Nos ta parce riba e caminda firme di recuperacion di nos economia, motibo di alegria y satisfaccion, berdad? Hende por haya empleo atrobe, talvez esun cu nan tabatin, o algo otro. En todo caso, nan ta den posicion atrobe pa gana nan propio pan y no ta depende mas di benevolencia di otro. Recuperacion ta significa tambe cu e angustia den tanto famia ta termina y nan ta reanuda nan bida di antes, pero talvez no den tur aspecto. Al fin y al cabo, un aña di necesidad agudo no ta algo cu ta pasa bay sin laga su rastronan. Esaki por ta den forma di debe, cu lo mester paga di algun manera den e proximo luna o hasta añanan, y ta limita e posibilidadnan financiero, aunke e crisis mes a pasa caba.

Sin embargo, banda di e satisfaccion cu den diferente aspecto nos por bolbe na nos bida di antes, no ta asina cu sin mas nos por bolbe na e ‘business as usual’ cu tabata existi promer cu nos a cay den e crisis di aña pasa. Nos ta referi explicitamente aki na e cosnan cu no tabata bon tempo cu e crisis a inicia, y cu awor cu el a caba, ainda y atrobe ta molestia, cu aparente consentimento y silencio di e autoridadnan concerni. Manera e reinicio di tour cu vehiculo di tur tereno (UTV), cu ta visible atrobe riba nos careteranan, rumbo pa, o regresando di nan biahe di destruccion den nos naturalesa. Nos sa cu lo scucha inmediatamente e critica cu e companianan aki tabatin bastante tempo sin por a opera y cu awor no mester ‘maha’ pero hala un banda y laga nan traha, emplea hende y gana placa y… paga belasting. Asina ‘nos tur ta bay dilanti’, supuestamente. Basicamente esaki lo ta e mesun argumento cu tabata scucha promer cu e pandemia, unda ya caba esnan cu ta gana placa den turismo na un manera dañino pa e propio turismo a largo plazo, tabata argumenta cu ta nan ta trece placa aden. Y ademas awor cu e argumento cu despues di tanto perdida cu nan mester a absorbe, nan mester por opera sin cuestionamento.

Nos lo tin gana di sigui elabora riba e linea di pensamento aki, pasobra e ta duna un perspectiva interesante. Por ehemplo, siguiendo e manera di pensa aki, nos mester urgi gobierno pa den e proximo par di aña aki no haci nan trabao di inspecciona ningun restaurant of bar mas, pasobra mester ‘habri caminda pa nan por traha’ sin cu autoridad ta bin molestia nan. E ora nan operacion ta sali mas barata pasobra eventual cambio of adaptacion cu normalmente autoridadnan por exigi pa nan instalacionnan ta cumpli cu norma legal, por keda sin haci. Recuperacion rapido di economia asina lo bira e excusa pa no controla mas? Of nos mester reconoce cu despues di tur e tempo cu tabatin durante e pandemia e mandatarionan, cu tabata esnan yama pa reglamenta e uso di UTV na Aruba, nan no a haci nada? Y nos mester conclui cu nan no a haci nada pasobra nan ta di acuerdo cu e companianan aki tin pleno derecho di destrui naturaleza? Of nos mester conclui cu nan no a haci nada pasobra nan ta(bata) asina inepto como mandatario cu mihor nan no bolbe mas?

Otro asunto cu ta relaciona cu e falta di accion di e mesun mandatarionan ta e asunto di piscamento cu harpun. E mesun preguntanan fastioso ta bin dilanti: awor cu tur aficionado di harpun por bolbe na otro manera pa pone pan riba mesa pa nan famia, nos ta bay kita e berguenza aki di no cumpli cu tratado internacional? Of e problema a bira cu e companianan cu, scondi den e decreto cu a haci posible e piscamento individual, a haya posibilidad pa organisa piscamento cu harpun den forma comercial? Ta bay para esey tambe, of no? Of nos mester conclui cu aki a usa e argumento di e pober Arubiano cu mester cria su famia cu piscamento cu harpun, pa forza habri e porta di prohibicion di piscamento cu harpun, anto na escala comercial?

Aki un siman ta celebra Dia Mundial di Conservacion di Naturaleza. Nos ta sigur cu aki tambe lo tin discurso, o recado di prensa di ministerio o departamento unda ta recorda nos como ciudadano di e importancia di conservacion di medio ambiente, no pa nos so, sino pa e futuro generacionnan tambe por tin un ambiente sano pa biba aden. Con serio nos mester tuma e ‘sermonnan’ ey, si pa añanan largo, y bao tur circunstancia, nos ta mira hustamente lo contrario ta sucede? Lo nan rabia si bisa nan cu nan ta hipocrita? Lo nan argumenta cu nan ta ‘demisionario’ y cu lo sucede algo dia tin gobierno atrobe? Nos lo bisa cu tempo nan tabata gobierno, aparte di e hecho cu como ‘demisionario’ tambe bo tin e poder y obligacion di actua, tampoco nan tabata actua na fabor di conservacion di naturaleza, pakico awor anto spera mas di nan, si den e proximo plan di gobierno lo tin hala di palabra bunita, pero bashi? Ya cu ta consultando cu tur tipo di ‘stakeholder’, por considera formula algo cu sikiera tin cierto credibilidad. Si no, ta bolbe na ‘business as usual’ cu nos conoce, pero no por aproba.