(AP) – Noticiero digital ganado di premio Pullitzer Prize BuzzFeed News lo cera como parti di un movida pa corta gasto di e compania doño di BuzzFeed News cu ta recortando por lo menos 15 porciento di henter su empleadonan, agregando na e retironan cu a haci e aña anterior.
Den un memo cu a manda na empleadonan, fundador di BuzzFeed Inc.., y CEO Jonah Peretti diahuebs a informa cu ademas di e division di noticia, lo tin recorte den su ekiponan administrativo, di negoshi, contenido y tecnologia. BuzzFeed tambe ta considerando haci recorte den mercado internacional.
BuzzFeed tin mas o menos 1,200 empleado segun un documento regulatorio recien, nificando cu mas o menos 180 persona lo perde nan trabao den e recorte actual aki. Peretti a bisa den su memo cu el a tuma e decision di “inverti dimas” den e division di noticia, sinembargo no a logra reconoce na tempo cu e sosten financiero necesario pa sostene e operacionnan no tabata presente.
Avisonan digital a disminui den e aña aki, cortando e ganashi di companianan di tecnologia grandi desde Google te na Facebook. Olanan di retiro a cuminsa impacta e industria di tecnologia y ta premira cu lo tin mas. “Mi a siña di e erornan aki y e ekipo cu ta sigui dilanti mester siña di nan tambe,” Peretti a skirbi den e memo. “Nos sa cu e cambionan y mehoracion cu nos ta haci awe ta pasonan necesario pa un miho futuro.”
E anuncio ta bini solamente algun luna despues cu BuzzFeed a bisa cu nan lo corta mas o menos 12 porciento di nan forsa laboral, citando un condicion economico cu ta empeorando. Cortenan laboral tambe a keda anuncia den December.
E compania lo keda cu un solo departamento di noticia cual lo ta HuffPost segun Peretti a skirbi.
