Aruba no ta cumpli cu e Plan di Reduccion di Gasto di Personal

Aruba a ricibi ocho (8) conseho di College (Aruba) financieel toezicht, C(A)ft entre Januari pa Juni 2021. En total C(A)ft a presenta 41 conseho den e periodo ey, cu ta cinco menos compara cu e mesun tempo na 2020. Y mayoria di e consehonan tabata pa Corsou, esta un total di 14.

Esaki ta den e relato di trabao di C(A)ft a prepara y cu Secretario di Estado pa Asuntonan di Reino, Raymond Knops a manda pa Tweede Kamer.

Segun e relato, tanto e Rft y LAft (e dos leynan bao cual C(A)ft ta opera) a determina cu mester supervisa e normanan di presupuesto palabra, duna conseho y raporta na e Ministernan di Finanzas, Parlamentonan y Gobiernonan di e paisnan Corsou, Aruba, St. Maarten (CAS) y tambe di e islanan BES, ademas na e Minister pa Asuntonan Interior y di Relacionnan di Reino y Conseho di Minister di Reino, cu en realidad ta e supervisor final. E tarea di C(A)ft ta dirigi riba henter e proceso di presupuesto cu ta inclui e cuentanan anual y maneho financiero.

Pa Corsou y St. Maarten e ta nifica cu e servicio regular di presupuesto mester ta por lo menos den balans. Pa Aruba ta conta cu e presupuesto mester cumpli cu un deficit of surplus acorda. Aki a palabra un periodo unda Aruba lo mester percura pa yega na un surplus pa asina cuminza baha e debe halto.

Relevante di e rijkswet supervision financiero (Rft) ta cu e ta determina cu deficitnan lo por keda compensa despues. C(A)ft por, riba peticion di e paisnan duna conseho na momento di prepara e concepto di presupuesto, pero en todo caso, e paisnan mester presenta e presupuesto na e Colegio unabes cu e ta cla. C(A)ft ta sigui e ehecucion di e presupuesto a base di reportahe di ehecucion y si no cumpli cu e normanan di e presupuesto, e por conduci na un conseho pa Gobierno di Reino pa bin cu un asina yama ‘aanwijzing.’ Alabes, C(A)ft por duna conseho sin cu ta pidi pa esaki. Desde 2020 ta C(A)ft ta conseha Gobierno di Reino riba e sosten di likides pa e paisnan CAS, den luz di e crisis di coronavirus.

Aruba y presupuesto

CAft a conseha riba e Presupuesto di 2021 y a reacciona riba e di cuater reportahe di ehecucion di 2020 y e prome di 2021 den e periodo di Januari pa Juni 2021. Banda di esey, CAft a conseha Gobierno di Reino riba e sosten di likides cu Aruba tabatin mester. E presupuesto di 2021 a keda determina apenas 30 di Juli 2021 y como tal no ta aparece den e reportahe di trabao di CAft pa e periodo en cuestion. Pero, CAft a mustra cada biaha si cu un Presupuesto laat ta algo hopi preocupante y a enfatisa hopi biaha cu pasa un presupuesto di Pais Aruba ta tempo ta esencial pa asina Gobierno por haya e mandato pa ehecuta esaki.

Los di e advertencia ey, CAft a bisa den su conseho riba e Presupuesto cu Aruba no a cumpli cu e norma di surplus financiero segun e protocol firma entre Hulanda y Aruba, cu ta conta pa 2019 pa 2021. Aruba mester a percura pa un surplus di un porciento di e Producto Bruto Interno. E espacio di cual Aruba por desvia di e protocol lo mester ta determina na un otro fase y esaki ta un decision di Gobierno di Reino, basa riba conseho di CAft. Na e momentonan aki, e Presupuesto 2021 ta mustra cu tin un deficit di 1.008 miyon florin pa e sector colectivo, cu ta 23.6 porciento di e Producto Bruto Interno. CAft a duna diferente recomendacion cu mester a conduci na adaptacion di e Presupuesto 2021 y segun e reportahe, Aruba a hinca un parti di e recomendacionnan den e version pa 2021 cu a keda entrega na Parlamento riba 30 di Juli 2021.

Tabata durante e prome mita aña di 2021 cu CAft a ricibi e di cuater reportahe di ehecucion di 2020 y e prome di 2021. E deficit temporario den e di cuater reportahe di 2020 a keda cu un suma di 758 miyon, mientras cu Conseho di Minister di Reino a permiti un deficit di 781 miyon florin. For di e prome reportahe di ehecucion di 2021 ta ilustra un deficit di 208 miyon florin. Esaki ta menos grandi cu locual a anticipa y como tal, CAft ta premira cu e resultado pa 2021 lo mustra un miho resultado cu locual ta den e Presupuesto di 2021. Banda di esey, CAft a bisa cu no a tene cuenta cu un recuperacion mas rapido di economia, danki na un turismo cu a mehora mas lihe cu anticipa.

