Cachonan cu ta bay Hulanda cu problema pa adapta

Aclaracion:
 Mayoria di cacho di exterior adopta na Hulanda no ta bin di Aruba

Den nos edicion di ayera a aparece e articulo titula ‘cachonan cu ta bay Hulanda cu problema pa adapta’, den cual a destaca investigacion di facultad di medicina veterinario di Universidad di Utrecht, indicando cu cachonan adopta for di exterior ta confronta problema pa adapta na Hulanda y hopi biaha ta termina den eutanasia.

E articulo tabata compaña pa un potret di cachonan di Sgt. Peppers Friends, cu por a crea e impresion cu ta enfoca riba nan den e articulo locual no ta corecto. Bon Dia Aruba ta pidi disculpa na e fundacion pa e asociacion eroneo aki. “Nos no kier ta asocia cu e articulo pasobra e ta daña tur e bon cu nos ta purba di haci” na Aruba, e fundacion a comenta.

Maske e investigacion di Universidad di Utrecht no tabata haci specificamente riba cachonan cu ta bin di Aruba, e intencion di e articulo tabata pa describi e problema general cu cachonan ta confronta na momento di biba na otro pais. Un cacho di Aruba cu ta bay exterior tambe tin cu deal cu cambio di ambiente y clima, y e cambio na man di un persona desconoci. Sinembargo, Bon Dia Aruba kier aclaria cu e investigacion menciona den e articulo no tabata trata di cachonan specifico cu a bin di Aruba.

Regularmente por nota di e varios fundacion pa bienestar animal, como tambe Animal Shelter di Aruba, cu tin persona den exterior ta adopta nos animalnan pa duna nan un chens pa un bida nobo. Cantidad di nan ta haya esaki na Hulanda. Sinembargo, expertonan di facultad di medicina veterinario di Universidad di Utrecht a bisa cu e cachonan aki ta confronta problema pa adapta na nan ambiente nobo.

Durante e pandemia, mas cacho di caya a wordo adopta na Hulanda for di exterior, loke a conduci na un aumento den problema di comportamento, segun expertonan di facultad di medicina veterinario di Universidad di Utrecht a informa den un relato di NLTimes.

Segun e relato, adopta un cacho for di exterior por resulta mas dificil cu loke e doño por a spera. Cacho di caya por tin problema pa ahusta na bida domestico na Hulanda.
Mientras nan ta riba caya nan ta enfrenta problema, manera falta di suficiente cuminda y awa. Ademas cacho di caya ta mas custuma na compania di otro cacho di caya y tin menos experiencia positivo cu humano.

Resocialisacion di cacho di caya por ta dificil. “E fase di socialisacion ta di gran importancia pa e cacho. Ta solamente durante e prome 12 siman crucial cu un cacho por domina habilidadnan social optimalmente. Den e periodo inicial aki, ta determina si e cacho por enfrenta bida como un cacho adulto cu tiki miedo, tiki agresion y bon habilidad social”, segun biologo di comportamento na Facultad di Medicina Veterinario, Claudia Vinke a bisa.

Casi un di cada dos cacho cu a bin e clinica di comportamento tabata un cacho di caya di exterior. “Un cantidad di e cachonan aki a ricibi eutanasia mientras tanto pa motibo di miedo excesivo, loke ta hopi perturbante”, Vinke a declara. “E parti mas tristo di e asunto aki ta cu e doño kier duna e cacho asina hopi amor y cuido, pero e cacho no por acepta esaki.”

Den algun caso por resocialisa e cachonan di caya cu ayudo di training di comportamento. Mas trempan cuminsa cu e training, mas facil ta pa cambia e comportamento.

Na Aruba, prome cu e cachonan ta eligibel pa biaha pa Hulanda (of Merca, of otro pais) nan ta pasa un temporada cerca un ‘foster’, cu idealmente ta yuda e cacho adapta na e proceso di bira un cacho di cas.