Caft encuanto reportahe 1-2021: Deficit anticipa a bira menos; Recuperacion di economia ta mas rapido cu anticipa

Caft a publica su evaluacion di e raportahe di promer trimester di 2021, cu gobierno di Aruba a entrega dia 18 di mei 2021, cinco dia mas laat cu e deadline den e ley di supervision. E promer raportahe pa e aña aki a resulta den un deficit realiza di Afl. 208 miyon. Segun CAft a proyecta e resultado aki den comparacion cu e presupuesto adapta pa 2021, unda un parti di e recomendacionnan di CAft ta inclui.

Esaki ta mustra awor cu e deficit proyecta pa 2021 a bira Afl. 119 miyon menos, di Afl. 988 miyon pa Afl. 878 miyon. E deficit riba presupuesto pa henter e sector colectivo – Pais Aruba plus e entidadnan elegi pa esaki – a baha cu Afl. 84 miyon te Afl. 1.008 miyon.

A base di e realisacion den e tres lunanan aki, CAft ta anticipa mas entrada y menos gasto pa e aña aki, esaki a base di e recuperacion mas rapido di economia, ocasiona pa recuparacion mas fuerte di turismo di Norteamerica y ehecucion di e vacunacion, cu segun CAft ta canando bon. Esaki ta ocasiona tambe menos gasto di apoyo financiero na sector priva.

Banda di e observacionnan positivo, CAft ta comenta tambe cu nan preocupacion pa e presupuesto no aproba ta keda. A pidi gobierno urgentemente pa percura pa un presupuesto aproba, inclusive recomendacionnan di CAft, pa dia 15 di april, loke no a sucede. CAft ta haya esaki preocupante y ta enfatiza importancia pa gobierno por conta cu e mandato pa ehecuta e presupuesto.

Cierto recomendacion di CAft no a keda inclui, manera e revocacion di e reduccion di loonbelasting y presupuesta menos gasto pa personal, bienes y servicio y e areglo di loonsubsidie, loke no a tuma lugar. Gobierno a argumenta cu ta wardando riba ehecucion di e Uitvoeringsagenda di e Landspakket. Esey ta haci, segun CAft, cu e deficit a ser reduci di manera insuficiente ainda.

AZV no ta reduci gasto suficiente

Pa loke ta e reduccion di gasto di Afl. 60 miyon riba presupuesto 2021, CAft ta observa cu no ta yega na e reduccion di Afl. 60 miyon pa aña, cu a keda acorda y na cual gobierno di Aruba ta mara. E suma indica awor ta Afl. 41 miyon so y CAft ta urgi gobierno indica ki medida ta bay tuma pa yega na e suma acorda.

CAft ta conclui cu posiblemente gobierno di Aruba no lo cumpli cu e condicion cu a stipula den reunion di Conseho di Ministro di Reino di 15 di mei 2020, y ta puntra tambe pa e progreso den e Comision Nacional pa Reduccion di Gasto den Cuido Medico, pa logra bin cu eventual alternativa pa yega na e reduccion palabra. CAft ta enfatisa cu e reduccion ta necesario pa mantene gastonan medico sostenible.

Tambe CAft ta pidi atencion pa e ‘Beleidsplan Verlaging Personeelslasten’ (BVP) y e baseline study (nulmeting) di administracion financiero. CAft ta bisa cu e valor informativo a mehora bastante pa loke ta e BVP den e raportahe, pero ta sugeri pa presenta e efectonan riba presupuesto a base anual y no pa kwartaal manera e ta awor.

Den e tabel acompañante ta compara e realisacion di trimester 1-2021 cu aña 2020 y presupuesto 2021. Esaki pasobra ta dificil compara 1-2021 cu e mesun periodo aña pasa, pa e efectonan di e crisis cu a afecta completamente desde e di dos kwartaal di 2020.

TABEL:

Layout please pone e tabel aki

Entrada

Entrada durante e kwartaal referi (1-2021) ta Afl. 223 miyon, 22% di e presupuesto pa 2021. Esey ta 87 miyon florin menos cu e mesun periodo aña pasa, loke ta logicamente causa pa e crisis di coronavirus cu a inicia na maart 2020. CAft ta constata cu a inclui den e presupuesto e reduccion di 12,6% riba e condicionnan laboral di e entidadnan gubernamental (Afl. 12 miyon) como tambe e 10 miyon florin di dividend di Banco Central, pero ta constata alavez cu no tur entidad liga na gobernacion y di sector subsidia a cumpli cu e reduccion menciona. Ta recomenda pa percura pa esaki tambe.

Como punto positivo CAft ta menciona cu e entradanan di BBO, loonbelasting, invoerechten y accijns a sigui e mesun imagen di aña pasa, mientras a tene cuenta cu un caida den promer parti di aña, pa mas laat den aña entrada mehora a base di mas actividad economico. E desaroyo actual ta permiti un speranza cu e entradanan aki lo mustra mas positivo na final cu loke e anticipa. Esaki lo por ta mas fuerte ainda si logra mehora e ‘compliance’ cu e diferente impuestonan, loke ta depende di mehoracion di Servicio di Impuesto.

Te aki e resumen aki di e evaluacion di CAft. Den nos siguiente edicion atencion pa e parti concluyente, entre otro di gastonan, sector colectivo y posicion financiero general di Pais Aruba.