Diabierna Santo, cantidad di creyente Catolico a asisti na e Caminda di Cruz Bibo realisa den e bario di Dakota. Esaki ta e di 11 aña cu Sra. Gina Nuboer, hunto cu un team di casi 150 hende, a duna bida na e pasion y morto di Hesus. Esaki ta inclui tur actor y actriznan, y e hendenan encarga cu e parti logistico. E ta spera cu e Caminda di Cruz Bibo aki, cu ta demanda hopi trabou y dedicacion, lo por sigui bibo pa hopi aña mas cu ta posibel.
Sra. Nuboer a bisa cu pa nan tabata un satisfaccion grandi pa mira hopi hende cu a forma parti di loke a bira un tradicion caba na Dakota. E ta haya cu di e manera aki, nan por evangelisa specialmente nos hobennan. Tambe e ta gradici e elenco cu di presentacion aki, ya cu nan ta haci hopi sacrificio. Tin algun di nan cu mester a tuma vakantie pa nan forma parti di e Caminda di Cruz bibo. E ta tuma hopi tempo pa prepara tur cos y practica. Basicamente henter un aña nan ta keda plania riba dje.
Cada version di e Caminda di Cruz Bibo ta percura pa realis’e di e manera mas real cu ta posibel. Pa prepara e persona cu a fungi di Cristo, for di 4or di madruga te 9or di mainta, nan a cuminsa traha riba e makeup di su herida nan y tambe riba su barba y cabey. Nan por a mira un evolucion positivo den comparacion cu 10 aña pasa . Cada biaha nan a bin cu mas innovacion pa mustra e Caminda di Cruz aki mas real posibel.
Tur esaki ta posibel, ya cu tin hopi boluntario cu ta pone nan habilidad y talento den esaki. Asina e por keda graba den mente di tur esunnan cu por a wak’e, con Hesus a sufri y con sanger tabata sali for di su curpa. Por ta e imagen aki ta mustra uno cruel, ‘pero e ta apenas un tiki di loke Hesus realmente a sufri pa nos,’ el a bisa.
Pader Joseph, encarga cu e parokia Birgen di Fatima di Dakota, a gradici e asistencia di tur esunnan presente, y tambe esunnan cu a sigui e transmision di TeleAruba. Tambe el a expresa palabra di danki na Sra. Nuboer hunto cu e actornan, kendenan pa medio di e Caminda di Cruz bibo aki ta pone nos reflexiona riba tur loke Hesus mas cu 2 mil aña pasa a haci, entregando su bida pa nos tur. “Pa tur hende por haya bida eterno, bida berdadero,” asina e religioso a bisa.
