Gobierno di Nicolas Maduro a sufri un progresivo aislamento internacional,  pero ainda Maduro tin algun pais cu ta apoya su gobierno, y cu por blokea of retrasa algun medida mas duro cu por sali for di organismo manera OEA, Union Europeo of ONU.

Pero a pesar di tur cos, varios pais tin algun interes politico of economico,  cu ta hiba paisnan pa respalda Maduro. Cada respaldo tin un diferente matiz y un diferente grado di compromiso cu Maduro.

Na America Latino a haya gobierno di derecha den su mayoria, pero ainda den e grupo di pais cu ta incondicional pa Caracas, tin Cuba, Bolivia y Nicaragua. E grupo di pais aki ta un grupo di nacion,  cu tin mesun ideologia y un fuerte discurso anti- imperialista contra Merca.

Otro pais ta mira como un decision hopi dificil pa cuminsa kibra e legado di Hugo Chávez (presidente prome cu Maduro) y cu a duna varios subsidio den cuadro di e programa di Petro Caribe. Petro Caribe ta e areglo, caminda Venezuela ta duna petroleo na prijs preferencial na mas di 15 pais di Centroamerica y Caribe, Paul Hare, ex-embahador Britanico na La Habana y master  di Universidad di Boston, a bisa.

Hare ta splica kico ta pasa den Organisacion di Estado Americano, caminda tur 34 pais cu ta miembro di OEA,  tin e derecho di voto, pero  te awor OEA no a logra haya algun medida cu por yuda den un salida for di e  crisis na Venezuela, manera algun solucion via di e grupo di pais cu ta traha como mediador.

Pafo di region di America Latino, Caracas tin apoyo di pais manera China y Rusia. Tur dos e paisnan aki tradicionalmente ta contra decision cu ta encera sancion, y ademas nan tin capacidad di veto den Conseho di Seguridad di ONU.

China y Rusia tin interes financiero y strategico na Venezuela, Michael Shifter, presidente di  Dialogo Interamericano na Washington a splica. China ta e pais cu ta duna un apoyo clave na Venezuela, y tin mas di 60.000 miyones dollar inverti na Venezuela y a duna tambe varios credito a cambio di petroleo y algun concesion pa explota mina na Venezuela. Awe Maduro ta e persona,  cu ta garantisa tur inversion di China na Venezuela.

Gobierno di Iran a condena tur advertencia di Merca, tocante un posibel intervencion militar contra Venezuela. Teheran a califica tur declaracion como “intervencionista y provocativo”.
E regimen Irani  a mustra su oposicion contra cualkier ingerencia stranhero den asunto interno di Venezuela y a mustra e necesidad di respeta e soberania y independencia di otro pais.

Diabierna cu a pasa, Donald Trump, presidente di Merca, a bisa cu Merca tin hopi opcion pa cu Venezuela, entre nan ta e opcion militar, “si lo ta necesario”.

China tambe a pidi Merca pa respeta e principio di no ingerencia na Venezuela. Union Europeo a bisa cu nan 28 estadonan miembro no lo reconoce Asamblea Nacional Constituyente. E decision a sali despues di un reunion na Bruselas, caminda no a debati algun posibel sancion contra responsabel di crisis na Venezuela, cu tabata promovi pa Spaña, pa motibo cu e votacion no a haya mayoria di voto, tampoco a yega na ningun acuerdo den discusion di ultimo sesion di Union Europeo.

E apoyo pa Maduro lo por dura largo? E apoyo lo depende di e situacion interno di Venezuela, cu ta bibando pa mas di 4 luna caba, cu  hopi manifestacion y protesta, y cu a causa 125 morto, analistanan ta bisa.

“Por sucede cu si e Constituyente ta cana y ta genera mas caos y represion, anto gobierno di Maduro por perde mas amigo cu awor ta apoy’e,” Shifter  a bisa.