Compania mama di TikTok, ByteDance, a bay di acuerdo pa paga $92 miyon pa resolucion na un grupo di usuarionan Mericano cu ta parti di un demanda colectivo acusando cu e app di comparti video a faya di obtene nan permiso pa colecta nan data, violando un ley di privacidad estricto na Illinois.
E demanda federal a alega cu TikTok a viola e ley di privacidad biometrico di Illinois, cu ta permiti demandanan contra companianan cu ta colecta data di consumidor sin permiso, incluyendo via scan di cara of fingerprint. Illinois ta e unico estado cu un ley cu ta permiti hende busca daños monetario pa asina un coleccion di datonan no autorisa.
“Mientras nos no ta di acuerdo cu e acusacionnan, na luga di bay door di litigacion extenso, nos kier enfoca nos esfuersonan riba construccion di un experiencia safe y feliz pa comunidad TikTok”, e compania a bisa den un declaracion via e-mail.
Facebook a bay di acuerdo pa paga $550 miyon den un resolucion bao e mesun ley februari ultimo. E acuerdo di TikTok ainda mester di aprobacion di un hues federal.
Defensornan di privacidad a elogia e ley como e forma di proteccion mas fuerte na e pais contra uso comercial di e tipo di data en cuestion, y a sobrevivi esfuersonan andando den industria tecnologico y otro negoshinan pa debilita esaki.
Illinois ta un di tres estado cu tin leynan gobernando e uso di data biometrico. Pero e otro dos, Texas y Washington, no ta permiti demandanan individual, delegando cumplimento na nan Procurador General.
