E maneho di gobierno pa drecha su financia publico primordialmente ta basa riba e reapertura di refineria. Sin embargo cu e garantianan cu Pais Aruba a duna Citgo, esaki tin su riesgonan financiero. Colegio di supervision financiero di Aruba (CAft) a pidi gobierno un analisis di e riesgonan ya na augustus pero nada. Ayera e Colegio a indica cu lo spera e analisis otro siman.
Esaki presidente Age Bakker a bisa durante un presentacion di e ultimo conseho riba e situacion financiero di gobierno ayera dilanti prensa.
Dentro poco nan ta spera di haya e presupuesto 2017 pa asina duna un conseho profundo riba esaki. Pa awor e colegio di supervision financiero ta bisa cu ‘por papia di algun golpi di suerte di un solo biaha pa motibo di reapertura di e refineria cu lo yuda reduci e deficit’. Nan ta basa nan mes riba e combersacionnan cu nan a hiba cu e gobierno di Aruba. Manera indica gobierno ta hiba un maneho di hisa entrada pa asina drecha nan situacion financiero en bes di corta den nan gastonan. Aunke CAFT a conseho pa entre otro gobierno tambe corta riba su gastonan pa yega un financia publico duradero, gobierno no ta haci mucho den e direccion aki.
Pa nan e apertura di e refineria lo trece un inyeccion asina grandi pa Aruba su economia cu e caha di gobierno lo probecha enormemente di esaki. Pero manera indica, e proyecto aki tambe tin su riesgonan. Te awor ta mustra a base di noticianan den prensa internacional tambe cu Citgo no tin e financiamento ainda pa hinca den e drechamento di e refineria di Aruba. Di otro banda gobierno di Aruba ya a duna cierto garantianan.
Grado di realidad
CAFT ta indica cu pa nan por evalua e ‘grado di realidad’ di e presupuesto 2017, nan mester un analisis di e riesgonan di e proyecto di refineria. “Mi ta kere e ta hopi importante pa esaki tambe lo sali den un forma transparente y si tin riesgonan constata, gobierno lo indica kico lo haci pa e riesgonan no lo manifesta. Luna pasa nos a ricibi un concepto di e analisis aki y por a duna nos comentario. Awor nan ta trahando riba esaki. Mi tin tur confiansa cu otro siman e analisis lo ta cla. Tambe nos a urgi gobierno pa manda e analisis pa parlamento como cu asina esaki lo sali di biaha den e dominio publico”, asina presidente Bakker ta contesta riba preguntanan di Bon Dia Aruba.
