e trimester aki, ta anticipa cu por cumpli cu e norma di un maximo di Afl. 476 miyon na 2020. Sin embargo no por mira den e raportahe aki ki instrumento di e Plan di Maneho pa Gasto di Personal (BVP) con a usa e instrumentonan di e Plan pa logra controla gasto, motibo pa pidi mas aclaracion.
Tambe CAft ta haya cu riba varios tema pa cual a pidi atencion di gobierno, no a logra tanto avance ainda. Asina por ehemplo ainda no tin suficiente vista riba kico Stichting Overheid Accountantsbureau (SOAB) ta haciendo pa logra un declaracion aprobatorio (di accountant) pa aña 2020. Ta comprende cu e crisis ta tuma hopi atencion di gobierno, pero CAft ta kere cu mester keda traha riba e trayectonan di largo plazo di mehoracion. Di otro banda ta haya positivo cu Aruba a propone pa planea un sesion tecnico pa e proceso di e ‘nulmeting’ y e actividadnan di SOAB.
Entrada y gasto
Extra entrada a bin di impuesto riba dividendo, principalmente pa motibo di e reduccion di tarifa di 25 pa 10%, cu a corto plazo ta percura pa extra entrada. Hunto cu entrada extra di overdrachtsbelasting a mira aumento di 12 miyon florin den impuesto directo. Impuesto indirecto ta mustra un reduccion compara cu e mesun periodo di 2019. Esaki principalmente ta consecuencia di e caida di impuesto di importacion, a causa di e coronacrisis.
E realisacion di gasto tabata Afl. 319 miyon, 4 miyon mas halto cu den e mesun periodo di 2019 y solamente 15% di e total presupuesta pa 2020 (cu ta hopi mas grandi cu normal a causa di e presupuesto adapta pa e crisis).
Debe
Desaroyo di debe ta bastante, debi na e Afl. 1.647 miyon cu ta presupuesta pa e aña aki como financiamento necesario. Esaki ta consisti di e deficit di presupuesto di Afl. 1.285 miyon mas Afl.362 miyon pa refinancia e debenan cu ta madura. Den e promer parti di aña aki a paga Afl. 100 myon na debe a largo plazo y Afl. 64 miyon na interes. E debe total na fin di e kwartaal aki ta Afl. 4.311 miyon, sin conta aden e promer parti di e ‘liquiditeitssteun’ di Hulanda.
Atraso aprobacion cuenta anual
Aruba tin un atraso den proceso di aproba cuenta anual cu ta bira cada vez mas grandi, CAft ta haya. Tratamento di e cuentanan di 2917 y 2018 den parlamento no a tuma lugar ainda y e decision riba 2016 a keda wanta. Cu esaki Aruba no ta cumpliendo cu articulo 17 di Laft y ademas tampoco cu Comptabiliteitsverordening 1989. Pa 2019 e ciclo di responsabilisacion no ta cana bon, awor cu Aruba a indica cu e entrega di cuenta anual 2019 lo ta atrasa. Manera a ser pidi caba den e carta di CAft di 22 januari 2020, CAft ta ripiti cu “gran enfasis” pa haci tur cu ta posible pa logra aprobacion di e cuentanan di 2016, 2017 y 2018 y pa percura pa e ciclo di 2019 no haya mas atraso.
Nota di redaccion:
Den un articulo publica dia 05 di juni 2020 nos redaccion a comenta riba e cifranan di entrada di gobierno pa april, cu ta mustra en berdad un caida bastante grandi di 35% den impuesto compara cu april 2019, como consecuencia di e crisis actual.
