Tin caso di hobennan considera como “Arubianonan nobo”, cu a nace na Aruba pero nan ta yiunan di mayornan stranhero, cu nan ta profila nan mes como bon studiante na nivel di HAVO y WVO, pero cu nan ta keda pega of frustra pa sigui nan estudio avansa na Hulanda. Esaki pa motibo cu ainda nan no a adopta e nacionalidad Hulandes.
Nan ta hoben cu a nace na Aruba cu a lanta den nos cultura y cu a siña den nos scolnan. Pero ora cu nan ta bin cla cu nan estudio secundario, nan mester cana un caminda di cruz, te ora nan ta defini nan nacionalidad Hulandes.
Opcion pa nacionalidad
E hurista Alexander Solagnier ta conta Bon Dia Aruba cu berdaderamente nan ta casonan lamentabel y nan ta frecuente. “No ta for di awor cu e inmigrantenan ta bin establece akinan, y nan ta forma nan famia na Aruba.”
El a splica cu tin caso di hobennan cu a nace na Aruba denter di un matrimonio di stranhero cu a bin biba na Aruba, y cu a lanta y bay scolnan riba nos isla. Nan ta caba exitosamente nan scol pero nan ta pega pasobra nan ta cargando ainda nacionalidad di nan mayornan. Den e caso aki hendenan no ta realisa cu muchanan no ta naturalisa, sino cu nan ta pasa den e proceso di opcion. “Opcion bo por haci solamente ora bo ta yega na mayor di edad.”
E opcion aki ta nifica cu e hoben di yiunan di stranhero ta laga e nacionalidad di nan mayornan cay, y e ta opta pa e nacionalidad Hulandes cu e hoben tin derecho riba dje. Pero e hoben por haci ora cu e ta cumpli 18 aña.
Sinembargo e hurista ta splica, nos mester tene cuenta cu e ley ey ta wordo aplica na Hulanda. “E proceso di opcion ta un proceso cu ta wordo pasa for di Aruba via Gobernador, y e ta wordo tramita na Hulanda.” Na Hulanda un hoben den e mesun situacion aki, no tin e problema ey. Pasobra e hoben di mayornan stranhero cu a establece na Hulanda, (cu ta den mesun situacion di esunnan cu a nace na Aruba y di mayornan stranhero) nan ta na Hulanda caba unda e universidad t’ey; of otro institucion di enseñansa superior of avansa.
“Aunke e hoben aki por tin otro nacionalidad, pero e ta yiu di tera. E ta keda un hende cu por yuda pa e progreso di Aruba tambe. E ta pica cu e ta cay eigenlijk den un discriminacion di nacionalidad, pasobra e tin tur e derechonan. Pero pa un simpel ley cu atendi pa Hulanda, nos ta mara na esey.”
Durante un anochi informativo organisa pa fundacion Dominicana Arubaanse Juan Pablo Duarte, dos caso a wordo trece dilanti di hobennan “Arubianonan nobo” masha preocupa, ya cu nan ta pasando den e situacion aki. Pero tin varios caso similar cada aña, segun e hurista, caminda nan ta pasa den e mesun proceso caminda nan ta perde un aña of mas di nan bida of estudio pa warda riba un paspoort cu nan tin derecho riba dje.
