Tito Bolivar, ken ta un persona conoci pa e trabao cu ta haci na San Nicolas pa loke ta trata arte, y ademas ta e organisado di Aruba Art Fair, a traves di rednan social a solicita un ayudo financiero na comunidad en conexion cu Dia di Himno y Bandera, 18 di maart y esaki lo yuda decora e rotonde di San Nicolas.
Mediante un mensahe riba Facebook, Tito Bolivar a indica: “Estimado followernan, specialmente tur e rotonde lovernan! Door cu mi a ser ataca asina hopi door di chollernan mi no tin fondo pa decora e rotonde pa 18 di maart, pero mi a lesa via varios medionan cu boso lo kier yuda mi as well! Mi ta hopi agradecido pa cu esaki! boso por yuda mi libremente cu 25 te cu cuanto cu ta di bo alcance y kisas hunto nos por decora e rotonde di FTA na San Nicolas, si bo ta interesa please message me, let’s do this!”
Anteriormente Bolivar tambe a yega di decora e mesun rotonde aki tanto pa Dia di Himno y Bandera como pa Pasco, sinembargo aki e aña aki, manera el a indica caba riba su declaracion, tin personanan cu menos bon intencion na San Nicolas cu ta ataca y destrui e infrastructura di cierto edificionan na San Nicolas, loke ta causa mal contento den e poblacion cu ta purba di mantene e area pa asina bira mas atractivo pa turistanan. Pero problema di ladronicia y adicto ambulante riba caya lamentablemente ta pone San Nicolas den un mal spot.
Bolivar ta bin haciendo basta trabao den comunidad di San Nicolas, batiendo alarma pa e situacion aki caminda adictonan ambulante a kibra bentana di su auto, a kibra bentana di su galeria Artisa, a destrui un obra di arte dedica na su mama cu el a haci na 2022, y asina tin hopi otro situacion cu el a bin denunciando, pero nada ta ser haci door di autoridadnan concerni pa personanan cu ta biba den caya y ta adicto ambulante, manera e ta señala.
Pa e motibo aki, e ta solicita ayudo financiero di comunidad pa un biaha mas decora e rotonde di San Nicolas e aña aki pa conmemora Dia di Himno y Bandera y asina San Nicolas por sigui tene un bunita rotonde.
