Entradanan ta keda atras, retraso den actividadnan di refineria y tambe crecemento atrobe di gastonan personal pa motibo cu a tuma mas hende den servicio di gobierno. Esaki e preocupacionnan di colegio di supervision financiero pa Aruba pa e prome kwartaal di 2017.
Banda di esaki gobierno no a cumpli cu ley y duna parlamento e rapport aki na tempo. Den nos editorial riba pagina 5 por lesa mas riba esaki.
E organo di supervision financiero a expresa como conclusion general su preocupacion pa e entradanan di gobierno den prome tres luna di aña. E ‘exploitatierekening’ ta mustra un deficit di Afl. 75,1 miyon, mientras cu e ‘kapitaaldienst’ ta mustra un saldo positivo di Afl. 4 miyon, pa un total di Afl. 71, 2 miyon negativo. Un saldo positivo di Afl. 19,5 miyon di e resto di e sector colectivo, entidadnan manera AZV, SVb, etc. a percura pa un deficit di Afl. 51,6 miyon , loke ta 1,1% di GDP. Esaki ta considerablemente mas halto cu e 0,5% di deficit cu ta e meta pa 2017.
E cifranan pa e trimester aki ta duna un imagen un poco incomun, pasobra por ehemplo entrada di winstbelasting ta sumamente abao compara cu e suma total anticipa pa henter aña. Esaki debi na e hecho cu e deadline pa pago a move pa fin di mei, causando cu e mayoria di pago di e impuesto aki lo cay den e periodo prome cu e fecha ey. No tin motibo pa anticipa cu pa henter aña e entrada total lo ta desvia di e proyeccion den presupuesto, segun CAft.
Menos entrada di impuesto
CAft ta observa sin embargo cu loonbelasting y BBO a keda atras compara cu loke a anticipa, aunke den ambos caso entrada tabata mas cu den e mesun periodo di 2016. Loonbelasting tabata 6%, y BBO 10% mas cu aña pasa den e periodo concerni. Sinembargo, CAft ta observa cu gobierno a pone den presupuesto un aumento di 19% pa loonbelasting y 32% pa BBO. E aumento grandi aki ta basa riba miho cobransa y di otro banda riba extra entrada a base di e rehabilitacion di e refineria.
CAft ta señala cu aña pasa caba nan a conseha pa raporta na tempo, den caso cu tin diferencia entre e presupuesto y e cifranan realisa, tanto den sentido positivo como negativo, pa por procesa esakinan den un cambio di presupuesto. Mirando e situacion actual CAft ta mantene e conseho aki. E entradanan menos cu anticipa di loonbelasting y BBO ta parce di ta relaciona cu e retraso cu CAft ta constata den e actividadnan den cuadro di e modernisacion di e refineria. Pa motibo di esaki mayoria di e inversionnan lo surti efecto mas laat den aña. Den e cuadro aki CAft ta pidi gobierno di Aruba pa duna un indicacion di e impacto di e retraso riba presupuesto y comunica esaki na e cuerpo supervisor.
Gasto personal
Tambe CAft ta expresa su preocupacion pa e desaroyo di gasto di personal, unda ta señala cu esakinan a cuminsa aumenta atrobe, tambe como consecuencia di un cantidad creciente atrobe di funcionario den servicio di gobierno. Cu esaki, a elimina atrobe e beneficionan di e reduccion modera di cantidad di personal na 2016, y a perde bista riba logra e compromiso existente di yega na baha gasto di personal cu 5% tur aña.
Prestamonan
Pa loke ta e prestamonan necesario pa cubri e necesidadnan pa 2017 pa cual gobierno tin un aprobacion di parlamento pa fia Afl 439 miyon, mientras tanto a tuma luga caba dos prestamo di bono di cada un Afl. 125 miyon, en total Afl. 250 miyon riba mercado local. E prome prestamo haci na februari ta cay den e reportahe di e kwartaal aki. E ultimo haci na april tin un interes historicamente abao di 4%, segun CAft. Na juni y augustus venidero ta anticipa cu e siguiente prestamonan lo tuma luga. Cu e prestamo haci den e kwartaal aki, debe ta yega na Afl. 4086 miyon, cu ta 84% di GDP, e ultimo aki segun calculo di Banco Central. Banda di esaki CAft ta señala cu e debenan riba corto plaso a subi den prome kwartaal di Afl. 109 miyon te Afl. 124 miyon. A pesar cu a atrae e prestamo di bono menciona na februari y cu a haci solamente Afl. 23 miyon na pago di prestamo madura, e posicion di likides a empeora pa fin di maart di -Afl. 23 miyon pa -Afl. 33 miyon. CAft ta considera esaki preocupante.
