CAft no mester di stoel… Di ministro pa por papia cla…

Den e siman nos tras den un rueda di prensa nos ministro encarga cu finanzas publico a duna un respuesta riba e conseho cu el a ricibi di CAft, cu no a laga nada di duda kico e mandatario ta pensa di e colegio di supervision. E ta haya cu nan (CAft) kier sinta riba su stoel, bisando cu esaki cu e organismo ta laga su posicion di consehero bay pa asumi un posicion incorecto di kier impone riba gobierno.

Aparte di e opinion di e mandatario cu e colegio a asumi un papel cu no ta coresponde na nan, ta logico pa tira un vista riba loke di berdad CAft a trece dilanti. No tur hende ta bay riba e website di C(A)FT pa lesa henter e carta di mas di 10 pagina, pesey nos a facilita den e edicion aki e recomendacionnan sintetiza di CAft mes. Cada ken huzga pa nan mes si e mandatario tin razon of no. Mas interesante, y importante, ta sin embargo e puntonan treci dilanti pa CAft, di cual hopi di nan ta data di aña 2018. Pa e mandatario esey tabata motibo pa descarta nan como noticia bieu, o manera nan ta bisa na Hulandes, “ouwe koeien uit de sloot halen”. Pero e motibo pa menciona nan ta pasobra nan ta punto no cumpli ainda, cu ta parti di e discusion andando actualmente cu gobierno. Por ehemplo, tocante e nivel di gasto di personal e protocol ta menciona e suma di Afl. 479 miyon como maximo, pero tambe ta bisa cu cada aña e presupuesto mester mustra un reduccion nominal compara cu e aña anterior. Ademas, gobierno mes a bin cu e plan pa reduccion di personal (BVP) di cual te awe no a ehecuta nada… Manera treci dilanti mas biaha den e Editorial aki, ni sikiera gobierno a considera pone un paro na e aumento automatico di salario, cu ta un estorbo grandi pa por wanta gasto di salario na un cierto nivel. E asunto aki ta bolbe bin dilanti den e Uitvoeringsagenda, acorda como preludio pa introduccion di COHO, sin cu te awe gobierno ta move un dede, pa no papia mes di e demas medidanan. Pues, structuralmente no ta sucediendo nada riba e tereno aki.

Gobierno di su banda ta mustra cu nan a baha gasto, a traves di e recorte di salario. Y ken tabata promer pa ‘bringa’ pa kita e reduccion di salario aki? Cu esey, gobierno mes ta indicando cu e reduccion tabata algo temporal, pues ningun aporte na un maneho di limitacion structural di gasto. Den e sentido aki gobierno no ta cumpliendo cu e protocol di 2018. Lo por tin hende cu ta bisa cu no ta un problema pa e gastonan di personal subi, basta no ta pasa e limite di Afl. 479 miyon menciona. Ta parce bunita, pero ta realiza cu e aña aki so caba nos tin un deficit di mas di 230 miyon, placa cu mester fia pa paga despues. Ademas, y esey tambe ta algo cu CAft ta critica den su conseho, cu ta te na aña 2026, despues di eleccion 2025, gobierno ta pretende yega na un surplus riba presupuesto. Den e añanan aki, di 2023 te 2026, e pretension ta pa fia un extra di mas di Afl. 480 miyon, aparte di e debe cu ta laba laba 6 biyon florin caba… Y mientras tanto, gasto di personal ta sigui crece, igual bienes y servicios, pasobra gobierno no tin ningun intencion di economiza, y riba esey no kier pa ningun hende bisa nada…?

Nos ta kere cu aki si e mandatario ta mal equiboca, bisando cu nan kier sinta riba su stoel. Nan no mester di e stoel ey pa nan haci loke nan mester haci, y esey ta pasobra nan propio stoel ta exigi di nan pa haci nan trabao, esta controla finanzas di gobierno. Nan no ta un simple consehero di gobierno, cu mester duna conseho y despues mira cu gobierno, si nan santo gana ta dicta esey, ta benta e conseho den bari di sushi. Nan ta consehero na promer lugar di Gobierno di Reino, pa conduci e supervision financiero cu a keda introduci na 2014/2015. Cu tabatin otro gobierno no ta relevante, esun cu ta sinta awor mester atende e asunto.

Interesante ta mientras tanto tambe cu CAft a pidi un splicacion di gobierno con nan a yega na e calculacion di e mas o menos 160 miyon florin extra cu introduccion di BTW mester trece den caha; un pregunta cu redaccion di Bon Dia Aruba a haci tambe na CAft, cu aparentemente na e momento ey tampoco tabatin claridad riba esaki. Gobierno por trece henter un show di supuesto consulta cu e gremionan sin berdaderamente duna nan nada concreto, pero aki ta trata di otro wega di otro nivel. Den su carta di conseho CAft ta indica caba cu respuesta insatisfactorio di gobierno por conduci na un notificacion di gobierno di Reino, cu un eventual ‘aanwijzing’ como conseho. Mirando e contenido di e carta nos no por conclui nada otro cu e colegio ta haciendo e trabao pa cual el a keda institui. Ta parce cu nos mandatarionan ta keda cu dolor di intestino pa e realidad di e supervision financiero, cu no ta bay desaparece por arte de magia. Goberna drechi, y ningun hende ta purba sinta riba bo stoel.