CAft: Mehoracion den administracion financiero, pero por mas; Gobierno mester sigui baha gasto di personal

Den nos edicion di ayera a publica e promer parti di e evaluacion di e organo di supervision financiero CAft di e raportahe di trimester 1 di 2021. Seguidamente aki e parti concluyente di e evaluacion.

Gasto

Gastonan pa e periodo evalua ta Afl. 437 miyon, 23% di e presupuesto 2021. Esaki ta Afl. 118 miyon mas cu aña pasa, y ta relaciona cu e gastonan di apoyo financiero di diferente forma relaciona cu e crisis di Covid-19. CAft a recomenda pa baha e presupuesto a base di e gastonan na 2021, loke no a sucede ainda, y ta kere cu e gastonan lo mustra mas positivo ainda si haci esaki. Tambe CAft ta anticipa menos gasto di e areglo di TIO pasobra esaki ta bin na vigor mas laat cu tabata e planificacion y tambe a base di menos gasto relaciona cu e areglo pa empresa mediano y chikito (MKB), relaciona cu mehoracion economico.

Gasto di personal maximo segun e protocol di 2018 ta Afl. 479 miyon. Realisacion di e gastonan aki pa 2020 tabata Afl. 428 miyon, cu ta inclui e reduccion di salario y condicion laboral di 12,6% di personal di gobernacion. E protocol segun CAft ta stipula cu gobierno di Aruba mester logra un reduccion anual nominal di gasto di personal. Den e actual presupuesto tin proyecta Afl. 431 miyon na gasto di personal, cu consecuencia cu segun CAft gobierno no ta cumpli cu e norma aki. Caft ta observa cu a logra cumpli cu e norma aña pasa a traves di e reduccion di solidaridad, pero cu implementacion di e BVP ta kedando atras. CAft ta haya cu pa yega na sanacion di finanzas publico e reduccion ey ta indispensable. Tambe e entidad ta mustra riba e valor informativo insuficiente di e BVP den e raportahenan financiero y e falta di claridad tocante cual instrumentonan den e BVP ta ser usa pa bay den direccion di un reduccion di e gastonan di personal.

Den e promer reportahe di e aña aki (UR-1-2021) pa promer biaha a cuantifica e medidanan di e BVP, loke a mehora e vista riba uso y resultado di e medidanan compara cu e ultimo raportahe di 2020. Pero e resumen ta a base di kwartaal y no tin claridad si ta orienta activamente riba e medidanan. Por lo tanto CAft no por evalua kico e efectonan anual lo ta di e medidanan di e BVP riba gasto di personal. E cambionan den e gastonan di personal di presupuesto 2021 pa CAft ainda no ta suficientemente cla pa entre otro por monitor e austerisacionnan den cuadro di e BVP y e reduccion di 12,6% riba condicion laboral di e ambtenaarnan. CAft ta conseha, manera den su conseho riba e cuentanan anual 2016-2018, pa fortifica administracion di gasto di personal.

E capitulo di capital ta mustra un saldo positivo pa trimester 1-2021, di Afl. 6 miyon. A ricibi 9 miyon y a paga 3 miyon, e ultimo aki principalmente prestamo pa estudio. Tin Afl. 16 miyon presupuesta pa inversion na 2021, di cual no a usa nada durante e trimester revisa aki. CAft ta kere cu posiblemente lo no tin suficiente tempo pa realisa e inversionnan programa completamente den loke ta keda di aña, tambe en vista di cu no tin un presupuesto aproba ainda.

Sector Colectivo

Cada dos aña segun e protocol Aruba-Hulanda di 2 di mei 2015, articulo IX, mester fiha e sector colectivo pa e proximo dos aña, promer cu 1 di april. Aña pasa no a stipula e sector colectivo pa 2021 y 2022, motibo pa cual CAft ta conseha pa haci esaki mas pronto posible. Esaki mester sucede den colaboracion cu CBS Aruba y CBS Hulanda. CAft ta observa tambe cu den e raportahe 1-2021 ta proyecta un deficit di Afl. 90 miyon pa SVb, mientras den e presupuesto 2021 ta menciona un deficit di Afl. 12 miyon, pasobra ta contempla uso di propio fondo di SVb pa compensa parti (grandi) di e deficit, ademas di un perspectiva mas faborable pa recuperacion di economia na 2021 di gobierno mes. CAft den su tabel acompañante a inclui e coreccion aki di SVb caba.

Financiamento y posicion di debe

Den presupuesto 2021 ta aparece un necesidad di financiamento di Afl. 1.138 miyon, cu ta consisti di Afl. 878 miyon di (deficit) di presupuesto y Afl. 261 miyon pa refinancia debe cu ta madura. Den e lunanan evalua a paga Afl. 4 miyon na debe y Afl. 61 miyon na interes. Den e mesun periodo debe a aumenta cu Afl. 64 miyon. E aumento ta resulta entre otro di e saldo di prestamo y pago riba debe madura. E prestamonan nobo ta inclui e asistencia di liquidez di Afl. 71 miyon y debenan a corto plazo di Afl. 37 miyon.

Debe total na fin di trimester 1-2021 ta Afl. 5.209 miyon (incluyendo tranche 1 te cu 4 di asistencia di liquidez . E corelacion debe/GDP ta keda na 123% (2020: 124%), unda a tuma como punto di salida e GDP nominal manera calcula pa Banco Central di Aruba.