Cabesante di scol preocupa pa diferente retonan cu lo bin cu inicio di scol

Asina a expresa Angela Romero, ken ta cabesante di scol primario Tarcisius di Brasil ayera mainta prome cu conferencia di prensa di gobierno y Crisis Team, cu a tuma luga ayera den oranan di atardi, den cual a anuncia cu ta pospone inicio di aña escolar.

Como cabesante di scol el a expresa pa Bon Dia Aruba cu na e momentonan aki e tin e preocupacion di Covid-19, cu casonan ta sigui aumenta dia pa dia. El a sigura cu tur esaki ta pa via di decision cu gobierno a tuma algun siman atras, di kita medidanan y hasta uso di tapaboca.

“Cu e capa cu tur cos a baha, pero e realidad tabata cu tabatin eleccion y nan kier a campaña. Nos ta haya esey basta falta di responsabilidad y na mesun momento casonan a subi y no tin medida”, el a sigura.

Igualmente, el a indica cu un medida cu no por implementa ta esun di cera frontera y tur cos, pa motibo cu Aruba mester di entrada. Ademas e placa pa solidaridad cu hendenan ta entregando cu por ta tiki of hopi ta afecta y nan nunca a stop di traha.

Nan ta haya esaki algo inhusto, pa motibo cu nan ta considera nan mes como frontliners tambe pasobra nan ta deal cu muchanan direct. Y awor cu muchanan mes ta hayando Covid-19 ta bira un situacion basta peligroso y “basta preocupante”. Pero no solamente esey, sino tambe durante tur e tempo nan a duna protocol di prevencion, pero nan no a haya ningun cooperacion di ni un gobierno y di ningun hende.

E aña aki e cosnan ta diferente, manera Romero a expresa, agregando cu e ta espera cu scol lo habri pa e bienestar di e muchanan. Nan ta kere cu como scol nan mester keda cu protocolnan na unda mayor ta drenta cu tapaboca pa baha of busca nan yiu, pa motibo cu nan no por para den solo mas door cu no tin recurso of ayudo pa haya un tent.

Ademas di Covid-19, Romero a comenta cu tin un otro preocupacion mas grandi, cu tin di haci cu werksternan (trahadonan di limpiesa), cu segun el a señala, no tin trabao sigura pa e aña escolar aki. “Nos no sa, pasobra sin werkster no tin trabao pa otro siman. Nos no por habri scol y esaki ta bira e di dos preocupacion awor.”

Werkster, limpiesa y higiena di scol, ta importante principalmente durante temporada di pandemia y casonan di Covid-19 bayendo halto cu den muchanan e ta plama.

Ademas, el a enfatisa cu e no ta durf pa bisa pa muchanan keda na cas, pa motibo cu ta exigi di parti di nan como docente- y cabesantenan di scol pa bay traha les virtual. “Esaki ta un cos cu no a mustra cu ta traha, vooral den scolnan preparatorio, vooral den barionan vulnerabel manera nos scol ta situa aden y esey no lo ta un opcion,” Romero a declara.

Mirando cu awo reapertura di scol y inicio di aña escolar a keda posponi, Romero a comenta cu pa september ora cu scol habri, nan lo sigui implementa nan protocol di prevencion keto bay y tumando tur precaucion. Ademas cu tur personal di scol a tuma vacuna y cu comunidad tin cu siña di biba cu e pandemia aki.

Bon Dia Aruba tambe a tuma contacto cu presidente di Sindicato di Maestronan di Aruba (SIMAR), Josephine Albertus pa asina e por duna un declaracion di su banda. El a expresa cu aunke nan no por sinta riba stoel di e directivanan di scol, nan como SIMAR ta pensa cu si scol habri tin cu haciele di un manera responsabel, na unda por bisa cu cada trahado y alumno por sinti nan mes sigur.

Ademas, el a bisa cu mester tene cuenta cu e bienestar, salud y seguridad. E ta spera cu por honra e protocolnan cu Crisis Team a saca y cu tur scol hunto cu nan directivanan lo percura pa por cumpli cu e protocol, pa tin tur cos na scol y in place. “Esey pa nos ta importante”, el a menciona.

Ora scolnan tabata cera no ta tur mucha tin e mesun situacion na cas na unda nan por siña via lesnan online pa via di diferente motibo. Algun di nan ta cu no tin acceso pa un dispositivo cu internet, no tin un bon luga den cas pa haci esey of no tin internet mes y na e momento ey por mira cu enseñansa ta sigui pa un par si y un par no.

“Tin cu percura pa bin pa tur mucha haya enseñansa, pasobra enseñansa ta hopi esencial, pa no djis bin bisa cu nos ta tene scol cera”, Albertus a enfatisa.

Di mesun manera, tin cu percura pa zorg y cumpli cu protocolnan pa habri scol di un manera responsabel teniendo na cuenta e seguridad, bienestar y salud di cada trahado y alumno, ora cu un mayor ta manda su yiu scol e por sinti cu na final di dia e por cumpli cu esaki y tur trahado lo bay traha, nan ta sinti cu nan a cumpli cu esey.

Pa finalisa, el a trece dilanti cu nan no por sinta riba stoel di un directiva y exigi nada, pero loke nan si por exigi ta pa nan respeta e bienestar di cada alumno y trahado di scol.