CAft: Gobierno no ta cumpli cu obligacion di reportahe financiero; Retraso den entrega di ‘kwartaalrapportage’ 2023

Colegio di supervision financiero CAft recientemente a publica riba nan website e contesta cu e organismo a manda pa gobierno, como respuesta riba e presupuesto complementario 2023, aproba pa Staten.

CAft ta cuminza na constata cu e presupuesto adapta ta contempla un surplus (pa e sector colectivo) di Afl. 111 miyon na lugar di Afl. 63 miyon den e presupuesto original. Cu esaki ta cumpli mihor ainda cu e norma di surplus di 1% di GDP (Afl. 6.937 miyon pa 2023; red.), cu e actual 1,6%. Ta recorda gobierno tambe cu e aumento mester ta destina na amortizacion di debe y na posible inversion.

Gobierno no ta reporta adecuadamente

CAft no a keda sin menciona cu actualmente gobierno di Aruba no ta cumpliendo cu e requisito legal cu e informe financiero di cada tres luna (‘kwartaalrapportage’) mester ta entrega na CAft (y Staten) dentro di seis siman despues di termino di cada periodo di tres luna. Segun CAft, ainda no a ricibi e informe corespondiente na e segundo trimester, cual lo mester tabata entrega pa mitar di augustus. (E retraso ta afectando tambe informe nr. 3 cu mester tabata entrega pa mitar di november 2023; red.). E cifranan riba cual e presupuesto modifica ta basa, ta coresponde na kwartaal 1-2023. CAft ta urgi pa actualiza e cifranan cu e resultadonan mas reciente.

Interes mas halto

Banda di e entradanan mas halto pa 2023, CAft ta señala cu mientras tanto a bira conoci cu Aruba lo ta pagando un porcentahe mas halto riba e prestamonan cu Hulanda, di 6,9%, mientras a presupuesta a base di 3,5%. Esey ta haci cu mester coregi e gastonan di interes cu ta bira casi 100% mas (Afl. 63 miyon envez di Afl. 32 miyon; red.). Ta urgi gobierno pa inclui e gastonan aki y pa busca forma pa absorbe e resultadonan negativo aki. Gasto inespera (‘tegenvallers’) no por ser cubri cu beneficio inespera (‘meevallers’) pero mester haya ahustacion dentro di e presupuesto.

Gasto di personal aumentando

Segun CAft, gobierno no ta cumpliendo cu e normanan di e protocol, en vista di e aumento den e presupuesto modifica, compara cu aña 2022. Segun e norma, e gastonan nominal mester ta baha aña tras aña, loke no ta e caso. Ta conseha gobierno pa tuma e medidanan corespondiente pa logra cumpli cu e norma. Na 2022 gasto di personal tabata na Afl. 426 miyon. Cu e coreccion pa e reduccion salarial, e gastonan di personal na 2022 tabata Afl. 465 miyon y pa 2023 tabata aparece den e presupuesto original na Afl. 460 miyon. Segun e presupuesto nobo modifica e gastonan salarial a aumenta cu Afl. 7 miyon te Afl. 467 miyon, mas tanto pa via di aumento di compensacion pa overtime (4 miyon), y gasto di personal relaciona cu e ‘Landspakket’ (Afl. 2 miyon).

‘Najaarsnota’ cu entrada mas halto

CAft ta señala tambe cu dia 17 di october 2023, un dia antes di manda e contesta aki, fecha 18 di october 2023, a ricibi e ‘Najaarsnota’ cu ta e segundo propuesta pa cambio di presupuesto 2023, pa duna nan conseho. Segun CAft, e propuesta nobo, riba cual lo duna conseho ainda, ta indica un entrada total di Afl. 49 miyon mas, compara cu e presupuesto. E aumento aki ta resultado di cambio di maneho, manera e aumento di e tasa di BBO y di impuesto pa turista, e ultimo aki di 9,5 porciento pa 12,5 porciento. Recuperacion economico fuerte tambe a contribui na e aumento. Basa riba e realisacion financiero te cu juni 2023, CAft ta anticipa un resultado positivo inespera considerablemente mas halto cu loke a presupuesta den e presupuesto modifica di 17 di october. CAft ta indica cu ta importante pa atende e resultadonan positivo inespera aki debidamente y completamente, y pa usa nan pa amortisacion di debe y inversion solamente, manera e protocol ta indica.

Nota di Redaccion:

Dia 10 di october 2023 Bon Dia Aruba a publica e cifranan general di ingreso di gobierno pa promer seis luna di 2023. Esaki a base di cifra di Banco Central, cu aparentemente por a dispone di cifra cu CAft no a haya te awe. Ingreso general di gobierno den e periodo referi a aumenta cu Afl. 199,3 miyon (30,9%), mientras cu entrada di impuesto a aumenta cu Afl. 174 miyon (29,9%). Entrada total di promer parti di 2023 a duna gobierno Afl. 842,9 miyon, mientras Afl. 755,1 miyon tabata e total di impuesto. BDA a comenta tambe, cu si e tendencia economico aki continua, ademas di e BBO na frontera na augustus pa resto di aña, gobierno lo yega na e proyeccion pa entrada total (y total pa impuesto) pa 2023 y hasta por surpasa e expectativanan cu un nivel di entrada total di riba Afl. 1.600 miyon, cu den e proyeccion multianual tabata anticipa pa aña 2024 y despues.

Entrada di impuesto lo ta riba Afl. 1.500 miyon, loke tambe ta mas halto cu e total di impuesto proyecta pa 2024 den e presupuesto multi-anual cu CAft a publica tambe hunto cu nan conseho riba presupuesto 2024. Crecemento economico y aumento den nivel di cobranza di impuesto ta combina pa salta posiblemente un aña completo den entrada gubernamental proyecta. Redaccion BDA lo bolbe riba e tema aki.