Debe di Aruba te cu mita di 2021 ta 5.454 miyon florin y como tal e Gobierno di Aruba mester sigui tur e palabracionnan haci cu Hulanda pa reduci gastonan specifico.

College Financieel Toezicht Aruba tabata hopi cla den su analisis di kico Gobierno a haci of laga di haci riba tereno di reduccion di gasto di personal y gasto di AZV. Es mas. Dr. Raymond Gradus, Presidente di CAft a bisa cu Minister di Turismo, Salud, y Deporte te hasta a manda un carta pa bisa cu e reduccion di AZV lo ta un poco mas cu mita locual a palabra y esaki no ta aceptabel pa CAft.

Gasto di Personal

CAft a remarca den su conseho riba e prome UR di 2021, cu no suficiente bon bista riba e BVP, esta e Plan di Maneho Reduccion di Gasto di Personal. E ta inclui cifranan a base di kwartaal y no ta compara cu e ahustacionnan of reduccionnan cu kier logra. CAft como ta no por evalua si ta logra e obhetivonan di e BVP y kico esaki mester produci na reduccion anual di gasto di personal. Consecuentemente, CAft tin su dudanan riba efectividad di e ehecucion di e plan di reduccion di gasto di personal y kier pa Gobierno cuantifica e medidanan y relata esakinan na un presupuesto multianual.

Servicio di capital

E servicio di capital ta mustra pa prome biaha un resultado positivo di 10 miyon. E entradanan ta 18 miyon y ta relata na depreciacionnan cu a bin los. E gastonan di 8 miyon ta consisti particularmente di financiamento di estudio. A pone 21 miyon pa inversion na 2021, pero a realisa unicamente 500 mil pa e prome mita aña. CAft ta kere cu no tin suficiente tempo ta resta pa realisa henter e suma di inversion pa 2021.

Maneho financiero

Conseho di Minister di Reino a determina dia 26 di Februari ultimo, cu Aruba mester tin su cuentanan anual di 2019 aproba dia 1 di Augustus ultimo y e cuentanan anual di 2020 dia 31 di Augustus. Pero Gobierno di Aruba a manda un carta dia 1 di Juli cu no ta logra e fechanan aki pa motibo di coreccionnan administrativo. E cuentanan anual di 2019 como tal lo mester keda cla pa October y esun di 2020, pa December.

E retrasonan aki, segun CAft ta consecuencia di fayonan grandi y serio den e maneho financiero, cu a haya mucho poco atencion den ultimo añanan, E colegio como tal ta urgi Gobierno pa duna prioridad na mehoracion di e maneho financiero particularmente den luz di e agenda di ehecucion di e landspakket pa Aruba.

Cuido

Pa loke ta e reduccion di gasto di 60 miyon riba e presupuesto di AZV, CAft a ricibi un carta di Minister Dangui Oduber di Turismo, Salud y Deporte cu ta spera un reduccion di gasto di 40 miyon pa AZV. Pero, e carta no ta inclui un ilustracion di cifra y tampoco ta bisa con Aruba lo cumpli cu e instruccion di baha e gasto di 60 miyon. For di UR y e informe di progreso di e Organo Ehecutivo di AZV ta mustra cu ta sali di un reduccion di unicamente 36 miyon pa 2021. CAft a enfatisa un biaha mas cu a palabra riba un reduccion di 60 miyon cu mester keda realisa den su totalidad y cu mester tuma pasonan adicional. CAft consecuentemente ta pidi e Minister di Finanzas Xiomara Maduro atencion pa percura cu ta ehecuta energeticamente e reformanan necesario, cu mester percura cu tin bon cuido cu ta keda accesibel, pero cu ta garantisa siguridad social na Aruba pa futuro generacion tambe.

Posicion di debe y e norma di pago di interes

Den e presupuesto 2021 a inclui un necesidad di financiamento di 1.036 miyon florin. E suma aki ta consisti di e deficit operativo presupuesta y resultado di e servicio di capital di Gobierno di 775 miyon florin, y refinanciamento di prestamonan cu ta vence, cu ta suma na 261 miyon florin. Gobierno a paga 8 miyon na prestamo y a paga 121 miyon na interes. Mirando e interes cu a sali mas bentahoso, lo tin un costo di interes cu ta 6 miyon menos pa e prome mita aña di 2021. Como tal ta kere cu pa henter aña lo mira cu ta bay paga un poco menos na interes cu a proyecta.

Di otro banda, debe di Aruba a aumenta cu 225 miyon den e di dos kwartaal di 2021. E prestamonan cu a cera ta trata e sosten di likides di 237 miyon, e bononan di Gobierno di 73 miyon y debenan cortico di 13 miyon. A paga 98 miyon florin na debe.

E posicion di debe total di Aruba, na fin di e di dos kwartaal di 2021 a yega na 5.454 miyon florin, cu ta inclui e prome te cu di cinco tranche di sosten di likides. E quota di debe ta na 110 porciento di e Producto Interno Bruto di Aruba. CAft aki a uza e desaroyo di e PIB cu Banco Central a calcula.