E necesidad presupuestario pa 2020 ta 1.410 miyon florin. Esaki ta consisti di e deficit di pais Aruba pa un suma di 1.114 miyon florin y refinanciamento di prestamonan cu ta madura, esta 296 miyon florin. Esaki ta locual College Aruba Financieel Toezicht, CAft ta bisa den su raportahe cu ayera a bay pa Parlamento Hulandes, Gobierno di Hulanda y tambe pa Aruba.

CAft ta presenta un relato por escrito cada seis luna na Conseho di Minister di Reino, Gobiernonan di Aruba y Hulanda y na Parlamentonan di Hulanda y Aruba. E relato e biaha aki ta riba e trabounan di CAft durante e periodo Januari te cu Juni 2020.

E organo ta sigui bisa den su relato cu Aruba a haya aprobacion di Conseho di Minister di Reino pa refinancia 583 miyon florin cu prestamonan internacional, pa asina paga otro debenan cu a madura y interes. Na fin di 2019, e quota di debe di Pais Aruba tabata 73 porciento, cu ta un debe di 4.324 miyon florin. E expectativa ta cu e quota di debe pa motibo di e deficit a consequencia di e crisis di COVID-19 lo aumenta riba 100 porciento di Producto Bruto Nacional (GDP) di Aruba.

Recapitulacion trabounan.

E prome tres lunanan di 2020 tabata den luz di presupuesto 2020 y e introduccion di reformanan di belasting. Pero COVID-19 a trece cambio. E consecuencianan financiero, economico y social di e pandemia tabata impactante y a domina e prome parti di 2020. Economia di Aruba cu ta depende riba turismo a cay completamente cu ciere di aeropuerto y puertonan di Aruba y companianan y ciudadanonan a mira nan entradanan cay drasticamente. Pa e presupuesto di Aruba e tabata nifica un caida agudo den entrada, mientras cu introduccion di medidanan necesario a nifica mas gasto. Banda di e consehonan di e proceso regular di presupuesto, CAft a duna conseho riba peticion di Conseho di Minister di Reino riba e sosten di likides pa Aruba. Basa riba esaki, CAft tabata evalua mensualmente si Aruba a cumpli cu e condicionnan cu Hulanda a mara na e sosten aki.

Y dia 25 di Maart, Aruba a pidi pa por desvia di e normanan financiero palabra cu Hulanda dia 21 di November 2018. Conseho di Minister di Reino a acepta y a pidi pa consehonan di CAft pa sosten di likides.

Durante e bishita rutinario di CAft na Februari 2020, prome cu e pandemia, mester a constata cu Parlamento no a vota pa e ley di Presupuesto 2020 ainda. Esaki tabata crea mas problema ya cu door di esaki, a bin retraso den medidanan di belasting y reduccion cu tabata planifica. CAft a recomenda pa lanta un comision independiente, cu pa medio di revision di e gastonan di presupuesto, por pone riba papel un mehoracion di eficiencia posibel y reduccion di gasto pa presupuesto 2021. Banda di esey, CAft a duna su sugerencia pa Aruba pone na dia e ciclo di presupuesto y responsabilisacion y a pidi pa duna e informacion riba progreso con e asina yama nulmeting riba e maneho financiero.

Durante e periodo di reportahe aki, CAft a duna conseho pa establece Presupuesto 2020, e di cuater raportahe di ehecucion di 2019, concepto di ley pa cambio di Presupuesto 2020, y tambe e desviacion temporal di normanan financiero, e posicion di likides actual, e tres prome tranchenan di sosten di likides pa 2020 y e proposicion di reformanan entrega na Pais Aruba.

Responsabilisacion 2018 y prome

E cuentanan anual di 2018 ta traha pero ainda no tin un declaracion di accountant y un rapport di Controleria General. Aruba tin un retraso creciente den e proceso pa establece e cuentanan anual segun CAft. Den su declaracion, CAft a bisa cu Parlamento no a trata e cuentanan anual di 2017 y 2018 y a wanta e formulacion di decision pa 2016. Aruba como tal, segun CAft no a cumpli cu articulo 17 di e LAft y e ley di Comptabilidad (red. Parlamento recientemente a vota pa e cuentanan anual, a pesar cu no tabatin un declaracion di accountant). CAft a pidi pa establece e cuentanan anual for di Januari 22, 2020. Pa Parlamento por cumpli cu e ley di Presupuesto debidamente e ta esencial cu tin un ciclo di presupuesto y responsabilisacion, segun CAft. Como tal, establece cuentanan anual di e aña anterior ta di crucial importancia pa e preparacion di presupuesto pa e siguiente. Como tal, e ta importante pa Aruba pa tuma e pasonan necesario pa mehora maneho financiero.

Ehecucion Presupuesto 2019

Aruba a presenta na CAft e di cuater raportahe di ehecucion pa 2019, unda a mustra un saldo financiero temporario pa henter e sector colectivo pa un suma di 43.1 miyon florin. E saldo aki, como percentage di e GDP tabata di 0.7 porciento. Esaki tabata mucho miho cu e norma di e saldo di financiamento cu tabata na -0.5 porciento. Resultadonan di SVB y AZV a influencia saldo di e sector colectivo na un forma positivo.

