Manera Bon Dia Aruba a publica siman pasa riba e proyecto di e Bushiri Hotel e compania encarga cu entre otro e trabou di deshaci asbest den e ex hotel, lo haci esaki bou guia di e departamentonan DTI y Salud Publico. Mientrastanto e departamentonan aki no a exigi esaki ora a ruim asbest riba tereno di refineria na Lago Heights aña pasa.
Manera nos a publica hopi biaha caba, e pareha De Vries cu ta biba hopi cerca di e dump ilegal di asbest a cana un caminda di cruz aña pasa ora un compania Hulandes a cuminsa ruim e asbest riba y bou tera cu Valero a laga atras y no a warda bon. E ultimo director di Refineria di Aruba, doño di e refineria y su terenonan, mes a declara cu Valero a faya den esaki. Nan a yega na un deal cu Valero cual a laga placa atras pa ruim e asbest.
Asina trahadonan di Citgo a cuminsa cu e limpiesa hunto cu e compania Hulandes. Sinembargo DTI no a wordo poni na haltura. Tampoco e compania Hulandes y Refineria di Aruba a sigui e protocol y stipulacionnan pa ruim asbest. Ambtenaarnan di DTI a haya sa di e trabou ora e pareha De Vries a informa nan. Ambtenaarnan a presenta sinembargo no a actua ni para e trabou cu na momento ey ainda tabata andando. Nunca e pareha of e otro habitantenan bibando cerca a tende algo di Departamento di Salud Publico mientrastanto nan tabata y ta hopi preocupa pa nan salud.
Banda di esaki Refineria di Aruba a viola ley pa crea un dump di asbest nobo. Pasobra tin un permiso di molester (hindervergunning vigente). Manera director di DOW a bisa siman pasa bon cla durante e anuncio di e proyecto di ex Bushiri Hotel: tin u dump oficial so pa asbest, locual ta Parkietenbos.
Saconan special
E compania cu ta encarga cu e bashamento y limpiesa di e ex hotel, esta We Build, a expresa cu nan ta bay hinca e material cu asbest di Bushiri Hotel den saconan special. El a splica cu e saconan den cual e material di asbest ta wordo transporta, ta bini di Hulanda y ta aproba pa uza cu e material aki door di autoridadnan Hulandes. E compania ta bisa tambe cu nan ta bay traha segun normanan di Hulanda. Tin en total 7000 M2 di material cu ta contene asbest, di cual 5500 m2 ta riba e dak y otronan ta na suela of den e edificio (linoleum).
Proteccion
Pregunta ta keda dicon den e proyecto di Bushiri awor lo uza saconan special y sigui normanan halto pa deshaci asbest, mientras den e caso di Lago Heights no a uza e saconan special aki. Eynan a dump e asbest den containernan y dera nan. Otro pregunta ta dicon e departamentonan DTI y Salud Publico awor si ta exigi cu e compania mester cumpli cu e reglanan y lo traha un plan di salud. Mientras aña pasa niun departamento, ni polis a actua ora e actividadnan ilegal tabata tumando luga na Lago Heights. Pa varios luna e habitantenan eynan mester a wak e limpiesa di asbest dilanti nan cas. E trahadonan di e compania cu tabata ruim e asbest riba tereno di refineria tabata cana rond den coverall blanco, hasta cabes full tapa. Mientras niun departamento a informa e habitantenan bibando na otro banda di e heki, si nan tambe mester proteha nan mes. Niun departamento te dia awe a informa e habitantenan mes cu nan tabata ruim asbest.
Den e caso di Lago Heights nan a ruim un cantidad hopi mas grandi di asbest compara cu nan lo bay haci awor na ex Bushiri Hotel. Despues di e limpiesa na Lago Heights, minister responsabel pa DTI, a manda e pareha De Vries un carta cu tur cos a bay segun e reglanan. Pero manera bisa, momento cu e compania a cuminsa cu e trabou, ambtenaarnan di DTI no tabata na haltura mes. Banda di esaki e habitantenan no a wordo informa adelanta di e trabou, cual ta un di e stipulacionnan den casonan asina. Y finalmente ora Bon Dia Aruba a puntra e minister (Arthur Dowers) over di e carta, e no tabata na haltura y a puntra e director di DTI si el a firma e carta of e director. Mientras bou di e carta ta poni e firma di minister.
Bon Dia Aruba lo sigui riba e topico aki y tambe lo busca un splicacion di gobierno dicon ta midi cu dos midi pa ruim asbest.
