Un di e problemanan cu ta costando placa ta e ineficiencia cu tin den departamentonan gubernamental pa tuma decisionnan financiero. Segun parlamentario Rocco Tjon (MEP), e locual cu ‘nos tin mester den e aparato gubernamental, ta descentralisa cierto procesonan’.
Prome cu el a drenta e arena politico, sr. Tjon tabata na cabes di prizon KIA como director. E ta splica Bon Dia Aruba, siendo hefe di e departamento aki el a ‘bin encontra diferente red tapes’ cu ta haci cu gastonan ta subi innecesariamente. Como ehempel e ta splica cu den su propio experencia, un dienstreis (biahe pa trabou) a sali casi 4 biaha su balor inicial, pa motibo cu ora finalmente a haya e aprobacion di minister, e prijsnan a subi drasticamente.
“Mi ta kere si bo bin cu un ley caminda bo ta reglamenta e maneho di e financia mucho mas miho, descentralisa, caminda hefenan di departamento tin mas autoridad pa tuma cierto decisionnan, bo ta bay corta burocracia y lo percura cu si tin chensnan den bo caminda bo por haci uzo di esaki”, sr. Tjon ta bisa. E ta splica, si como hefe di departamento bo kier laga bo personal bay un curso, cu na e momento ey e ta barata, bo por tuma e decision di biaha pa actua y no warda te ora esaki bira mas caro of impagabel pa e departamento.
Tambe el a splica cu tin biaha bo mester di algun ekipo of material pa garantisa siguridad di bo personal, pero e caminda pa cana por ta largo, exponiendo asina aki trahadonan publico na peliger, sea directo of indirecto. Den su experencia como hefe di un departamento e tempo ey, e ta splica cu un aprobacion por tarda mas cu 3 siman pa motibo di e canalnan cu e documento(nan) mester cana. Segun e parlamentario, e ta sigur cu si bo papia cu mas hefenan di departamento, ‘bo lo haya e mesun feedback’.
Placa presupuesta a bay pa algo otro
E herment mas importante na unda bo ta cuminsa ta bo presupuesto. Sr. Tjon ta splica cu e realidad ta cu hefenan di departamento hopi biaha ta haya e sorpresa cu ora nan a kere cu nan tin un montante di placa pa uza segun ta presupuesta pa su departamento, despues di cana henter e caminda burocratico, ta bin haya sa ya e placa a wordo destina pa algo otro pa via di e mandatario.
E splicacion aki di e parlamentario ta bin riba e pregunta di Bon Dia dicon nos por wak den presupuestonan anterior tin por ehempel 50 mil florin poni pa training di e personal, pero esaki nunca ta tuma luga?
Riba e pregunta cu nos a haci na e parlamentario di con por ta posibel cu gobierno ta desvia di un presupuesto cu ta wordo aproba pa parlamento, cu cada post cu nan suma exacto, sin consulta bek cu parlamento, e ta splica cu e maneho ta keda den man di gobierno. Locual cu mester bay haci ta centralisa e leynan di tal forma cu bo ta percura cu e mandatario ta cumpli cu deseonan, pero mas importante necesidadnan di e departamento(nan) y no ta djis maniobra cu placa sin mas. Como fraccion, MEP na e momento aki ta trahando riba un concepto nobo di ley.
Concepto di ley
E parlamentario ta splica Bon Dia cu concepto nobo di ley cu nan ta trahando riba dje pa nan introduci no mas tarda cu luna di mei di e aña aki, ta regarda e ley di comptabilidad.
Un di e aspectonan di e ley nobo aki ta cubri netamente e eficiencia di e departamentonan, pero tambe e autoridad cu hefenan di departamento tin, asina aki yudando na ‘frena nombramento y tambe decisionnan politico’. Segun sr. Tjon den e concepto nobo aki ‘lo bin un management and control cyclus hancra, caminda cu e no lo ta prudente pa un mandatario nombra un persona cu no ta cualifica pa e posicion paso e lo bons bek riba bo e ora’.
Locual cu no tabata cla pa nos redaccion, ta na ki manera exacto esaki lo bons bek riba un mandatario manera sr. Tjon ta splica. Mas aclaracion riba esaki lo wordo pidi na e parlamentario di un proximo entrevista.
