Colegio supervision financiero Aruba (CAft) tin un conseho urgente pa gobierno: stop cu mas proyectonan di PPP. Esaki ta proyecto financia cu placa priva y publico. Manera Green Corridor y renobacion di hospital.
Awor e colegio ta urgi gobierno di Aruba pa introduci un blafon di 1.5 pa 2% di e gastonan total pa bay na pago di e proyectonan aki. E norma aki ta mas halto cu esun internacional y tambe hopi mas halto cu esun di Hulanda, asina presidente di CAft, Age Bakker, ta splica. Pero nan ta tene cuenta cu Aruba ta un isla chikito y tin biaha mester di proyecto grandi asina. Pero nos no por keda haci proyectonan sin fin, pa motibo di e gastonan cu ta pisa duro riba e presupuesto. Y no solamente riba e presupuesto awor, pero tambe pa un periodo largo, di 20 pa 30 aña. Awor tin 4 proyecto caba pa un suma di 64 miyon florin cu ta pisa structuralmente riba e gasto publico. Ya cu esaki Aruba ta surpasa e norma di e blafon recomenda. P’esey CAft ta conseha gobierno pa no bin cu mas proyecto di PPP.
E conseho ta na Conseho di Minister awor pa un decision. Pero segun CAft ya e minister di Financia di Aruba a indica cu e conseho aki ta uno ‘valioso’.
Riba rumbo
CAft tambe ta conclui cu te awor e presupuesto 2016 ta riba rumbo aunke ainda tin cierto riesgo. E reapertura mes no tin mucho efecto riba e esaki. E ta un alivio extra, segun CAft, pero no necesario pa gobierno cumpli cu e norma di deficit di 2%. Tin 2 riesgo cu nan si ta señala: e gastonan personal y eson di AZV. E cantidad di ambtenaar ta bahando, sinembargo e colegio ta wak cu esaki no tin su efecto ainda riba e gasto.
Mas informacion por lesa den e relato di CAft aki. (na Hulandes y Papiamento)