AZV

Sinembargo, Aruba tin reto pa costonan di cuido, gasto di personal y maneho financiero. Riba tereno di costo di cuido, ya ta pa hopi tempo caba cu CAft ta conseha Aruba pa tuma medida pa percura cu cuido y seguridad social ta keda sostenibel pa generacionnan futuro.

Consecuentemente, Aruba, conforme e condicionnan di Conseho di Minister di Reino di 15 di Mei 2020, mester duna contenido na un reduccion di costo mensual di 5 miyon florin pa AZV, cu ta suma na 60 miyon pa aña. Pero den e prome reportahe di ehecucion di 2021 ta mustra cu Aruba ta kere di realisa un reduccion di costo di 41 miyon florin. CAft ta enfatisa cu mester realisa e recorte di 60 miyon pa 2021 cu bista riba percura cu e sistema di cuido ta keda sostenibel.

12.5 porciento y reduccion gasto personal real

CAft a tuma nota cu e recorte riba gasto di personal cu Aruba a realisa na 2020, conforme e protocol, a keda logra particularmente pa motibo di implementacion di e recorte di solidaridad di 12.5 porciento. E implementacion di e BVP, esta e Beleidsplan Verlaging Personeelslasten (Plan di Maneho Reduccion Gasto di Personal) sinembargo no a keda realisa y door di falta di e BVP tin un recorte limita na 2021. CAft a indica cu e BVP ta crucial pa por trece e gastonan financiero di Gobierno bao control y como tal mester keda ehecuta, incluso cu tur e medidanan cu ta den e plan.

(red. Manera ta conoci Gobierno di Aruba tin den su poder e resultado di e investigacion cu Hulanda a haci riba condicionnan laboral primario, secundario y tercero, esta salario y beneficionan di tur trahado den sector publico y semi publico. E rapport aki awor mester resulta den adaptacion di e LMA, cu ta e ley cu ta regula condicionnan laboral di trahadonan publico, ademas cu ta bay tin consecuencia directo pa e forma con ta honra e pago di trahadonan publico.

Dia 15 di December lo mester presenta e nota di inicio pa e adaptacion di LMA y otro articulonan cu tin di haci cu rendimento y salida. Hulanda, hunto cu Aruba lo studia e cuadro huridico. E meta ta pa den cuadro di un esfuerso optimal di personal, lo investiga e formacion, ocupacion y presencia real y empleabilidad di trahadonan di Gobierno y organisacionnan publico. Si trahadonan ta ricibi salario di forma inapropia, depende di e situacion, lo tuma medida, manera para salario y cuminza un trayecto di retiro. E rapport investigativo cu Hulanda a haci ta encera comparacion di e condicionnan laboral y ta recomenda unda por introduci recortenan den por ehempel pago di overtime, areglo di vakantie, recompensacion special, asina yama toeslagen, biahe y compensacion pa biahe. Pa loke ta e uso di labor temporario, Hulanda y Aruba lo traha riba un plan, desaroya pa reduci y maneha costonan riba e tema aki. Lo determina e pasonan cu mester sigui despues cu haci un inventarisacion e kwartaal aki.

Basa riba un revision riba e funcion di Recurso Humano, cu ta encera maneho, conseho di Recurso Humano, administracion y instrumentonan, lo por desaroya y implementa proposicionnan pa mehoracion. Hulanda y Aruba lo ehecuta e investigacion na e funcion di Recurso Humano y e grupo di trabao ta encarga pa determina e rapport, cu mester ta cla pa15 di Februari. Pa loke ta e rapport riba nivel administrativo esaki mester ta cla pa 15 di Maart y e continuacion ta determina a base di e recomendacionnan cu ta sali di e rapportnan aki. E meta ta pa yega na un maneho di personal strategico, y pa esey mester tin investigacion. Nan ta inclui un planificacion strategico di persona, cu ta basa riba e revisionnan di e aparato publico y introduccion di un sistema di maneho di prestacion den e aparato publico. Crucial ta e limitacion di influencia politico riba asuntonan di personal).

Maneho financiero

Den e reunion di Conseho di Minister di Reino di 26 di Februari, a dicidi cu Aruba mester determina su cuenta anual pa 2019 pa mas tarda dia 1 di Augustus 2021. E cuenta anual determina pa 2020 mester a keda entrega na CAft dia 31 di Augustus 2021. Den e protocol firma cu Hulanda ta inclui cu pa prome biaha mester bin un control di e cuentanan anual. Aruba a duna di conoce di no por cumpli cu e fechanan, y CAft a informa Conseho di Minister di Reino di esaki.