Presidente di Fundacion Contra Cancer di Prostaat, Jurgen Benschop, a indica cu e situacion di cancer di prostaat ta uno cu ta merece debido atencion.

E cifranan cu nan a haya for di departamento di Salubridad Publico ta mustra un averahe di 44 caso nobo diagnostica di cancer di prostaat pa aña. E edad ta varia entre 45 y 60 aña, pero tambe 65 aña plus.

“Cancer di prostaat ta hopi traicionero. Bo tin cu detecta tempran. Esaki ta e magia tras di esaki: Detect’e tempran!”

E estadistica ta mustra cu cancer di prostaat ta number 6 di e malesanan den general cu hende homber ta fayece na Aruba. E factor di riesgo mayoria di biaha ta e hende homber cu tin e malestar di e tipo di cancer aki den famia. Nan ta e poblacion cu ta core risico mas halto, segun sr. Benschop.

Igualmente e datonan ta mustra cu entre e aña 2009 te cu 2013 tin un averahe di 45 caso di diagnostica cu cancer di prostaat. E ta haya cu esaki ta un indicacion cu e hende homber ta birando mas consciente y cu nan ta bay dokter pa haci nan testnan.

E ta aclaria cu no necesariamente ora bo ta haci e testnan ta nifica cu bo tin cancer di prostaat. Pero den caso cu bo test di PSA ta riba un nivel un tiki mas halto cu normal, ta un indicacion cu algo no ta bayendo bon cu bo prostaat. Bo tin cu bishita bo dokter pa haci mas investigacion. Si resultado di bo test di PSA ta entre 0-4, e ta relativamente bon. Pero si e ta sali un tiki mas halto, esaki ta un indicacion cu tin algo fout cu bo prostaat. “Tin algo cu ta molestia bo prostaat. Esey no kiermen cu necesariamente bo tin cancer.”

El a haya importante di por a trece e datonan aki como fundacion cu ta atende primordialmente cu malesa di hende homber, y muy particularmente cu cancer di prostaat. E luna di november cu a caba di pasa a wordo reconoci mundialmente pa atende cu malesa di e ser masculino . P’esey e siman aki nan fundacion a bin cu informacion den diferente media pa conscientisa nos comunidad, y muy specialmente hende homber riba e tema di e tipo di cancer aki. E ta kere cu ainda e tema aki ‘ta hopi taboe y no ta wordo papia hopi riba dje’.

Taboe riba test di dede
Un taboe tin di haber cu e test conoci como ‘test di dede’ pa determina con inflama of hincha bo prostaat ta. Pero no mester bay te laat asina, ya cu hopi hende homber pa causa di machismo no kier tuma accion. Ta asina cu basa riba resultado di e test di dede bo tin cu haci un biopsy pa determina si berdad bo tin cancer of no.

“Si bo ta haya dolor eigenlijk bo ta laat. Esey kiermen cu ya e cancer a plama y e ta afectando otro parti di bo curpa, dunando complicacion,” e ta splica. Mayoria di persona ta fayece ora ta presenta e metatesis, caminda e cancer aki ta plama y ta afecta otro partinan di bo curpa.

E ta haya hopi hende no sa cu bo tin alternativa prome cu mester a pasa e test di dede. Locual nan ta pidi como fundacion pa hende homber pa tene na cuenta e situacion aki, y haci bo test di prevencion cada aña na edad jong di alrededor di 40 aña bay ariba. Den consulta cu bo dokter di cas bo por puntra si bo por haci e PSA test cu ta un test simpel di sanger.

Fundacion y ayudo
Actualmente e fundacion aki ta mira cu tin diferente factor positivo na Aruba pa yuda e pashentnan di cancer di prostaat. Entre nan tin un par di dokter jong y motiva den e area aki, y e fundacion ta trahando hopi cerca cu nan. Esaki ta den bienestar di tur hende homber ya cu nan kier garantisa un comunidad sostenibel. “Nos hende homber ta e pilar di cada famia.” Nan a cuminsa conscientisa un generacion jong pa garantisa cu nan por detecta y tuma prevencion na tempo riba e cancer aki pa asina garantisa un comunidad sostenibel, y evita cu famianan ta lanta sin nan tata.

Como fundacion nan ta dispuesto pa duna informacion pa esun interesa riba e topico aki pa haci nan mas trankil, si nan tin cu pasa den un proceso asina dificil. Mayoria di nan miembronan ta pashentnan cu a pasa den e proceso aki, cada un cu nan propio experiencia. Nan ta dispuesto pa duna sosten na e hende homber den e proceso aki. Ya sea cu e pashent tin cu bay riba tratamento afo y talbes e pashent aki tin algun inkietud riba e tratamento mes, entre otro si e ta causa dolor of no. P’esey e lema principal di nan fundacion ta: “Pasando e Brug Hunto.” Nan ta consciente cu ora un persona ta wordo diagnostica cu cancer, e tin un impacto hopi grandi riba e pashent su bida personal y tambe riba su famia, y amigonan.

Pa mas informacion e persona interesa por tuma contacto cu e boluntarionan di e fundacion aki pa medio di nan website: www.prostaataruba .com Of tambe via nan facebook page: Fundacion Contra Cancer di Prostaat of manda nan un e-mail na: prostaataruba@gmail.com