Ayera tardi a tuma luga e prome conferencia di prensa cu e presidente nobo di CAft, Lidewijde Ongering, hunto cu otro dos miembro. Entrante dia 1 di februari 2023 a nombra Sra. Ongering como presidente di e Colegio di supervision financiero di Aruba (CAft), Colegio di supervision financiero di Corsou y Sint Maarten, y Colegio di supervision financiero di Boneiro, Saba y Sint Eustatius.

CAft a bishita Aruba dia 9 y 10 di februari y durante su bishita el a hiba combersacion cu Gobernador di Aruba, Minister di Finanzas y Cultura, Minister di Turismo y Salud Publico, Minister di Transporte, Integridad, Naturalesa y Asunto di Hende Grandi, Conseho di Minister y Parlamento di Aruba.

Durante a conferencia CAft a elabora ariba algun punto di importancia pa Aruba y prome punto cu e toca riba dje ta presupuesto y desaroyo economico di Aruba. Recuperacion di economia na Aruba ta sigui y turismo ta back na e cifranan di prome cu e pandemia a yega e isla.

Den 2022 economia a crece cu 12%, segun e ultimo calculonan di Fondo Monetario Internacional (IMF). Pa 2023 ta spera un crecemento di 5% y door di, entre otro, e recuperacion economico fuerte aki y e medidanan fiscal anuncia, ta spera un surplus presupuestario di 1% di e producto interno bruto (PIB) na 2023.

Esaki ta un cambio positivo, CAft ta indica, considerando e impacto di e crisis di pandemia durante e ultimo añanan. Nan ta remarca cu ta importante pa Aruba probecha di e impulso aki pa reduci e debe publico di 5.700 miyon florin na un nivel sostenibel.

Pa logra esey Aruba mester spaar adicionalmente banda di aumenta entrada y cobertura incidental. Reforma structural di cuido di salud y seguridad social ta percura pa mas resiliencia. CAft a pidi atencion pa esaki durante su bishita na Aruba dia 9 y 10 di februari 2023.

Di otro banda, aunke e recuperacion economico di Aruba ta bayendo den bon caminda y ta spera un surplus di 1 porciento di e PIB na 2023, e organismo ta indica cu tin algun risico importante pa menciona pa loke ta trata presupuesto.

Primeramente, e presidente nobo di e organismo a menciona, ta cu e presupuesto ta basa ariba un calculacion di crecemento optimista, y a pesar cu optimismo ta un bon vision, mester sigura cu esaki ta uno factibel tambe.

Den e presupuesto ta inclui tambe algun ingreso ocasional, manera por ehempel e subsidio di costonan salarial y despues di aña 2023 esaki no lo ta e caso mas y e presidente ta resalta cu ta importante pa tene bon cuenta cu esaki tambe.

Lidewijde ta menciona tambe cu den presupuesto tin un fuerte risico di tasa di interes como resultado di e refinanciamento cu Aruba tin y esaki combina cu e desaroyo di tendencia di aumento di interes rond mundo. El a splica cu esaki ta pone un presion enorme ariba e presupuesto di Aruba ya cu 20% di e presupuesto ta bay na pago di e interes aki.

P’esey e organismo ta indica ta importante pa Aruba tuma paso pa logra finanzas publico sostenibel. Presupuesto di 2023 ta cumpli cu e norma presupuestario y esey ta un prome paso den bon direccion, pero pa mantene e tendencia aki y logra surplus mas halto den e añanan binidero, mester medida adicional.

“Importante ta pa Aruba spaar structuralmente mas, na 2023 caba, y no warda te na 2024 pa haci esey, manera ta propone den e presupuesto. E Pakete di Medida (Landspakket) ta sirbi como guia pa esaki, manera aumento di habilidad di entidad gubernamental, manera Serlimar y Arubus N.V., pa mantene nan mes financieramente.”

Pa loke ta e topico di impuesto, CAft ta remarca cu entrada fiscal di Aruba por subi significativamente, si mehora cumplimento fiscal. Nan ta recomenda pa tuma medida diligentemente al respecto pa no solamente ta contribui na mehoracion di finanzas publico, sino tambe na distribucion mas balansa di presion fiscal. Den e contexto ey CAft ta recomenda pa reconsidera introduccion di impuesto riba tip.

Den liña cu e obhetivonan di e Pakete di Medida, Aruba ta trahando pa simplifica e sistema fiscal. Pa logra un surplus di por lo menos 1% di e PIB den 2023, CAft ta recomenda pa cuminsa e proceso legislativo pa cobra impuesto riba volumen di benta (BBO) na frontera mas pronto posibel. Lidewijde a indica cu e plan ta pa na luna di juni di e aña aki introduci esaki.

Tambe, den liña cu recomendacion anterior di IMF, CAft ta anima Aruba pa simplifica e sistema di impuesto indirecto y sigui cu introduccion di impuesto riba balor añadi (iba), manera a anuncia anteriormente.”

E presidente di a organismo a toca tambe e punto di inversion. El a splica cu pa haci economia di Aruba mas resiliente y pa aumenta su capacidad pa genera entrada, ta necesario pa inverti. El a remarca cu IMF tin un norma pa loke ta trata sumanan presupuesta pa inversion cual ta alrededor di 3%. Si traduci esaki den e presupuesto di Aruba, el a sigui splica, e suma lo ta alrededor di 180 miyon florin y pues suma presupuesta pa inversion den 2023, 20 miyon florin, ta mucho abao.

El a agrega tambe cu nan a tuma nota cu hopi biaha den loke ta ehecucion di inversionnan ta keda atras pa loke ta plannan y na final en realidad menos inversionnan ta wordo realisa.

“Inversion specifico den, por ehempel, infrastructura y proyecto di mitigacion y adaptacion na cambio climatico, ta contribui na crecemento economico sostenibel. CAft ta anima Aruba pa elabora un plan di inversion plurianual.”

Ultimo punto cu CAft a elabora riba dje ta cuido di salud y seguridad social, cual ta keda un punto di atencion importante. Danki na e bon desaroyo economico, e situacion a bira un poco miho. Aruba a tuma varios medida caba pa mehora e situacion financiero di e sistema social, manera reduci gasto di e lista positivo.

El a remarca cu Minister di Salud Publico mester tuma medidanan structural pa mantene e gastonan den cuido manehabel. Tambe door di desaroyo demografico, gasto den cuido y den pensioen di behes lo aumenta mas lihe cu entrada y, si no cambia e maneho, pronto lo tin deficit. sobre todo aki na Aruba, cu tin un dubbele vergrijzing (envehecimento).

“Pues, mester mira economisacion den cuido y seguridad social den e perspectiva plurianual aki. Ta necesario pa tuma medida awor pa garantisa cu e sistema social ta pagabel pa e generacionnan futuro tambe. Den e contexto ey CAft ta anima Aruba pa yega na calculacion plurianual bon funda pa desaroyo di gasto den cuido di salud.”