Gobierno a trece dilanti caba den un entrevista anterior cu loke Lotto pa Deporte a haci pa nan como gobierno sigur ta inaceptabel segun minister di Turismo, Salubridad y Deporte Dangui Oduber(MEP). E mandatario a laga sa siman pasa cu nan ta buscando conseho huridico pa atende cu algun miembro di directiva di Lotto pa Deporte cu no a duna oido ainda na carta relaciona cu cede di asiento.
Minister Oduber ta bisa cu nan a manda carta caba pa e directiva di Lotto pa Deporte cu tin un gobierno nobo, pa cede nan asiento na gobierno pa gobierno por apunta su hendenan di confiansa y ainda ta wardando contesta.
“Lamentablemente nan no a duna oido na e carta, no a contesta e carta, cual mi ta considera sigur un falta di respet como minister di deporte.” Na momentonan aki ta buscando conseho huridico na con ta bay atende cu algun miembro di e directiva aki pasobra normalmente ora tin cambio di gobernacion, ta normal cu tur bestuurslid ta haya tanto tempo pa cede nan asiento. “Ora tin cambio di gobierno bo tin cu tene cuenta cu gobierno nobo ta bin cu su hendenan di confiansa. Pero lamentablemente den e caso di Lotto, e hendenan ta mara na e stoel. Mi ta kere tin cierto beneficionan tambe cu nan ta gosa di dje cu nan no kier hala for di e stoel aki”, e mandatario a bisa.
El a sigui comenta cu: “Tambe mirando e hecho cu un fundacion nobo a wordo lanta un dia prome cu eleccion. Dia 21 di september bo ta bay notario pa lanta un fundacion nobo pa limita gobierno su autoridad y pa nos esey no ta aceptabel.” E no ta kere cu dirigentenan responsabel cu ta maneha un instituto manera Lotto pa deporte por tuma decisionnan asina sabiendo cu mester tene cuenta cu lo bin un otro gobierno. Minister Oduber: “Nos ta tumando hopi decisionnan caba no solamente pa Lotto pero pa tur e overheids NV cu ta bao nos ministerio y nos ta bay tuma e decisionnan necesario pa garantisa e comunidad aki cu tur e entradanan cu Lotto pa Deporte ta genera, realmente ta bay den deporte y no ta bay pa cumpra camara di siguridad of biaha rond.”
E placa aki e ta enfatisa mester wordo inverti den nos muchanan, den facilidadnan deportivo y den deporte no manera a sosode e ultimo añanan aki.
Bondnan deportivo sin placa
Segun minister Oduber ta splica, Lotto pa deporte ta wordo maneha por medio di Canadian Bank Note cu ta traspasa un suma di placa pa Subsidie Commissie, y Canadian Bank Note ta esun cu ta keda cu mayoria di e placa. Dependiendo anualmente con e benta di Lotto bay, Lotto pa Deporte ta genera entre 40 cu 50 miyon florin. Ora bo mira kico deporte ta haya di e 50 miyon aki, ta peanuts segun minister Oduber. Tur e instancianan deportivo no ta haya e placa necesario cu nan mester di dje.
“Nos ta papiando cu hopi presidentenan di diferente bondnan deportivo y tur ta trece dilanti e mesun problema cu placa, cu nan mester di mas placa pero nan no ta haya mas placa. Mi no ta haya esaki husto cu bo tin un fundacion cu a wordo lanta netamente pa subsidia bondnan deportivo pa percura pa deporte haya atencion necesario y deporte no a haya e atencion necesario”, e mandatario a expresa siman pasa.
Contracto ‘inusual’ di 15 aña
Tabata wordo menciona cu e fondo di Lotto tabata den un situacion penoso y Canadian bank Note a rescata Lotto di Aruba. Minister Oduber no ta comparti e opinion cu nan a bin rescata Lotto, mas bien nan a bin kita tur placa for di deporte y haci uzo di e oportunidad pa nan gana placa haciendo negoshi for di e deportistanan na Aruba. Minister Oduber: “Pero logicamente nos ta bay sinta na mesa cu Canadian Bank Note. Pasobra nos a compronde cu durante gobernacion di Mike Eman mes, nan a renegocia e contract aki. Normalmente bo ta firma un contract pa termino di maximo cinco aña, y despues bo ta evalua esaki y si cosnan no a bay bon bo ta prolong’e cu cinco aña mas. Pero nos a compronde cu nan a firma un contract pa 15 aña y nos a pidi statuutnan y tur documento pa revisa esaki cual ta algo inusual.” E ta sigui splica cu ta mesun contract cu ta firma ora di hedging.
Decisionnan di ‘mala fe’
Minister Oduber: “Nos a ricibi un carta di Canadian Bank Note cu nan tambe tin un interes pa sinta cu e minister nobo di deporte pa duna un splicacion di e contract y nan intencion. Logicamente nos ta habri pa sinta cu e director di Lotto pa Deporte tambe pa nos haya su banda di medaya. Pa wak si su argumentonan ta hustifica e decisionnan cu a wordo tuma.”
E mandatario no ta compronde kico por a stroba nan di a haci e decisionnan aki pa ocho aña largo, cu mester a core tuma e decisionnan aki na ultimo momento net prome cu eleccion. “Kico a stroba bo pa asina largo bo haci e cambionan cu abo ta desea? Anto decisionnan asina mi ta yama decisionnan di mala fe.” Gobierno awo mester wak ki espacio tin pa sea anula e contract aki of renegocia pa deporte haya mas placa.
