CAft a papia y… Gobierno ta bay corta overtime…?

E organo di supervision financiero CAft a tuma un tarea na su encargo cu nan no necesariamente mester a haci. Mirando e resultado, ta di aprecia si cu nan a hacie, sigur pasobra awor hopi di e aspectonan cu nos tabata supone pero nunca a mira comproba, nos por mira hunto den un solo documento. Tambe nan analisis con e departamentonan cu nan a analisa ta organisa, of no, pa atende e problema di ausencia pa enfermedad combina cu esun di overtime, ta util.

Lamentablemente nan no por a bay tanto den detaye tocante e relacion entre ambos, e material cu a haya na disposicion no ta brinda e posibilidad ey, pero si den discusion di e cifranan cu esnan cu ta dirigi e departamentonan concerni, a bin dilanti cu tin impresion cu por tin intento pa haya overtime structuralmente. Por ehemplo pa cumpli cu pago di debe, pa cual e persona ta conta riba e entrada extra di overtime. Un tema cu nos redaccion tambe ta analisando, y no solamente den gobierno sino en general, ya cu e problema di debe personal ta un fenomeno bastante alarmante.

Loke ta importante, den tur caso, ta yega na un manera pa cuminsa para e fenomeno di overtime mas tanto posible, y de paso lo mester atende e asunto di AO halto den gobierno tambe. Y pa logra esaki ta necesario pa contempla tambe e instrumentonan cu un departamento tin pa cuminsa set up un miho sistema di registracion y vigilancia. CAft a dedica atencion na e aspecto aki tambe, y aki a bin detecta algo cu e insidernan sa desde semper: e departamentonan no ta haci uso di gran parti di e instrumentonan legal cu tin pa sanciona y coregi conducta di empleado. Aki nos mester ta si algo mester cambia.

Por ehemplo, falta hopi comunicacion y coordinacion entre e departamentonan y e instancianan clave pa maneha ausencia na trabao, por ehemplo departamento di Recurso Humano y SVb. Ta resulta di e rapport aki cu no tin maneho desaroya pa atende structuralmente e empleado cu den corto tempo ta varios biaha sinta o drumi na cas. E prome pregunta lo ta si awe, 2019, tur departamento den gobierno tin un maneho bon organisa y structura di recurso humano, pasobra sigur den caso di e departamentonan grandi, laga tur cos den man di DRH ta demasiado facil y no efectivo. Mester ta parti di e responsabilidad di e gerencia di un departamento pa nan mes vigila kico ta pasando cu nan personal, y actua.

Un pregunta adicional cu ta surgi ta pakico no ta intensifica e control medico, tambe control na domicilio den caso di persona cu ta ‘dal AO’ regularmente. Den nan rapport CAft ta conta cu a haci e pregunta aki na SVb y a haya e contesta cu tanten e departamentonan concerni no por garantisa seguridad fisico di nan personal medico, nan no por avansa cu esaki. A conta hasta di caso di agresion di empleado publico contra medico di control di SVb. Nos pregunta adicional lo ta: y e empleado publico ey a keda cu su trabao? Esaki si lo ta e colmo, cu nos mester desisti di medida disciplinario pasobra tin miedo di empleado agresivo? Si esey ta e caso, anto nos no mester preocupa mas tampoco pa purba cambia algo. Y si algo mester cambia ta e diferencia abismal cu tin cu sector priva pa loke ta AO. Simplemente mehora e control medico y sanciona esnan cu ta abusa.

Sin embargo, si nos ta bay pone e bala riba cancha di e dirigentenan na e departamentonan mes, mester bisa algo na nan fabor tambe, y esey ta cu despues di tanto aña di sistematicamente limita autoridad y facultad di e personanan aki, lo mester revisa e modelo actual, unda masha poco asunto ta den man di e management. Nan no sa cuanto nan personal ta gana pasobra ‘no ta nan asunto’. Nan no sa cuanto ta paga di huur, coriente, awa, etc. E presupuesto cu e departamentonan ta maneha nan mes ta un porcion masha chikito di e presupuesto total, y no ta keda tanto pa maneha.

Despues nos ta yega na e parti disciplinario. Ta facil pa bisa cu nan mester haci esey, pero nan por conta cu un proceso agil y efectivo na departamento di Recurso Humano? E parti facil ta ora un persona resulta di ta ausente sin permiso y sin motibo, pasobra e ora ta ‘no work, no pay’ ta conta y por regla esaki directamente cu finanzas, ya cu e ta un medida administrativo y no disciplinario. Pero, pa tur otro caso cu si ta disciplinario ta spera e ‘leidingevende’ un caminda di cruz cu por dura facilmente mas di un aña…

Finalmente, despues di tur e trabao encomendable aki di analisa y propone posible solucion, gobierno lo bay haci algo? Nos tin duda serio den esaki. Pa e simple motibo cu esaki ta encera tuma medida impopular unda gobierno ademas no ta controla e ‘playing field’. Cu un mayoria di departamento cu maneho asina debil den e tipo di asunto aki, ta dificil ehecuta cu exito. Algo fundamental mester cambia den e manera di maneha den gobernacion, y hustamente den esey no ta mira avance.