CAft: A pesar cu ta mustra resultado positivo…Prome uitvoeringsrapportage di 2024 no ta cumpli completamente cu acuerdonan

Luna pasa, Colegio di Supervision Financiero di Aruba (CAft) a ricibi e informe di ehecucion (uitvoeringsrapportage) di Aruba cu ta coresponde na e prome trimester di 2024. Dos siman despues, CAft a duna su reaccion den un carta, cuminsando cu e hecho cu e rapport a keda entrega laat.

Notando e fecha di entrega di e informe di ehecucion, CAft a comenta cu “esaki ta tres luna despues di e plaso legal di 13 di mei 2024.” Den e carta a ricibi ademas di e reaccion di CAft na e prome informe di ehecucion, un splicacion detaya y un hustificacion numerico relaciona cu e respuesta.

Den e prome seccion di e carta, titula “Evaluacion,” CAft ta nota cu “Aruba a tuma bon stap den ultimo aña utilisando den gran medida e surplus pa amortisacion di debe. Ademas di e crecemento economico, esaki a provoca un disminucion rapido di e tasa di debe. Asina, e obhetivo di un tasa di debe di 70 porciento di GDP pa 2027 ta den alcance.” CAft a bisa cu ta spera, basa riba e prome uitvoeringsrapportage di 2024, un miho resultado di e sector colectivo cu loke a presupuesta. Ademas, ta comenta cu por destina e surplusnan aki, den un parti, pa inversionnan adicional. Pero ta nota cu ya cu ta haya falta di un agenda (plurianual) di inversion, ta pronostica un riesgo cu no lo logra realisa tur inversion cu tin planifica pa e aña aki.

Maske e prome uitvoeringsrapportage ta mustra un resultado positivo, CAft ta constata cu esaki no ta cumpli cu e acuerdonan cu a cera cu Aruba. Por ehemplo, e uitvoeringsrapportage ta duna informacion solamente riba e gastonan di personal di e pais, locual ta haci imposible pa CAft determina, basa riba e uitvoeringsrapportage, si Aruba ta cumpli cu e norma di gasto di personal. Ademas, e uitvoeringsrapportage usualmente ta keda presenta despues di e plaso legal. CAft ta nota cu e entrega na tempo di e uitvoeringsrapportage ta fortalece e ehercicio di derecho presupuestario di Parlamento di Aruba.

Saldo financiero
Dia 18 di juli 2024, CAft a duna conseho riba e amienda presupuestario (BW) di 2024 pa Aruba. CAft ta constata cu e colecta fiscal di e pais den prome trimestre di 2024 ta den linea cu e BW ya ahusta. Aruba ta calcula un saldo financiero di Afl. 211 miyon pa fin di 2024, di cual Afl. 165 miyon ta coresponde na e pais y Afl. 46 miyon na otro entidadnan.

Fin di maart 2024, e surplus di Seguro General di Salud (AZV), Banco di Seguro Social (Svb) y Autoridad di Turismo di Aruba (ATA) a alcansa un total di Afl. 63 miyon. E surplus di e entidadnan aki ainda no ta refleha den e BW, segun CAft ta nota. CAft ta spera, basa riba e prome uitvoeringsrapportage, cu e saldo financiero di e otro entidadnan di sector colectivo pa fin di 2024 lo ta mas cu loke a presupuesta, y ta pidi pa ahusta esaki segun e cifranan mas recien.

Gasto di personal
E uitvoeringsrapportage, a diferencia di loke ta stipula den LAft, ta proporciona informacion solamente riba e gastonan di personal di e pais segun un definicion estricto. CAft no por, por lo tanto, evalua con e gastonan di personal ta evoluciona segun e definicion di LAft. CAft a acorda cu Aruba cu for di e prome uitvoeringsrapportage di 2024 lo inclui informacion riba gastonan di personal den e sentido amplio, pero ta nota cu no a inclui esaki den e uitvoeringsrapportage.

Tasa de debe
Debe di Aruba pa fin di maart 2024 ta aumenta na Afl. 5,439 miyon, loke ta un reduccion di Afl. 322 miyon den comparacion cu maart di 2023. E tasa di debe fin di maart 2024 ta di 75 porciento di producto interno bruto (GDP). Esaki ta pone cu lo por alcansa e meta di un tasa di debe di 70 porciento di GDP pa 2027.

Inversion

Aruba a aumenta inversion pa 2024, di Afl. 21 miyon, pa Afl. 69 miyon cu e BW. Den prome trimestre di 2024, Aruba a inverti Afl. 0,7 miyon. E escasez den sector di construccion pa motibo di e crecemento economico fuerte ta retrasando e procesonan di licitacion di proyectonan di inversion financia pa gobierno. CAft ta premira e riesgo cu no lo logra realisa tur inversion e aña aki, y ta recomenda pa Aruba elabora un agenda di inversion plurianual. CAft a bisa cu ta dispuesto pa discuti esaki cu minister di Finanzas.

Pa finalisa, CAft ta solicita pa presenta e di dos uitvoeringsrapportage lo mas pronto posible, y pa ahusta e resultado presupuestario di sector colectivo segun e cifranan di realisacion mas recien. Ademas, CAft ta solicita pa gobierno comparti e informacion riba gastonan di personal den un sentido amplio.

Den nos siguiente edicion, Bon Dia Aruba lo comparti informacion riba e splicacion di e comentarionan di CAft manera inclui den e carta.