ORANJESTAD – Director di Arubus, sr. Theo Croes a reacciona riba e diferente puntonan cu e trahadonan pa medio di nan sindicato a trece dilanti pa hustifica e welga di diaranson ultimo.
Un punto cu sr. Croes a referi riba dje ta esun relaciona cu sistema di cambio di warda, ya cu segun e trahadonan, “ya no tin bida social mas”, el a indica. Pasobra tres biaha pa luna nan ta cambia warda. Sr. Croes a bisa cu awor e trahadonan ta sugeri pa cambia di 5 pa 6. E no ta haya cu nan mester bay welga pa nan sugeri pa bin cu cambio riba sistema di warda, sin sinta na mesa prome y discuti e asunto aki. Pero el a bisa cu aparte di esey den e contracto colectivo (CAO) vigente ta para dos cambio di warda pa luna. “CAO cu nan tur a acepta y cu nan tur a firma”, el a bisa.
Otro asunto tin di haber cu plan di vakantie. Director di Arubus a declara cu na luna di maart a wordo entrega e formulario pa e trahadonan yena nan vakantie, y mayoria di e trahado (un 85%) no a entrega nan solicitud te awor. “Con bo kier cu ta wordo duna vakantie…”, el a bisa.
Encuanto medida di siguridad na bushalte na Playa, el a bisa cu tambe nan a informa e trahadonan representa pa STA den e ultimo reunion, cu nan ta cerando e area ey cu tubonan y hefboom.
Bus y ventilacion
E ta haya cu e accion di diaranson ultimo no tabata e manera pa nan trece nan preocupacion. El a bisa cu di e cantidad di punto presenta pa e trahadonan solamente dos di nan 2 y 5 a wordo presenta debidamente riba e mesa di negociacion. El a declara cu e dos puntonan aki a wordo contesta y nan a informa nan debidamente riba e accionnan cu gerencia di Arubus ta tumando pa atende cu e solicitud di e trahadonan. Tambe nan ta buscando manera pa e busnan cu no tin airco pa bin cu otro manera di ventilacion nobo. Igualmente el a reafirma e informacion cu e mandatario di Transporte a duna cu otro luna ta biniendo 6 bus Marco Polo Volvo cu nan ta ekipa cu airco.
