Siman pasa, Organisacion di Pensionado Publico Arubano (OPPA) a tene su di dos Reunion General pa e aña aki den Crystal Theater, cu a cuminsa 9am y a termina 1pm. E reunion a bay den un ambiente ameno y cu hopi interaccion.

Tur miembro presente a haya e oportunidad pa haci pregunta tocante e maneho y por expresa su preocupacion. Directiva tabata habri pa e sugerencia- y comentarionan cu miembronan a trece dilanti y haci lo posibel pa busca un solucion pa e preocupacionnan treci dilanti.

Na final di e reunion e miembronan por a bay cas cu un sentido di satisfaccion despues di tur e informacion cu nan a ricibi y e contestanan cu nan a haya riba e preguntanan cu a bin dilanti.

Segun directiva, mas y mas miembro ta atende e reunionnan di OPPA y e directiva ta contento cu un cantidad di mas o menos 200 miembro a haci acto di presencia na e reunion.

Sr. Ivo Valdes, durante Participacion (punto 2 di agenda) a duna un splicacion en conexion cu e caso hudicial di OPPA contra Gobierno. E caso aki tin di haci cu e 85 florin di indexacion cu e pensionadonan no a ricibi desde 2013, mientras cu e trahadonan di Gobierno si a haya esaki. E pensionadonan tin mas cu 6 aña sin haya un ahustacion riba nan pensioen. Gobierno ta lubida cu e costo di bida ta subi pa su ex- trahadonan tambe. E balor real di nan pensioen tambe a baha mescos cu entrada di tur e ambtenaarnan. Segun e abogado di OPPA, hues lo dicta sentencia dia 15 di januari 2020.

Tocante e tereno pa OPPA construi su edificio, mester a informa e miembronan cu directiva ta sigui haya contratiempo y cu e traspaso no por a tuma luga debi cu 4 miembro di e directiva di SEPB a baha. Awo directiva tin di warda riba Gobierno y SKOA pa nan nombra e miembronan nobo den e directiva di SEPB.

Den e reunion aki e miembronan a aproba e notula di e RG 19 mei 2019, e lista di decision y e presupuesto pa 2020.

Por ultimo directiva ta participa na su miembronan pa nan corda pasa cumpra nan entrada pa e Almuerzo di Pasco cu ta tuma luga diadomingo, 15 di december 2019, den Renaissance Convention Center di 10am – 3pm.