????????????????????????????????????

Segun presidente di Camara di Comercio y Industria di Aruba (KvK)Ernst Mohamed e asina yama “red tape” di pagamento di belasting ta frustra hopi empresario y inversionistanan  na Aruba.

Esaki ta un topico cu ya den pasado y particularmente den temporada di eleccion KvK a yega di trece dilanti riba e cantidad di impuesto cu un comerciante/ inversionista  mester paga aki na Aruba, y cu ta limita nan espacio di accion pa haci  negoshi akinan.

“Ta un tiki fastioso cu tin hendenan ey afo cu tin gana di inverti na Aruba, pero nos mes ta manda nan afo y esey no ta conduci pa un bon economia di Aruba”, segun presidente Mohamed.

Igualmente e representante di e diferente comision di KvK a divulga algun informacion riba locual e gremio comercial aki a pone den su plan strategico.  Nan ta reuniendo cu e diferente organisacion politico, particularmente cu e tres partido representa den parlamento y instancianan manera Banco Central, Departamento Economico  di Aruba pa asina KvK trece dilanti puntonan  relaciona cu desaroyo y diversificacion economico na Aruba.  Pero tambe pa bin cu solucion  of conseho riba e forma di atrae inversionista pa no pasa den tanto “red tape”.

Preocupacionnan di KvK
Ola di criminalidad  ta un preocupacion cu KvK tambe a canalisa cu sector politico y instancia policial, pero cu minister di Husticia Arthur Dowers, pa e comerciantenan  por sinti nan mes mas sigur. “Atraconan ta bin mas cerca di nos coleganan comerciante y tambe tin cosnan cu nan mes por haci”,  sr. Mohamed ta bisa . Tambe otro punto cu no a scapa for di e lista di preocupacion KvK tin di haber cu e retonan cu e comerciantenan di  Caya Grandi  ta pasando aden.  Igualmente  otro preocupacion di KvK ta relaciona cu e falta di estimulo y apoyo necesario pa e “young entrepeneur” pa nan por haci nan inclusion den mundo comercial local.

KvK  tin un comision y ya caba nan ta organisando  un actividad pa e  “young entrepeneur” e aña aki.  Otro aña KvK lo kier bin cu un plan strategico y  interesante pa e comunidad hoben di entrepeneur, ya cu e hobennan aki tin bon idea pero nan no  ta hayando respaldo pa crece den mundo di negoshi.  Un aspecto importante pa e “young entrepeneur” tin di haber cu e parti di financiamento pa nan proyectonan.