Gobierno Hulandes ta bisa cu e no ta e trabou di e colegio di supervision financiero di Aruba (CAft) pa analisa e riesgonan di e reapertura di e refineria na San Nicolas.
Esaki secretario di estado Raymond Knops ta informa Tweede Kamer (parlamento Hulandes) den un carta di contesta di 6 november. E ta referi na un reunion aña pasa juni unda parlamentarionan a pidi pa un calculacion y analisis. Na december presidente di CAft e tempo ey, esta Ange Bakker, a bisa prensa na Aruba cu e colegio lo haci esaki a base di un analisis di gobierno mes cu ya a pidi na augustus.
CAft a bisa cu pa nan por evalua e ‘grado di realidad’ di e presupuesto 2017, nan mester un analisis di e riesgonan di e proyecto di refineria. “Mi ta kere e ta hopi importante pa esaki tambe lo sali den un forma transparente y si tin riesgonan constata, gobierno lo indica kico lo haci pa e riesgonan no lo manifesta. Luna pasa nos a ricibi un concepto di e analisis aki y por a duna nos comentario. Awor nan ta trahando riba esaki. Mi tin tur confiansa cu otro siman e analisis lo ta cla. Tambe nos a urgi gobierno pa manda e analisis pa parlamento como cu asina esaki lo sali di biaha den e dominio publico”, asina presidente Bakker a contesta riba preguntanan di Bon Dia Aruba aña pasa december.
Pero despues a keda basta keto y awor gobierno Hulandes mes ta indica cu e no ta necesario mas. Como cu un calculacion no ta cay bou di e tareanan di e colegio di supervision. E unico cu e organo aki mester haci ta wak si e consecuencianan di e reapertura di e refineria ta funda den e presupuesto y si e presupuesto ta cumpli cu e normanan stipula, asina e secretario ta bisa den su carta.
