Dialuna pasa, na Renaissance Convention Center a celebra e Dia Nacional di Estudio di Scol Arubano Multilingual (SAM) pa Enseñansa Preparatorio, organisa pa Departamento di Enseñansa Aruba (DEA) den cooperacion estrecho cu Centro pa Desaroyo Profesional Continuo (CDPC) di Instituto Pedagogico Arubano (IPA).

Durante e evento cabesantenan y maestronan di e scolnan preparatorio a participa pa por logra hisa e nivel y e resultado di Enseñansa, cu ta un maneho nobo di idioma.

Proyecto Scol Multilingual a cuminsa na aña 2012, pa uza y ta ofrece mas cu un idioma den scol y den klas. Desde un principio a scoge pa un punto di bista den cual na scol no ta uza un idioma so, pero ta haci uzo di mas cu un idioma. For di e punto di bista aki no ta discuti mas tocante si ta scoge Papiamento, Hulandes of Ingles, pero a scoge pa diseña un scol den cual tin un luga, un funcion y un rol pa tur e cuater idioma cu e comunidad ta uza aki na Aruba.

Gina Ras-de Kort coordinador di seccion di guia di Departamento di Enseñansa, cu ta encarga di sostene scolnan den implementacion di innovacion, a expresa cu nan tabata celebra e dia nacional di estudio tocante implementacion di Scol Arubano Multilingual (SAM) basa riba introduccion di modelo multilingual.

Ras-de Kort a splica cu esaki ta encera cu muchanan di kleuterschool, cu ta scol preparatorio, ta haya cuatro idioma na scol te cu 12 aña. Tambe el a comenta cu nan ta implementa ‘metanan nucleo’ di Aruba cu enfoke riba e metanan di idioma y comunicacion.

SAM ta introduciendo curriculum nobo cu ta e modelo multilingual tanto preparatorio como basico y esey ta trece cune pedagogia y didactica nobo.

Ras-de Kort tambe a expresa cu na prome parti, cabesantenan y docentenan a haya oradornan cu ta splica e importancia di e cambio aki, kico e metanan nucleo di idioma y comunicacion ta encera. Nan a ser reparti den 6 tayer, den cual a haya e pedagogia, didactica nobo y dominio di idioma Papiamento, pa motibo cu pa algun maestronan esaki ta bay nifica un cambio.

Di loke ta trata e ‘metanan nucleo’, el a splica cu esey ta e metanan cu tur alumno mester propone ora nan yega na zesde klas. Aworaki pa prome biaha nan ta introduciendo esun di idioma y comunicacion, pero di mesun manera el a comenta cu Aruba tin su propio metanan cu kier logra cu tur alumno ora nan caba klas seis di scol basico y e ta parti den diferente area.

Ademas, el a declara cu tur aña nan tin un programa fiho diferente, entre dos pa tres dia nacional di estudionan preparatorio y pa januari nan lo haci pa scolnan basico. Banda di esey, el a informa cu scolnan a inscribi pa diferente curso cu IPA ta ofrece den su centro di desaroyo y profesionalisacion continuo y tambe scolnan por haya sosten for di Departamento di Enseñansa.