Recientemente ariba nan pagina oficial di Facebook Fundacion Zinnia a anuncia cu nan proyecto di Bus AmigoDIDI ta un realidad. Un proyecto cu tin como meta evita cu cualkier persona ta stuur bao influencia di alcohol despues di eventonan di carnaval.
Na aña 2019 Fundacion Zinnia y Fundacion Anti Droga Aruba (FADA) a cuminsa cu e proyecto Bus AmigoDIDI como un proyecto piloto. E meta principal di e Bus AmigoDIDI ta pa ofrece transport na personanan pa y for di paradanan di carnaval pa asina evita cu nan ta stuur auto bao di influencia di alcohol.
Den e fase di proyecto piloto, Bus AmigoDIDI a resulta un exito y hopi ta esnan cu a haci uso di e bus aki durante e paradanan di carnaval. Lamentablemente Covid-19 a yega mundo y tur cos a paralisa.
Aña pasa Bus AmigoDIDI no tabata activo durante e temporada di carnaval, pero e aña aki si nan ta activo cu cinco Bus AmigoDIDI pa tur esnan cu ta desea di haci uso di e servicio aki pa e ultimo paradanan di carnaval 70.
Manera ta conoci Fundacion Zinnia a lanta na 2015 despues cu e hobencita Zinnia a fayece pa motibo cu el a wordo atropea pa un conductor cu tabata bao influencia di alcohol tras di stuur.
Despues cu el a wordo funda, Fundacion Zinnia ta traha hunto cu FADA ariba e campaña conoci, Amigo DIDI, pa asina conscientisa pueblo di Aruba ariba con importante ta pa tin un Amigo DIDI.
E meta di Amigo DIDI ta pa crea un ‘mindswitch’ den e persona cu ora e ta bay di fiesta of celebracion cu ta inclui bebemento di alcohol of manera ta wordo bisa ‘dal par di drinks’, nan mester tin un persona cu lo por yud’e pa maneha nan auto ora nan lo bay cas y asina evita accidente.
