E situacion di e compania estatal di transporte Arubus ta uno preocupante. E accion cu e trahadonan a trahadonan a realisa diabierna ultimo cu sosten di nan sindicato STA, a demostra cu e compania ta den problema, ya cu nan flota di busnan ta den un situacion deplorabel y te hasta peligroso.
Nan calidad di servicio pa publico a bay atras keto bay, segun e sindicato. A pesar di esfuersonan cu a wordo haci den pasado pa pone draai un compania asina importante den nos comunidad; te aworaki niun salbabida a yuda pa evita cu e Arubus no bay zink. E flota di 15 bus nobo cu a wordo adkiri apenas cuater aña pasa, nan ta na werki caba y e posibilidad di bin cu Aruparking pa entre otro genera fondo pa Arubus, a trece mas bien mas dolor di cabes cu placa.
Un causa determinante cu a haci cu di un flota di 15 bus cu ta esunnan mas nobo cu a bin na 2013, casi cuater aña pasa so, 13 di nan ta daña caba, ta e condicion di nos careteranan y bus shalternan cu no ta esun mas ideal. P’esey un apelacion a wordo haci pa por lo menos e ministernan di Transporte y Infrastructura incorpora un parada di bus adecuado den e proyecto di Green Corridor. Nan ta demanda un infrastructura caminda e busnan por drenta y sali sin tin niun problema. Pa colmo di e cantidad masha limita di busnan cu defecto cu ainda ta sigui brinda e servicio di transporte aki, diabierna un di nan a accidenta. Si nos ta agrega cuanto bus no por subi caya cu keto bay ta sigui aumenta (wak e lista publica, esunnan cora ta busnan cu no por subi caya) ta haci e panorama futuro di Arubus mas scur.
E compania ta hayando un presupuesto for di gobierno di alrededor di 6 miyon florin. Pero segun e trahadonan representa pa sindicato STA, cierto cantidad di placa ta wordo gasta den cosnan cu practicamente no ta necesario. Mientras cu inversion no ta wordo haci pa e busnan ta den bon condicion cu ta e instrumento basico cu Arubus tin mester pa ofrece un bon servicio pa comunidad.
STA
Pa presidente di sindicato STA Diego de Cuba a lamenta e accidente di e bus di diabierna anochi; y el a laga sa cu esaki ta un confirmacion cu nan accion tabata uno legitimo. Ya cu si di un banda nan no a firma e protocol cu gerencia di Arubus ariba entre otro rijvergunning, si no ta pa STA awe e chauffeur di e bus accidenta aki tabata hinca den debe grandi. Riba e asunto di rijvergunning ya cu mayoria di e trahadonan eventualmente no a pasa e control medico di SVb, esaki ta un punto cu no a wordo trata den corte diabierna ultimo. Pero sindicalista sr. De Cuba a bisa cu esaki ta keda un punto di discusion. Ya cu tur trahadonan mester ta responsabel pa bay haci nan keuring pa nan por haya nan rijvergunning, pasobra si e trahadonan no ta cumpli cu esey, nan mes lo paga e consecuencianan, ya cu e ta un ley y un rekisito di e compania.
P’esey e trahadonan di Arubus no a para nan accion mesora despues di e caso sumario, te ora cu nan por a haya preto riba blanco un carta a base di un palabracion haci cu Departamento di Transporte Publico (DTP) unda ta keda garantisa cu si algo pasa cu e chauffeur pa via di e rijvergunning, Arubus ta responsabel pa esaki.
El a bisa cu e detaye principal di nan accion no tabata asunto di schaalering di salario, sino e mal condicionnan cu e busnan di Arubus ta continua den dje. E ta un realidad publico cu prensa a yega di divulga tocante bus cu a pega candela caminda mester evacua hendenan na carera pa no kima den bus. Tambe busnan cu a yega di accidenta pa nan mal estado; tairanan den mal condicion, brake den mal condicion; motor trahando malo; nan no tin airco, no tin pito, etc..
Encuanto e busnan cu e airco a daña, STA a indica cu promesa a wordo haci cu lo wordo drecha y tampoco a wordo cumpli. Sr. De Cuba a bisa cu un chauffeur di Arubus a haya ataca tras di stuur debi na e calor, ya cu algun di nan ta chauffeurnan ariba di edad . Un situacion cu ta conta tambe pa e pasaheronan of e clientenan.
El a splica cu e busnan aki ta wordo diseña di tal forma cu ora e airco ta daña e ventilacion di aire natural no ta drenta den e bus locual ta crea un ambiente sofocante. E trahadonan kier alomenos alternativa cu por facilita cu por lo menos e biento por drenta y ventila e bus y evita cu esunnan abordo no sofoca. Hasta tin trahadonan cu a inventa un tipo di bentana cu ta permiti cu e aire por drenta pa aden; pero ni esey a wordo teni na cuenta pa bin cu ne.
Responsabilidad
“Mi por menciona bo full un lista largo. E deber di e gerencia, hefe di garashi di Arubus y tambe indirectamente di e chauffeur ta pa controla e busnan aki, prome cu nan sali for di cura di Arubus tur mainta y esaki no ta sosodiendo tampoco…” el a declara na Bon Dia Aruba. E sindicalista ta haya cu esaki ta un iresponsabilidad di marca mayor ya cu si bo ta un persona responsabel y bo sa cu bo ta transporta hendenan, cual ta encera muchanan chikito, hendenan di edad grandi y publico en general, bo mester ta mas consciente y mas responsabel.
E no ta haya cu ta un bon argumento pa laga e busnan aki sali pasobra nan mester cumpli cu e ruta y e demanda; sino cu nan mester percura pa tur cos ta sigur pa ora e busnan aki ta ariba caminda bo no haya bo cu sorpresa. Sr.De Cuba a indica cu e sindicato ta bay te extremo ey di bin cu un accion pasobra nan tin mas cu 8 luna caba, caminda nan a haci un apelacion na e gerencia di Arubus pa drecha e situacion aki, pero STA ta lamenta cu te diabierna cu nan a bin cu e accion fuerte ey, nada of masha poco a wordo haci prome cu esey.
Pa colmo e sindicalista ta haya cu gerencia a hisa e tarifa di Arubus sin ofrece un bon servicio, mientras cu e bus chikito a cuminsa tuma e mercado, garando mas di e pasaheronan cu nan airco den autobus den bon estado y ofreciendo un tarifa ta mas barata. “Kico bo kier haci cu Arubus? Bo kier mata Arubus? Of bo no por maneha e compania.”
El a bisa cu nan a yega di trece posibel solucion pa atende cu e situacion di Arubus, pero lamentablemente nan ta tarda hopi dunando atencion ta otro cosnan cu no ta prioridad na e momentonan aki. STA ta spera di sostene un reunion pronto cu minister nobo di Transporte, Mike de Meza pa wak si gobierno ta dispuesto pa yuda Arubus y pone e compania aki draai den un forma optimal.
“Si bo tin bon ekipo riba caminda e trahadonan ta traha cu mas siguridad y mas satisfecho tambe…”, e ta bisa.
Sr. De Cuba ta spera cu despues di e accion y e firma di un protocol pa trece paz laboral, e resultado lo ta positivo. Tin factornan cu mester wordo haci studio riba nan pa determina kico nan por haci bek tambe.
