Ayera atardi College Aruba Financieel Toezicht (CAft) a tene nan prome conferencia di e aña e aki na unda presidente di CAft, Lidewijde Ongering, a elabora ariba tres punto, reduccion di debe, inversion y reforma.
Ongering a remarca cu mirando con e economia di Aruba ta creciendo y finanzas publico tambe ta mustra un panorama positivo, ta importante pa Aruba usa e posicion financiero actual pa pone finanzas publico structuralmente na ordo y haci e economia bira mas resiliente.
E colegio di Supervision ta enfatisa cu un maneho presupuestario prudente ta keda e punto mas importante, teniendo cuenta cu e gastonan halto di interes, y un reforma structural den seguridad social y riba mercado laboral ta percura pa mas resiliencia.
Reduccion di debe
Ongering a resalta cu Gobierno di Aruba a entrega presupuesto pa 2024 na tempo, pa di dos aña consecutivo, y el a splica cu esaki ta cumpli ampliamente cu e normanan central presupuestario di un surplus di por lo menos 1% di e Producto Interno Bruto (PIB), tanto pa 2024 como pa e periodo plurianual.
Di otro banda el a trece pa dilanti cu ta existi riesgo tambe. El a sigui splica cu e gastonan di interes, cu ya ta representa casi un kinto parti di e presupuesto, por aumenta mas ainda door di e refinanciamento den e añanan cu ta bin.
“Esaki por haci cu nan ta desplasa mas cu nunca otro gasto of inversion. P’esey pago di debe ta keda importante,” Ongering a enfatisa.
Inversion
Ongering a indica cu inversion ta necesario pa haci economia mas resiliente y pa aumenta capacidad pa genera entrada. El a remarca cu den e contexto aki CAft ta positivo tocante e aumento di e presupuesto pa inversion planea na un suma di 115 miyon florin na 2028.
El a splica cu pa garantisa e eficacia di e inversionnan aki, ta importante pa traha un agenda di inversion plurianual cu ta conecta na e metanan di maneho incluyendo esunnan di e Landspakket.
Reforma
Tocante e topico di reforma, CAft ta resalta cu e espacio presupuestario disponibel na pais como tambe na e fondonan social, esaki ta e momento pa implementa reforma pa fortalece e economia di Aruba.
Ongering a señala cu den e sector di salud ta tumando paso pa por logra controla gasto structuralmente. El a splica in principe CAft ta positivo relaciona cu un marco di gasto como
instrumento pa controla, basta cu esaki yuda disminui e gastonan di cuido realmente.
Pa loke ta trata seguridad social, CAft ta indica cu precisamente awo cu e posicion di salida di e fondonan ta faborabel, ta bon pa Aruba cuminsa pensa riba reforma cu ta bay yuda e mercado laboral bira mas dinamico. “E luho cu Aruba tin awo ta cu e por aplica reforma sin mester tin aumento di carga,” Ongering a resalta.
Riba tereno fiscal, CAft ta indica cu Aruba a dal prome paso caba pa haci e sistema fiscal mas robusto, pero el a señala cu di otro banda e sistema di belasting indirecto ta keda dividi y door di esaki innecesariamente compleho.
CAft ta recomenda un sistema simpel den forma di un impuesto riba balor añadi (belasting op toegevoegde waarde—btw) cu lo mehora cumplimento.
Reportero di Bon Dia Aruba a puntra e presidente di CAft mirando cu Aruba ta keda atras cu e informenan financiero, locual ta afecta directamente e supervision di CAft, si ta berdad cu e informe trimestral di IV2023 ainda no a wordo entrega, mientras cu e mester a wordo entrega ainda den e luna di februari aki y kico ta CAft su reaccion ariba esaki?
Ongering a indica cu por wak cu pais Aruba a haci mehoracionnan grandi den e ultimo dos aña en cuanto ta trata e presupuesto. Esakinan a wordo entrega na tempo y nan ta bon, locual ta un muestra cu ta tumando pasonan importante. Sinembargo el a indica cu ainda e pais ta keda atrasa den loke ta trata e informenan di implementacion real.
El a agrega cu nan a ricibi e di tres informe di e aña aki y nan tabata kier cuminsa cu e informe di uater informa final di e aña, pero nan ta trahando ainda riba esaki, pa realmente acelera e proceso, y el indica cu ayera mainta nan a discuti esaki tambe cu e Minister di Finanzas.
“Nos ta busca refuerso y nos a haya algun pa e maneho financiero. Pues nos ta tuma paso y esaki ta e siguiente prioridad cu nos ta trahando riba dje,” Ongering a indica.
CAft ta preocupa tocante e aumento di impuesto na Aruba, particularmente e impuestonan di personal y e interes riba prestamo. Di otro banda e ta satisfactorio pa e aumento grandi den entrada, entre otro cosnan stimula pa e aumento di e GDP pa 7% y di e GDP pa importacion.
Bon Dia Aruba a puntra e presidente di e Colegio di Supervision cu mientras cu e carga aki ta wordo causa pa efectonan inflacionario acumulativo, ta keda sin un bista riba e importacion di un sistema B2B cu no tin un funcionamento inflacionario. Esaki tin consecuencianan serio, specialmente pa esnan cu tin entrada mas abao y cu ta gasta un parti grandi di nan entrada riba necesidadnan basico, kico ta e punto di bista di CAft riba esaki?
Ongering a splica den su respuesta cu e presupuesto ta mustra bon en berdad y por wak, naturalmente, cu e economia tambe ta mehorando y e parti di entrada ta desaroyando rapidamente. Esaki ta nifica cu ta bon tambe pa sigui wak e parti di gasto, e parti di carga.
El a sigui splica cu nan kier pa e gastonan aki subi mucho lihe. “E pais tambe a establece cu nan kier maximalisa e carga di personal na un cierto nivel, esaki ta 10%. Y loke nos a comprende e mainta aki, pero nos lo discuti esaki despues, hendenan ainda ta boa di 10%. Pues esaki ta mustra basta bon. Aña pasa nos a mira cu impuestonan nobo a wordo introduci bao di e WTO na frontera. Nos tambe ta mira cu esaki tin un efecto significante pero nos a conseha anteriormente cu ta miho pa yega na un revision di e sistema BTW, pues nos ainda ta na fabor di esaki,” el a remarca.
Por ultimo, Bon Dia Aruba a señala cu for di e carta di Secretario di Estado pa Asuntonan di Reino, Alexandra van Huffelen di e siman aki pa Eerste Kamer, ta keda cla cu e pago di interes lo aumenta ainda mas pasobra otro prestamonan tambe ta wordo belasta cu un tasa di interes di 6.9%. A puntra Ongering kico ta e efecto di esaki riba e presupuesto pa 2024 y si gobierno di Aruba tambe ta tuma esaki den cuenta?
E presidente di CAft a splica cu e 6.9% ta solamente relaciona cu e refinanciamento di e prestamonan di COVID y Hulanda a pone cierto condicionnan pa esaki.
Tocante e ley di RAft, cual te aworaki no tin un acuerdo entre e dos paisnan, Hulanda y Aruba, el a indica cu teniendo na cuenta cu hende no ta di acuerdo cu esaki, Hulanda ta manehando aworaki un tasa di interes halto pa nan prestamonan di COVID, e refinanciamento di cual ta na 6.9% y esaki ta trece un carga adicional den e presupuesto di 35 miyon pa aña.
“Ta trata di un presupuesto solido y esaki ta nifica cu e tasanan di interes halto mester wordo procesa. Gobierno di Aruba a inclui esaki hopi bon den e presupuesto,” el a finalisa.
