Den un carta dirigi na ministro encarga cu Finanzas, Asunto Economico y Cultura, Xiomara Ruiz-Maduro, e presidente di e Colegio di Supervision Financiero pa Aruba, prof. Dr. Raymond Gradus, a informa e mandatario cu, en bista di e situacion cu a surgi despues di e modificacion haci siman pasa diahuebs den e ley di supervision financiero (LAft), e organismo di supervision no ta haya oportuno pa continua cu e bishita di trabao, cu tabata planea pa dia 27 y 28 di juni venidero. E medio Noticiacla tabatin e carta, cu ta fecha dia 12 di juni 2019, ayera tardi caba como primicia riba nan website.
Como argumento, CAft ta mustra riba e hecho cu den e Protocol entre Aruba y Hulanda, firma dia 18 di november 2018, a keda acorda cu e ley cambia no ta bay na vigor prome cu tin un acuerdo tocante esaki den Conseho di Ministro di Reino. Vigencia di e ley modifica aki lo cambia e posicion y e papel di Conseho di Ministro di Reino fundamentalmente, y lo pone un fin na supervision di Reino via e organismo acorda conhuntamente, CAft.
Te na e momento aki no tabatin, asina leu cu nos ta informa, un reaccion di gobierno Hulandes, cu anteriormente a laga sa cu ta studiando e cambionan haci den e ley. Tambe na e momento aki no ta conoci ainda si Gobernador lo firma e ley den su forma nobo, despues di e aprobacion siman pasa pa e fraccionnan cu ta sostene gobierno: MEP, POR y RED.
Basicamente e cambionan haci den e ley, un total di 40, ta elimina e papel supervisor di Conseho di Gobierno di Reino y ta pone parlamento di Aruba na su luga como supervisor, na cual, segun e ley manera el a keda modifica, CAft lo mester duna cuenta. Cu esaki e ley manera el a keda cambia, no ta contempla e posibilidad pa Conseho di Ministro di Reino tuma accion pa instrui gobierno di Aruba pa cambia presupuesto.
