BANGKOK (AP) — Trahadonan di un plataforma petrolero haya un cacho cu a landa mas di 220km for di costa, den Golfo di Thailandia, cual nan a rescata y trece bek riba tera.
Vitisak Payalaw, un trahado riba e plataforma perteneciendo na Chevron Thailand Exploration and Production, a bisa riba su pagina di Facebook cu nan a mira e cacho landando pa acerca e plataforma diabierna ultimo. El a bisa cu pa suerte nan a mir’e, pasobra si tabatin ola, probablemente e no lo tabata visibel.
E cacho a logra yega e plataforma, wantando su mes na e structura di sosten bou di e cubierta, sin yora ni blaf, Vitisak a skirbi.
E team di trahado a logra baha un cabuya y mara esaki rond di e nek di e cacho y his’e. Vitisak a bisa cu nan ta specula cu e cacho por a cay for di un boto piscado, y a yam’e ‘Boon Rod’ of ‘Survivor’.
E cacho a wordo entrega via boto na e haf sur di Songkhla dialuna, y a wordo declara den bon estado despues di a wordo hiba cerca e grupo di proteccion animal Watchdog Thailand.
Vitisak a bisa cu si niun hende reclama e cacho, e lo encanta pa hib’e na su cas, situa nort oost di Thailandia.
