Colegio di supervision financiero di Aruba (CAFT) ta indica durante su bishita di trabou recien na Aruba cu gobierno ‘mester keda haci e maximo esfuerso pa keda denter di e norma maximo di deficit’.
Esaki nan a informa prensa durante un encuentro ayera. Nan ta bisa cu mester haci e maximo esfuerso particularmente awor cu e impuesto indirecto ta keda na e momentonan aki hopi atras bou di influencia di e crecemento economico abou.
Aki bou por lesa e relato cu di e colegio di supervision financiero:
Ehecucion di presupuesto di 2016
For di e reportahe di ehecucion te cu e di tres kwartaal ta sali na cla cu e deficit di e sector colectivo pa e periodo ey tabata di 1,5% di e PIB. Contrario na un impuesto riba ganashi cu atrobe ta sali mucho miho cu loke a spera, a consecuencia di introduccion di e sistema VAS, e recaudacion di impuesto di BBO, derecho di importacion y impuesto riba salario y riba entrada te cu september ta cana leu atras di e presupuesto, tambe pa motibo di e crecemento economico decepcionante.
Den e di cuater kwartaal e prome ingresonan proveniente di e reapertura di e refineria lo drenta. E surplus di Banco di Seguro Social di Aruba (SVb) segun expectativa lo baha y e deficit di Seguro Medico General (AZV) lo aumenta. P’esey ta parce posibel cu por cumpli cu e norma di LAft di 2,0% di e PIB, contal cu no tin mas contratiempo/percance.
Presupuesto di 2017 y presupuesto di mas aña
Dentro di poco CAFT lo ricibi e presupuesto di 2017 aproba pa duna su conseho riba dje. E presupuesto ta provee, conforme LAFT, un deficit di 0,5% di e PIB. CAFT lo evalua e grado di realidad di e suposicionnan subyacente mas aleu. Por papia di algun golpi di suerte di un solo biaha door di reapertura di e refineria cu lo yuda reduci e deficit. Pa un conseho valido tocante e presupuesto di 2017 aproba ta necesario pa dentro di poco ricibi e analisis di riesgo pa por evalua e consecuencianan financiero y e riesgonan corespondiente di reapertura di e refineria.
Aruba a priminti di mand’e mas pronto posibel pa Parlamento y pa CAFT. CAFT ta preocupa pa e falta di drechamento structural subyacente di e presupuesto y cu esey tin duda grandi den e cifranan di mas aña presenta. A ehecuta e medidanan di saneamento proponi djis parcialmente y e desaroyo di e gastonan di personal por lo pronto lo sigui keda atras di e obhetivo di un disminucion anual di 5%.
Na banda di e recursonan impuesto directo ta mustra na 2017 un subida di 9% respecto di e presupuesto revisa di 2016, di AWG 578 miyon pa AWG 631 miyon. Na 2018 impuesto directo lo a sigui subi na AWG 768 miyon, un subida di 22% respecto di e aña anterior. Esaki ta nifica cu den un periodo di dos aña Aruba ta spera un subida di impuesto directo di 31%. E crecemento economico mas halto corelativo na reapertura di e refineria no ta certifica un subida asina completamente. Tampoco e accionnan di cobramento cu a implementa ni e cumplimento aumenta lo no por conduci, segun CAFT, na un subida asina grandi. Pa e motibo aki CAFT no ta suficientemente convenci di sostenibilidad di financia publico di Aruba na termino largo.
Maneho financiero
CAFT a constata durante su bishita cu ta dal stapnan importante pa mehora e maneho financiero. Ta positivo cu Aruba ta aspira na obtene na aña 2020 un declaracion di control di e accountant tocante e fieldad di e cifranan di presupuesto. Na cuminsamento di 2017 Aruba ta elabora un mapa den cual ta specifica e puntonan di mehoramento pa yega na e declaracion di control ey. CAFT lo monitor implementacion di esey.
Diabierna dia 9 di december 2016 CAFT a haci un bishita di trabou na Aruba. A bishita Gobernador suplente, Ministro di Financia y Organisacion Gubernamental, Conseho di Ministro y e comision financiero di Parlamento.
