Te aworaki empleadonan di servicio postal no ta sinti cu e ley di cacho a trece un cambio. Of cu el a bira un instrumento legal y efectivo pa atende cu e problema aki.
Ainda e trahadonan cu ta entrega carta of paki ta pasa den e mal experiencia di bira victima di atake di cacho brabo riba caya. Director di Post Aruba, Guillemo Raymond a declara na e matutino aki cu aunke nan trahadonan ta sigura pa accidente, e menasa cu ainda nan ta confronta tur dia ta cu e cachonan di caya.
Tin empleado di post cu a wordo mordi of haya accidente pa motibo di e cachonan. Pero tambe nan ta confronta situacion hopi peligroso cu cacho di cas masha brabo mes. Tin biaha no tin hende na cas y cacho ta subi caya y ataca e personal di post. Te hasta tin biaha cu e empleado di post no por drenta den cierto caya; cu tin cachonan los cu ta terorisa e bario, entre nan pitbull y otro tipo di cacho di rasa hopi peligroso.
