Consultorio di Asuntonan di Adicion (CAA) ta trahando pa sigui trece e mensahe di asuntonan cu ta adiccion. Despues di Carousel nan lo sigui ofrece mas informacion y e trabou cu e consultorio ta eherciendo.

Arthur Comenencia, verpleegkundige di CAA ta papia di con e muchanan/ studiante ta reaccionando ora nan wak e variedad di caso cu tin di adiccion na video gaming.

Nan sa di 4 caso na Aruba, caminda e problema di adiccion di wega, a causa problema na scol y na cas. Muchanan a haya informacion di kico ta bezig cune. Comenencia ta bisa cu hasta e mentor di klas mes no tabata sa di cierto informacion cu ta yega na nan.

Nan ta haya yamada di scol cu ta pidi charla di droga, social media, cualkier tema en general. E ta duna di conoce tambe cu ademas di Carousel tin varios scol cu tambe ta pidi pa sesion apart.

Manera Maria College, cu a acerca nan pa sesion apart, pa charla tocante adiccion na gaming addictio y e mundo cibernetico cu ‘den e mundo aworaki’ nan ta acerca constantemente.

Por ta dificil pa trece e mensahe na hoben cu ta pendiente cu nan celular tur ora of distrae nan mes. Comenencia ta bisa pa por tin atencion di e studiantenan, e ta duna dos regla . “Ora mi cuminsa mi ta duna respet y mi kier respet bek.”

El a bisa cu celular ta algo cu ta stroba mucha di concentra, anto e ta bisa nan pa hink’e bek den tas – ora nan sali nan por tin nan celular bek. Tambe ta pidi esfuerso pa e mentor pone orden den klas.

Pa e studiante tuma ehempel, e mes ta paga su celular y ta prepara su mente completamente pa no strob’e. Comenencia ta bisa cu por papia cu otro profesional, pero mayor ta keda responsabel pa locual e mucha ta hunga riba telefon of cualkier wega.

Lo bin cu ouderavond (reunion di mayornan anochi) cu lo ta pa informa e mayornan tocante adicion. E ta bisa si cu locual ta importante ta cu e mensahe ta yegando na diferente scol y mayornan tocante e mundo di gaming. “Mi mes ta siña di mucha ora cu no mester television, sino via Bluetooth mes cu control nan por bay online.”

Ta keda na e profesional pa trece informacion, pero ta keda na mayornan pa controla na cas y ta envolvi den e mundo di nan yiu. Nan kier pa mayornan por atende y ta presenta pa nan por tuma un tempo pa tema aki.

Tin varios comentario di persona riba rednan social cu ta bisa esunnan cu ta bira adicto na wega ta pasobra ta debil; pero e no ta conta pa tur di nan. Kico ta e pensamento di CAA pa cu esaki?

Comenencia ta bisa cu tin un balans. Nan no kier bisa cu video gaming ta malo, pero e tin su cosnan negativo y positivo. E banda malo ta ora tin problema na cas, na scol y punto ta baha – esey ta punto di atencion. Pero tambe ta conoci cu un gamer por haya beca pa bay studia afo, pues por wak e parti bon. Semper ta keda na e mayor pa ta envolvi den e mundo di e mucha, pa nan wak ki nan ta hunga y cu ken nan ta envolvi cune den wega.

Den caso aki e acogida di presentacion ta bayendo y nan ta compronde e mensahe. Nan ta consciente cu e mensahe ta dunando un efecto. “Ta duna e informacion y ta wordo scucha. FADA informa riba adiccion na video gaming, algo cu hende no tabata sa di dje. Si di tur alumno por scapa 10 of 5, nos ta bayendo riba e bon caminda”, el a expresa.

El a duna di conoce cu nan ta bay sigui despues pa scolnan cu ta interesa. CAA ta keda habri pa duna yudansa y informacion, sea den adicion di wega, pornografia, e mundo cibernetico of cualkier adicion.