(AP) – Un zaal yen di studiantenan di prome aña pa bira veterinario na Hungria a sinta na nan luga cu hopi emocion pa e prome les di anatomia di bestia di nan carera academico, ora cu dos cabay a drenta y uni nan les.
E rector di University of Veterinary Medicine na Budapest, Dr. Peter Sotonyi, a subi un di e bestianan riba algo pa eleva nan dilanti e zaal y a usa un krijt pa skirbi riba e cabay, for di cabes te pia, unda su wesonan, organonan y musculonan por ser haya paden.
“Esaki ta nan prome les y e prome biaha mester ta cu un bestia bibo,” Sotonyi a bisa di su studiantenan. “Nan no mester topa pa prome biaha cu un curpa, pa motibo cu nan kier cura bestianan. Nan kier haci e bestianan sinti miho.”
Sotonyi tin varios aña ta usa e metodo unico aki pa introduci studiantenan na anatomia di bestia pa alrededor di 25 aña, y ta convenci cu esaki ta yuda nan interactua di manera mas directo cu e suheto na luga di studia esaki solamente via bukinan y modelnan.
Cabaynan, el a bisa, ta “bestianan cu ta particularmente inteligente y honra,” cual ta haci nan specialmente adecua pa e tarea.
“E ta un bestia grandi y hopi pro ser demostra riba dje. Ademas, hendenan ta asina asombra cu e cabay ta drenta e klas y subi e podium. Esaki inmediatamente ta duna e studiantenan hopi motivacion,” el a comenta.
E cabaynan, cual Budapest Police ta provee na e universidad, ta para calma durante e les y ta ser encurasha pa treat ocasional di bloki di sucu chikito.
Ademas di marca e bestia su curpa cu e krijt y otro materialnan di color, Sotonyi a wanta pidanan di model di e skelet di e cabay na e parti cu ta corespondi pa asina provee un representacion visual mas cla di e cabay su anatomia.
