Cabesante di Cacique Macuarima School, Rachell Croes-Caster: ‘Nos scol ta uno positivo y masha activo’

Un siman pasa, cabesante, cuerpo di docente y alumnonan di Cacique Macuarima School a lanta cu e tristo noticia cu cuater lokaal di nan scol a resulta seriamente afecta pa un candela intencional. Pero awe nan a lanta positivo y contento pa continua cu nan actividad na bienestar di enseñansa di nos muchanan.

Cabesante di e scol aki, Rachell Croes-Caster a bisa cu nan como Cacique Macuarima ta hopi contento cu e apoyo cu nan a haya di hendenan rond di nan, entre nan comerciantenan, comunidad y nan coleganan. Principalmente e famia di fundacion SKOA.

“Esaki a haci nos fuerte pa recupera di locual a pasa nos y nos scol”, el a bisa na Bon Dia Aruba.

A pesar di e situacion cu nan a pasa aden, nan ta hopi positivo y nan ta sigur cu lo bay sali dilanti. “Nos ta bay logra bek yega na e situacion cu nos scol tabata prome,” el a bisa. Nan no solamente ta un scol positivo, sino tambe masha activo. Diasabra ultimo yen di animo nan a participa durante e SKOA Expo na Renaissance Convention Center.

Awe scol lo habri bek despues di permanece cera un siman pa mantencion, limpiesa y instalacion di awa y coriente. “Nos ta cla pa cuminsa dialuna,” asina sra. Croes-Caster a declara na Bon Dia Aruba.

Nan ta cuminsa cu nuebe klas na scol. E ta sinti lastima cu nan tin dos klas cu no lo t’ey pa e temporada cu ta bin. E ta e dos vierde klasnan y klas vijf B. E zesde klas si nan a logra ubica nan den nan computer lokaal. E dos klas cu no lo ta cerca nan den e temporada aki a wordo ubica na Scol Santa Famia na Pos Chikito y otro na Colegio Laura Wernet-Paskel.

E aña aki Cacique Macuarima School ta cumpli 50 aña di existencia. Den total nan ta 21 docente di locual nan tin 12 den klas, nan tin dos docente cu ta duna les di materia. Entre nan tambe nan tin un asistente cu ta duna e parti di educacion fisico. Igualmente nan tin docente cu ta duna les pa e parti specialisa di lesamento of guia specialisa pa e muchanan.

E cabesante di Cacique Macuarima School a finalisa su declaracion bisando cu: “Nos ta sumamente feliz agradecido na nos coleganan, cu nan a yuda nos asina bon, cu nos muchanan por cuminsa dialuna bek.”