CAft a pidi un reaccion riba e resultadonan di e midimento cu a tuma luga (nulmeting) riba maneho financiero. Aruba a reacciona cu un carta riba 8 di Maart, 2020, pero no a duna ningun resultado di e analisis.

Presupuesto 2020

Aruba a presenta su Presupuesto 2020 dia 20 di April na CAft, y como tal no a cumpli cu articulo 13, inciso 1 di LAft, cu ta bisa cu Aruba tabatin te dia 15 di December 2019 pa entrega e ley. CAft a haci diferente recomendacion dirigi na reduccion structural di gastonan y e argumentacion di e plan di reforma di belasting. Pero COVID-19 a obliga Aruba pa tuma medidanan drastico, hasta prome cu a establece e ley di Presupuesto 2020, y a establece un Presupuesto di Emergencia cu a inclui un plan di emergencia dirigi na sosten financiero na dunadonan di trabou cu a perde entrada, y tambe na trahadonan cu a perde nan trabou.

Pero dia 4 di Mei 2020, CAft a laga sa cu no a inclui tur recomendacion den e concepto di e Presupuesto cu a keda presenta na Parlamento. Ademas a constata cu a pospone e reformanan di belasting, cu a nifica un reduccion den entradanan den e Concepto di Presupuesto. Y no a mira ningun paso structural den e Presupuesto pa baha gasto. Pesey mes CAft a bolbe recomenda pa percura cu otro medida di e reforma fiscal por continua.

A conseha pa cuantifica medidanan di reduccion di gasto di personal y pa bin cu un Cambio di Presupuesto for di cua ta sali di un scenario unda e fronteranan di Aruba lo keda cera pa tres luna y cu un recuperacion leve den e di tres y di cuater kwartaal. Aruba a bisa dia 27 di Mei cu a inclui tur e recomendacionnan den e Concepto di Cambio di Presupuesto 2020. Tambe a bin mas conseho riba 24 di Juni 2020 pa Aruba por haya e di tres tranche di sosten di likides.

Pero, Aruba no a logra establece e Cambio di Presupuesto 2020 den e prome mita di aña.

E prome raportahe di ehecucion riba Presupuesto 2020 a bin te dia 20 di Mei y segun CAft, e prome tres lunanan di 2020, cu tabatin poco influencia di COVID-19. Sinembargo, CAft a nota si cu e calidad di e splicacion den e raportahe di ehecucion mester por ta miho y cu kier a mira esakinan den e di dos raportahe di ehecucion.

Otro temanan

CAft tambe a conseha Conseho di Minister di Reino riba e sosten di likides cu ta necesario debi na e crisis di COVID-19. Dia 7 di April, CAft a conseha riba e necesidad di likides y tambe e paketenan di sosten social. E prome sosten tabata pa un suma di 42.8 miyon florin pa e periodo di 1 April te cu 15 di Mei. Aruba mester a haci escogencianan den su Presupuesto pa crea espacio financiero y inclui e cambionan den e revision di Presupuesto. E mesun ehercicio a sigui unda CAft a conseha pa Hulanda yuda cu 49.4 miyon pa loonsubsidie pa luna di Mei, y otro mas pa luna di Juni despues cu Aruba a compromete pa duna un contribucion propio di 20 porciento di parti di trahadonan. Na Juni, CAft a bisa Gobierno di Aruba pa introduci un reduccion di 5 miyon florin pa luna na AZV pa 2020 y mester a bin cu medida pa limita e salarionan di e ehecutivonan den companianan di Gobierno. Conseho di Minister di Reino a ricibi e consehonan aki y Aruba a bay de acuerdo cu nan sin condicion. Nan tabata inclui reduccion di condicionnan di trabou den sector publico y entidadnan publico.

CAft tambe a splica con Aruba a sigui cumpli cu e condicionnan pa e sosten y con leu Aruba por desvia di e norma central di Presupuesto y un evaluacion di e proposicionnan di Aruba pa reformanan structural.

Serlimar

CAft a puntra atencion pa e gastonan mas halto di Serlimar, den e di cuater raportahe di ehecucion. E aumento di gasto ta bin entre otro pa motibo cu e tarifanan no ta cubri e gastonan di operacion, ademas cu sistema di cobra ta deficiente. CAft a enfatisa cu por evita un contribucion di Pais Aruba si mehora e structura di tarifa, hisa y mehora e cobranza y kita e obligacion di Pais Aruba pa compensa e deficit di Serlimar.

Otro documento pa Tweede Kamer

Mester bisa cu tabatin mas tema cu a discuti awe den Conseho di Minister di Reino, unda hasta a manda e documentonan pa Parlamento Hulandes. Ta trata di e desviacion di e normanan di Presupuesto 2021 y e di cuater tranche di sosten di likides. E plan pa ehecucion mester ta cla pa 1 di Februari 2021. Y Aruba ta palabra cu Hulanda riba reforsamento di e control di frontera prome cu 1 di Februari. Tambe a presenta un relato di e Cuenta Anual di Wardacosta, unda a trata e personanan indocumenta cu a keda deteni. Y finalmente a presenta un cuadro di evaluacion di e areglonan di risico di Gobierno di Reino relata na e di cuater tranche di sosten di likides.

Locual ta yamativo ta cu e documentonan aki tabata riba e pagina di Tweede Kamer pero a kita nan despues. Lo keda pendiente pa nan.