Colegio pa supervision financiero di Aruba (CAft) a entrega nan evaluacion di e tercer informe pa aña 2019 di gobierno di Aruba, cu ta cubri e operacion financiero di gobierno pa e lunanan juli, augustus y september 2019.

Principal elemento di evaluacion ta e normanan concerta den e protocol di november 2018, cu ta un saldo negativo di no mas di 0,5% di GDP, y un total di gasto di personal cu no ta sobrepasa Afl. 479 miyon. Si tin extra entrada no programa (‘windfall revenue’; ‘meevallers’), anto mester usa esaki completamente pa reduci deficit. ‘Tegenvallers’ tambe tin; e informe di gobierno mes ta señala por ehemplo e accionnan pa cobra impuesto pendiente cu pa fin di aña lo yega na 50% di loke tabata presupuesta, cu tabata Afl. 66,9 miyon. Tin sin embargo e ‘meevallernan’ pa compensa esaki den otro tipo di impuesto.

CAft ta constata cu den linea general realisacion di presupuesto ta manera programa. E saldo negativo pa henter e sector ‘colectivo’ pa 2019 por yega na apenas Afl. 0,6 miyon cu ta casi 0% di GDP, di manera cu den esaki gobierno di Aruba ta cumpliendo y CAft ta anticipa cu lo cera aña 2019 bao di e norma di 0,5% di GDP di deficit.

Entrada di gobierno den e prome tres trimesternan en general ta canando manera anticipa, pa un total di Afl. 1065,5 miyon, loke ta 74,9% di e total presupuesta pa e aña (Afl. 1422,6 miyon). Compara cu e mesun periodo di 2018 e entradanan ta marginalmente mas halto cu loke a mira den ultimo añanan. CAft ta señala algun desviacion remarcable. Un di nan ta grodbelasting cu no a trece aden loke tabata pronostica, pasobra e cobranzanan a sali laat. Di otro banda, dividendbelasting a rindi bastante mas, Afl. 18,5 miyon loke ta 15,1 miyon mas cu e mesun periodo di 2018. Esaki impulsa pa e reduccion temporal di e tarifa di 25% pa 10% cu a ocasiona e aumento aki di 455%.

E gastonan den e mesun periodo tambe a keda dentro di e limitenan indica pa presupuesto. Esakinan a alcansa Afl. 1.011,3 miyon y ta igual na 70,9% di e total na gasto pa 2019: Afl. 1.427,0 miyon. Gastonan di interes a desaroya manera anticipa, cu Afl. 184,5 miyon paga den tres cuarto di aña, 79,4% di e total na compromiso di interes (Afl. 232,3 miyon).

Gasto di personal.
Pa loke ta e gastonan di personal, esakinan lo ta Afl. 478,7 miyon, sin inclui e gastonan di personal di e Plan di Crisis Social. E gastonan di e plan aki ta presupuesta na Afl. 4,6 miyon, di cual te cu 21 di november a usa Afl. 2 miyon. CAft ta keda mantene su posicion cu e gastonan di e plan mester ta inclui den gastonan di personal general di gobierno. Gobierno di Aruba a yega na un acuerdo cu gobierno di Reino cu no ta enfoca riba 2019 mas y cu pa 2020 e gastonan di e plan mester ta inclui den gasto di personal.

E informe di gobierno mes, riba cual Caft ta reacciona, ta duna un resumen di e cantidad di personal cu e ministerionan tin emplea pa fin di september. Esaki ta 3.801 total pa e ministerionan, plus 922 persona den enseñansa y 45 na Kustwacht. (No ta inclui aki e personal di Staten, Raad van Advies, Rekenkamer, DOW y e sector subsidia). Por fabor consulta e resumen acompañante.

Sector colectivo.
E saldo di financiamento di e sector colectivo pa 2019 a mehora compara cu e raportahe anterior pa motibo di un pronostico mas faborable di entrada y gasto di AZV y di ATA. E pronostico pa 31 di december 2019 ta 0%, pero ta contene ainda un conteo doble di dividendo di ATA. Sin esaki e resultado pa 2019 lo ta Afl. -21,3 miyon, loke ta -0,4% di GDP, dentro di e norma stipula. Si usa otro metodo pa evita e conteo doble, e saldo lo ta Afl. -15,6 miyon (0,3% di GDP). Por observa cu entre e entidadnan concerni Serlimar ta destaca cu un deficit bastante grandi cu pa fin di aña por ta Afl. -5,1 miyon. Di tur manera, ta practicamente sigur cu Aruba lo cumpli cu e normanan stipula pa 2019 pa loke ta concerni e deficit .

Debe publico.
Pa 2019 tabatin un necesidad di financia Afl. 282,2 miyon , di cual Afl. 24,8 miyon pa cubri e deficit di presupuesto y Afl. 257,4 miyon pa refinancia prestamonan cu a vence. Den tercer trimester a fia Afl. 147,4 miyon, y cu esaki debe total a bira Afl. 4.319,2 miyon. Compara cu trimester dos, debe total a baha cu Afl. 67,3 miyon. E total cu a fia ta keda dentro di e limite aproba pa parlamento.

Presupuesto complementario.
CAft ta confirma cu a ricibi e ‘Najaarsnota’ y e proyecto di ley di cambio di presupuesto. Esaki ta encera extra gasto pa un suma di Afl. 17 miyon, cubri pa entrada no anticipa di Afl. 18 miyon. CAft ta haya cu esaki no ta segun e reglanan di e protocol, unda no por usa ‘meevallers’ pa cubri gasto extra. Den su conseho riba e ley complementario di cambio di presupuesto, CAft lo atende e tema aki.